مۇز ايدىنىنداعى جاڭا ءۇمىت: مانەرلەپ سىرعاناۋشى دياس جيرەنباەۆ تۋرالى نە بىلەمىز؟

ميلان وليمپياداسىنىڭ چەمپيونى الەم بىرىنشىلىگىنە نەلىكتەن قاتىسپايدى؟

ميحايل شايدوروۆ ميلان تورىندەگى تورتجىلدىقتىڭ باستى باسەكەسىندە ەلىمىزدە مانەرلەپ سىرعاناۋ مەكتەبىنىڭ جوعارى دەڭگەيى قالىپتاسقانىن جارقىن جەڭىسىمەن ايقىندادى. دەسە دە, وليمپيادا چەمپيونى الەم بىرىنشىلىگىنە قاتىسپايدى. قازاقستاننىڭ مانەرلەپ سىرعاناۋ وداعى وعان سالماقتى سەبەپ بارىن اتاپ ءوتتى.

«2025 جىلدىڭ قاڭتار 2026 جىلدىڭ اقپان ايىنا دەيىنگى كەزەڭدە ميحايل شايدوروۆ الەم چەمپيوناتى, ازيا ويىندارى, ءتورت قۇرلىق چەمپيوناتى, گران-پري كەزەڭدەرى مەن فينالى, سونداي-اق وليمپيادا ويىندارىن قوسا العاندا اۋقىمدى 10 حالىقارالىق جارىسقا قاتىستى. بۇل – فيزيكالىق جانە پسيحولوگيالىق تۇرعىدان وتە ۇلكەن جۇكتەمە. ءبىز چەمپيونىمىزعا تولىققاندى دەمالىس بەرۋدى ءجون كوردىك. سونداي-اق ول وسى ۋاقىت ارالىعىندا ءتيىستى قالپىنا كەلتىرۋ جانە وڭالتۋ شارالارىنان وتەدى», دەپ ءتۇسىندىردى قازاقستان مانەرلەپ سىرعاناۋ قۇراماسىنىڭ باس باپكەرى اسەم قاسانوۆا.

پراگاداعى تارتىس تاجىريبەلى مانەرلەپ سىرعاناۋشىلار مەن جاس تالانتتار اراسىندا ءوربيدى

جىل سايىنعى ءداستۇرلى بىرىنشىلىككە الەمنىڭ 50 ەلىنەن 200-گە جۋىق ۇزدىك مانەرلەپ سىرعاناۋشى قاتىسادى. پراگادا ۇيىمداستىرىلاتىن «مۇزداعى باسەكەدە» تارتىس تاجىريبەلى سپورتشىلارمەن قاتار «جاس جۇلدىزدار» اراسىندا وربىمەك.  

ماسەلەن, ميلانداعى وليمپيادانىڭ كۇمىس جانە قولا جۇلدەگەرلەرى يۋما كاگياما مەن سيۋن ساتو, 8-ورىن العان اقش وكىلى يليا مالينين, سونداي-اق سالاداعى تاجىريبەلى مانەرلەپ سىرعاناۋشىلار ادام سياو حيم فا (فرانتسيا), دانيەل گراسسل (يتاليا), ماتتەو ريتستسو (يتاليا), دجەيسون براۋن (اقش) دا چەمپيوندىق اتاقتى يەلەنۋگە ءۇمىتتى.

ادۋىندى قارسىلاستارمەن ايقاسقا قازاقستان اتىنان 2003 جىلى تۋعان تاراز قالاسىنىڭ تۋماسى دياس جيرەنباەۆ تۇسەدى. دياس جيرەنباەۆتىڭ قولىنا حالىقارالىق كونكيشىلەر وداعى ۇيىمداستىراتىن باسەكەدە ونەر كورسەتۋ جولداماسى جايدان-جاي بەرىلگەن جوق. ول گەرمانيادا وتكەن حالىقارالىق NRW Trophy 2025 تۋرنيرىندە ەلىمىزدى لايىقتى تۇردە تانىستىرا الدى. سپورتشى وسى سىندا 4-ورىنعا يە بولىپ, ماڭىزدى تەحنيكالىق مينيمۋمدى ورىندادى.

