اباي وبلىسىندا كوكتەمگى سۋ تاسقىنى كەزەڭىنە ازىرلىك بارىسى نازارعا الىندى. وزەن ارنالارى, بوگەتتەر مەن گيدروتەحنيكالىق قۇرىلىستاردىڭ جاعدايى تەكسەرىلىپ, ءوڭىر بيلىگىنە ناقتى تاپسىرما جۇكتەلدى.
پرەمەر-ءمينيستردىڭ ورىنباسارى قانات بوزىمباەۆ جۇمىس ساپارىمەن اباي وبلىسىنا بارىپ, كوكتەمگى سۋ تاسقىنىنا دايىندىق بارىسىن زەردەلەدى. ءوڭىر اكىمى بەرىك ۋاليمەن, توتەنشە جاعدايلار مينيسترلىگى مەن سۋ رەسۋرستارى جانە يرريگاتسيا مينيسترلىگى باسشىلىعىمەن بىرگە سۋ باسۋ قاۋپى بار اۋماقتارعا مونيتورينگ جۇرگىزىلدى.
جۇمىس بارىسىندا وزەن ارنالارى, گيدروتەحنيكالىق نىساندار, قورعانىش بوگەتتەرى مەن سۋ وتكىزۋ جۇيەلەرى قارالدى. سۋ باسۋ قاۋپى بار ەلدى مەكەندەردىڭ جاعدايى, قار جامىلعىسىنىڭ كولەمى مەن وزەندەردەگى گيدرولوگيالىق احۋال دا نازاردان تىس قالمادى.
ۆيتسە-پرەمەر سەمەي قالاسى مەن جارما, اباي, بورودۋليحا, اياگوز اۋداندارىنىڭ اۋماعىن اۋەدەن شولىپ شىقتى. ساپار اياسىندا اياگوز قالاسىنا, شار سۋ قويماسىنا بارىپ, اۋدان اكىمدەرىمەن كەزدەستى. جەرگىلىكتى بيلىك وكىلدەرى كوكتەمگى كەزەڭگە دايىندىق جونىندە ەسەپ بەردى.
قازىرگى دەرەككە قاراعاندا وبلىستاعى 64 ەلدى مەكەن سۋ تاسقىنى قاۋپى بار ايماققا جاتادى. ۇشەۋىندە قاۋىپ تولىق جويىلعان. تاعى 22 ەلدى مەكەندە تاۋەكەل دەڭگەيى تومەندەتىلگەن. ال 39 ەلدى مەكەندە تابيعي قاتەر ساقتالىپ وتىر.
الدىن الۋ شارالارى اياسىندا ينجەنەرلىك جۇمىستار جۇرگىزىلگەن. شامامەن 42 شاقىرىم قورعانىس بوگەتتەرى سالىندى ءارى نىعايتىلدى. جەتى شاقىرىمنان استام وزەن ارنالارى تازارتىلىپ, ءتورت شاقىرىم درەناج بەن سۋ بۇرۋ جۇيەلەرى رەتكە كەلتىرىلدى. جەرگىلىكتى بيلىك ماتەريالدىق-تەحنيكالىق ءارى قارجىلىق رەزەرۆتەردى جاساقتاۋعا كىرىسكەن. ەلدى مەكەندەردەن 275 مىڭ تەكشە مەتر قار شىعارىلدى. وزەندەردەگى مۇزدى جارۋ جۇمىستارى جالعاسىپ جاتىر.
ازاماتتىق قورعاۋ جۇيەسى كۇشەيتىلگەن دايىندىق رەجىمىنە كوشىرىلگەن. قازىرگى تاڭدا 1 436 ادام مەن 543 تەحنيكا بىرلىگى جۇمىلدىرىلعان.
«جالپى دايىندىق جۇمىستارى جۇرگىزىلىپ جاتىر. الايدا اۋەدەن شولۋ ناتيجەلەرى اۋا تەمپەراتۋراسىنىڭ كۇرت كوتەرىلۋى مەن قاردىڭ قارقىندى ەرۋى جاعدايىندا جەكەلەگەن ۋچاسكەلەردە احۋالدىڭ كۇردەلەنۋ قاۋپى ساقتالىپ وتىرعانىن كورسەتتى. وسىعان بايلانىستى وزەن ارنالارى مەن سۋ وتكىزۋ قۇرىلىستارىن ۋاقتىلى تازالاۋعا, تەحنيكا, سورعى جابدىقتارى مەن اۆاريالىق بريگادالاردىڭ دايىندىعىنا ەرەكشە نازار اۋدارۋ قاجەت. گيدرومەتەورولوگيالىق جاعداي وزگەرگەن كەزدە ارەكەت ەتۋ جەدەل بولۋى ءتيىس. جۇمىس الدىن الۋ قاعيداتى بويىنشا جۇرگىزىلۋى شارت», دەدى قانات بوزىمباەۆ.
وبلىس اكىمدىگىنە سۋ تاسقىنى قاۋپى بار اۋماقتاردا تاۋلىك بويى مونيتورينگ جۇرگىزۋ تاپسىرىلدى. ەلدى مەكەندەردەن قار شىعارۋ قارقىنىن ارتتىرۋ, گيدروتەحنيكالىق قۇرىلىستار مەن قورعانىس بوگەتتەرىنە قوسىمشا تەكسەرۋ ۇيىمداستىرۋ, ازاماتتىق قورعاۋ كۇشتەرىنىڭ تولىق ازىرلىگىن قامتاماسىز ەتۋ مىندەتتەلدى. ەۆاكۋاتسيا جوسپارلارىن جاڭارتۋ, ۋاقىتشا ورنالاستىرۋ پۋنكتتەرىنىڭ دايىندىعىن تەكسەرۋ, حالىقتى جەدەل اقپاراتتاندىرۋ ماسەلەسى دە نازارعا الىندى.
بەلگىلەنگەن مەرزىمدە اتالعان تاپسىرمالاردىڭ ورىندالۋى تۋرالى ۇكىمەتكە ناقتى ناتيجەلەرمەن جيناقتالعان اقپارات ۇسىنىلۋى كەرەك.