اقتوبەدە وتكەن جىلدىڭ قاراشاسىندا بولعان قاندى وقيعاعا قاتىستى قىلمىستىق ءىس توقتاتىلدى. مامانداندىرىلعان اۋدانارالىق قىلمىستىق سوت كۇدىكتىنىڭ قايتىس بولۋىنا بايلانىستى قىلمىستىق قۋدالاۋدى دوعارۋ تۋرالى قاۋلى شىعاردى, دەپ حابارلايدى Egemen.kz.
اقتوبە وبلىسىنىڭ مامانداندىرىلعان اۋدانارالىق قىلمىستىق سوتى تاراتقان مالىمەتكە سايكەس, 2025 جىلعى 20 قاراشادا ەر ادام جۇبايىمەن بىرگە بوگوسلوۆ تاسجولى بويىمەن كەلە جاتقان. جول ۇستىندە ەرلى-زايىپتىلاردىڭ اراسىندا جانجال تۋىنداعان.
سوتتا انىقتالعانداي, كۇدىكتى كولىكتى توقتاتىپ, قولىنا ءاسۇي پىشاعىن الىپ, ارتقى ورىندىققا اۋىسىپ وتىرعان. ول ايەلىن ەتپەتىنەن جاتقىزىپ, سول اياعىمەن ارقاسىنان باسىپ تۇرىپ, مويىن تۇسىنا بىرنەشە رەت پىشاق سالعان. العان جاراقاتتارى سالدارىنان ايەل وقيعا ورنىندا كوز جۇمعان.
وسىدان كەيىن ەر ادام جولاي ارقان ساتىپ الىپ, وندىرىستىك تسەح اۋماعىنا بارعان. قوندىرعىنىڭ ۇستىنە شىعىپ, وزىنە قول سالعان. مارقۇمداردىڭ ارتىندا 5 بالا قالدى.
شىمكەنتتە جول اپاتىنان كەيىنگى كىسى ءولتىرۋ وقيعاسىنا قاتىستى كۇدىكتىلەر ۇستالدى
اتالعان دەرەك بويىنشا ءىس قىلمىستىق كودەكستىڭ 99-بابى 1-بولىگى («ادام ءولتىرۋ») بويىنشا تىركەلگەن. الايدا كۇدىكتىنىڭ قايتىس بولۋىنا بايلانىستى ونىڭ قورعاۋشىسى ءىستى توقتاتۋ تۋرالى ءوتىنىشحات بەرگەن. پروكۋرور بۇل ءوتىنىشتى قولداعان.
سوت قىلمىستىق-پروتسەستىك كودەكستىڭ 35-بابىنا سايكەس, كۇدىكتىنىڭ قايتىس بولۋىنا بايلانىستى قىلمىستىق قۋدالاۋدى توقتاتۋ جونىندە قاۋلى شىعاردى.
قاۋلى ازىرگە زاڭدى كۇشىنە ەنگەن جوق.
نۇراي سەرىكبايدىڭ ءىسى «اسا قاتىگەزدىكپەن كىسى ءولتىرۋ» بابىنا وزگەرتىلدى