ستالكينگكە جول جوق

ستالكينگ – جابىرلەنۋشىنىڭ ەركىنە قايشى بايلانىس ورناتۋعا نەمەسە اڭدۋعا باعىتتالعان, زورلىق-زومبىلىقپەن بايلانىسى جوق, بىراق ەلەۋلى زيان كەلتىرگەن ارەكەتتەر. بۇل قىلمىستىڭ جازاسى 200 اەك-كە دەيىنگى ايىپپۇل, سول مولشەردە تۇزەۋ جۇمىستارى,  200 ساعاتقا دەيىن قوعامدىق جۇمىس نەمەسە 50 تاۋلىككە دەيىن قاماۋ بولىپ بەلگىلەنگەن بولاتىن. ياعني الدەبىر ادامنىڭ ىزىنە ءتۇسىپ, تىنىمسىز مازالاپ, تەلەفون شالىپ, ءتىپتى ول قالاماعان سىيلىقتار جىبەرىپ, قورقىتىپ-ۇركىتىپ, سونىڭ ىشىندە عالامتور ارقىلى دا مازالاي بەرگەن ادام جاۋاپقا تارتىلادى.

باتىس قازاقستان وبلىسىنىڭ ىشكى ىستەر ورگاندارى وڭىردەگى ستالكينگ قىلمىسىنىڭ العاشقى ارەكەتىن ءبورلى اۋدانىندا تىركەدى. اقساي قالاسىنىڭ تۇرعىنى پوليتسياعا بۇ­رىن­عى تانىسى تاراپىنان جۇيەلى تۇر­دە قۋ­دالاۋ مەن قورقىتۋعا ۇشىراعانى تۋرالى ارىزدانعان. ەكىنشى وقيعا بوكەي ورداسى اۋدانىندا بولعان. تەرگەۋ ورىندارى انىقتاعانىنداي, 2025–2026 جىلدار ارالىعىندا ەر ادام بۇرىنعى جۇبايىن جۇيەلى تۇردە قۋدالاپ, وعان الەۋمەتتىك جەلى ار­قىلى قورقىتۋ سيپاتىنداعى جازبالار جى­بەرگەن. بوكەي ورداسى اۋداندىق سوتى ونىڭ بۇل ارەكەتىن جابىرلەنۋشىگە ەلەۋلى پسي­حو­لوگيالىق زيان كەلتىرگەن دەپ تاۋىپ, زاڭ ­اياسىندا جاۋاپقا تارتتى.

ستالكينگ بويىنشا العاشقى ۇكىمنىڭ جاي-جاپسارىن تولىعىراق ءبىلۋ ءۇشىن باتىس قازاق­ستان وبلىستىق سوتىنىڭ ءباسپاسوز حات­شى­سى نۇرگۇل قاناتباەۆاعا حابارلاسقان ەدىك.

– ءبورلى اۋداندىق سوتى قىلمىستىق كودەكستىڭ 115-1-بابىندا كوزدەلگەن زاڭسىز قۋدالاۋ فاكتىسى بويىنشا ۇكىم شىعارىپ, سوتتالۋشى د.-عا 80 ايلىق ەسەپتىك كورسەتكىش مولشەرىندە, ياعني 346 000 تەڭگە كولەمىندە ايىپپۇل تۇرىندەگى جازا تاعايىندادى, – دەيدى وبلىستىق سوت وكىلى.

وقيعا بىلاي بولعان ەكەن: اقساي قالاسىندا تۇراتىن ءبىر جىگىت 2025 جىلعى 20 قىركۇيەكتەن 2026 جىلعى 23 قاڭتارعا دەيىنگى ارالىقتا قىز بالاعا بىرنەشە مارتە تەلەفون سوعىپ, حابارلاما جىبەرگەن. سونىڭ ىشىندە قورقىتۋ سيپاتىنداعى حابارلامالار دا بولعان. ءتىپتى جابىرلەنۋشىنىڭ تۇرعىلىقتى جانە جۇمىس ورنىنا بارىپ, سول جەردە سىرتىنان اڭدىپ كۇتكەن. وقيعا ءتىپتى ناسىرعا شاۋىپ, 2026 جىلعى 23 قاڭتاردا اڭدىپ ءجۇرىپ, دۇكەننەن شىققان جابىرلەنۋشىنىڭ قولىنان ەركىنەن تىس ۇستاپ, قاردىڭ ۇستىنە قۇلاتقان. ابىروي بولعاندا كومەك سۇراعان داۋىسقا قىزدىڭ ارىپتەستەرى كەلىپ, قۇتقارىپ قالعان. ءدال وسى ۋاقىتتا جىگىت ماس كۇيىندە بولعان ەكەن.

وسى ءىستى قاراعان ءبورلى اۋداندىق سوتى بۇل جىگىتتىڭ ارەكەتىن «جابىرلەنۋشىگە ەلەۋلى زيان كەلتىرگەن زاڭسىز قۋدالاۋ» دەپ تاپتى. قىلمىستىق ءىستى قاراۋ بارىسىندا سوتتالۋشى كىناسىن تولىق مويىندادى. پروكۋرور سوتتالۋشىعا 80 ساعات قوعامدىق جۇمىس تاعايىنداۋدى سۇرادى.

سوت ەر ادامنىڭ ارەكەتى ۇزاق ۋاقىتقا سوزىلعانىن, بۇل ارقىلى جەكە ادامنىڭ قازاقستان كونستيتۋتسياسى كەپىلدىك بەرگەن نەگىزگى بوستاندىعىنا قول سۇعىلعانىن اتاپ ءوتىپ, ءىس بويىنشا جينالعان دالەلدەر نەگىزىندە ونى كىنالى دەپ تانىدى.

ناتيجەسىندە, سوتتالۋشىعا جوعارىدا ايتىلعانداي 80 ايلىق ەسەپتىك كورسەتكىش مولشەرىندە ايىپپۇل تۇرىندەگى جازا تاعايىندالدى.

باتىس قازاقستان وبلىسى