نادەجدا پارەتسكايا داۋى: ءبىزدىڭ تورەشى شايدوروۆ پەن سامودەلكينانىڭ ونەرىن ادەيى تومەن باعالادى ما؟

بۇل ناتيجە وعان پراگادا وتەتىن الەم چەمپيوناتىندا ونەر كورسەتۋگە مۇمكىندىك سىيلادى. بۇگىندە حالقىمىز داڭقتى مانەرلەپ سىرعاناۋشى دەنيس تەن مەن قىسقى وليمپيادا ويىندارىندا ەلىمىزگە 32 جىلدان كەيىن التىن مەدال تارتۋ ەتكەن ميحايل شايدوروۆتىڭ ءىزىن جالعاۋشى تالانت تۋرالى نە بىلەدى؟

مۇز ايدىنعا العاش رەت 9 جاسىندا باردى 

دياس مانەرلەپ سىرعاناۋمەن سالىستىرمالى تۇردە كەش – 9 جاسىندا استانا قالاسىنداعى وقۋشىلار سارايىندا اينالىسا باستاعان. جاس دارىننىڭ العاشقى باپكەرى – ۆلاديمير ۆيكتوروۆيچ رۋدي.

ال الەم چەمپيوناتىنا قاتىسۋعا مۇمكىندىك العان مانەرلەپ سىرعاناۋشىنى 2021 جىلدان باستاپ الماتىداعى Denis Ten Academy اكادەمياسىندا وكسانا تەن باپتاپ ءجۇر.

دياس جيرەنباەۆ جىل وتكەن سايىن مۇزداعى كورسەتكىشىن جاقسارتىپ كەلەدى. ول 2024-2025 جىلعى ماۋسىمدا سپورت شەبەرلەرى اراسىندا مانەرلەپ سىرعاناۋدان وتكەن قازاقستان چەمپيوناتىندا ءبىرىنشى تۇعىردان كورىنسە, جالپى ەل بىرىنشىلىگىندە 4 رەت كۇمىس, 2 رەت قولا مەدال قانجىعالاعان. وتانداسىمىز حالىقارالىق ارەنادا دا ءساتتى ونەر كورسەتىپ, ISU (حالىقارالىق كونكيشىلەر وداعى) قامقورلىعىمەن وتەتىن كوپتەگەن حالىقارالىق تۋرنيرلەردە باق سىناپ ءجۇر. 2022 جىلدان بەرى قازاقستان اتىنان ءتورت قۇرلىق چەمپيوناتىندا ونەر كورسەتىپ كەلەدى. 2025 جىلى حاربيندە وتكەن قىسقى ازيا ويىندارى مەن قىسقى ۋنيۆەرسيادادا باق سىنادى. سونداي-اق ول ISU Challenger Series تۋرنيرىنە تۇراقتى تۇردە قاتىسىپ, شەبەرلىگىن شىڭداپ كەلەدى.ايتا كەتەيىك, دياس حالىقارالىق جارىستاردان بوس قايتىپ جۇرگەن جوق. ماسەلەن, 2022 جىلعى Denis Ten Memorial Challenge تۋرنيرىندە كۇمىس جۇلدە يەلەنسە, 2024 جىلى ليۋكسەمبۋرگتە وتكەن Coupe du Printemps 2024 حالىقارالىق ءتۋرنيرىنىڭ جەڭىمپازى اتاندى. 2023 جىلعى Denkova-Staviski Cup 2023 جانە 2022 جىلعى Sofia Trophy 2022 حالىقارالىق تۋرنيرلەرىن قولا مەدالمەن قورىتىندىلادى.

مانەرلەپ سىرعاناۋشىنىڭ كومانداسى قازىرگى ۋاقىتتا دياس جيرەنباەۆتىڭ پراگادا وتەتىن الەم چەمپيوناتىنا قىزۋ دايىندالىپ جاتقانىن جەتكىزدى.