ورالدىق عالىم ماراپاتقا يە بولدى

جاڭگىر حان اتىنداعى باتىس قازاقستان اگرارلىق-تەحنيكالىق ۋنيۆەرسيتەتىنىڭ عىلىم جانە تەحنولوگيالاردى كوممەرتسيالاندىرۋ دەپارتامەنتىنىڭ ديرەكتورى, بيولوگيا عىلىمدارىنىڭ دوكتورى, پروفەسسور ينديرا سالتانقىزى كوكتەم مەرەكەسىنە وراي الماتىداعى عىلىم ورداسىندا وتكەن سالتاناتتى جيىندا اكادەميك ءنايلا بازانوۆا اتىنداعى ماراپاتقا يە بولدى.

عىلىمداعى ايەلدەرگە قۇرمەت كورسەتىلگەن جيىندى قازاقستان رەسپۋبليكاسى پرەزيدەنتى جانىنداعى ۇلتتىق عىلىم اكادەمياسى ۇيىمداستىردى. اتالعان ماراپات عىلىمداعى ايەلدەردىڭ ەڭبەگىن ناسيحاتتاپ, وتاندىق عىلىمنىڭ دامۋىنا جاڭا سەرپىن بەرەدى.

عالىم ايەلدەر اكادەميك ءنايلا بازانوۆا اتىنداعى قۇرمەت بەلگىسىمەن ماراپاتتالدى

ەسكە سالا كەتسەك, ءنايلا بازانوۆا − قازاقستان مەن ورتالىق ازيادا ايەلدەر اراسىنان شىققان تۇڭعىش اكادەميك. ول اۋىل شارۋاشىلىعى جانۋارلارى فيزيولوگياسى عىلىمىنىڭ نەگىزىن قالاۋشىلاردىڭ ءبىرى. عالىم ءىرى قارا مالدىڭ اس قورىتۋ ەرەكشەلىگىن زەرتتەپ, جانۋارلار فيزيولوگياسى سالاسىنىڭ دامۋىنا زور ۇلەس قوسقان بولاتىن.

قازاقتان شىققان عالىم ايەلدەر تۋرالى نە بىلەمىز؟

ال ماراپات يەسى ينديرا سالتانقىزى بولسا مال شارۋاشىلىعىنداعى سەلەكتسيا ءۇردىسىن ءتيىمدى جۇرگىزۋ, گەنەتيكالىق رەسۋرستاردى ساقتاۋ مەن جەتىلدىرۋ سەكىلدى كۇردەلى سالانىڭ مامانى. ول قازىرگە دەيىن جابى ءتيپتى قازاق جىلقىلارىنىڭ, گولشتين تۇقىمدى ءىرى قارا مالىنىڭ, بەكىرە تۇقىمداس بالىقتاردىڭ, ءتىپتى اۋىل شارۋاشىلىعى سالاسىنداعى ءتۇرلى وسىمدىكتەردىڭ گەنەتيكالىق قۇرىلىمىن زەرتتەپ, ەكولوگيالىق تازا ءونىم الۋ ادىستەرىن شىعارۋمەن اينالىسىپ ءجۇر.