مەملەكەت باسشىسىنىڭ تىكەلەي تاپسىرماسىمەن قولعا الىنعان جەكە تۇلعالارعا ارنالعان اۆتوليزينگ باعدارلاماسى بۇگىندە وتاندىق اۆتونارىقتاعى ەڭ كوپ تالقىلاناتىن تاقىرىپتىڭ بىرىنە اينالدى. وتكەن جىلدىڭ جەلتوقسانىندا ىسكە قوسىلعان اۆتوليزينگ تەتىگى نەسيەگە بالاما رەتىندە ۇسىنىلعانىمەن, ازىرگە جاپپاي سيپات الا قويعان جوق. ازاماتتاردىڭ قىزىعۋشىلىعى بار, الايدا قۇقىقتىق تۇيتكىلدەر قارجى قۇرالىن تولىق ىسكە قوسۋعا كەدەرگى كەلتىرىپ وتىر, دەپ جازادى Egemen.kz.
قازاقستاننىڭ ونەركاسىپتىك ينۆەستورلار وداعىنىڭ پرەزيدەنتى قايرات ەلامانوۆتىڭ ايتۋىنشا, ۇكىمەتپەن بىرلەسىپ اۋقىمدى دايىندىق جۇمىستارى جۇرگىزىلگەن. ىشكى ساۋدا قاعيدالارىنا وزگەرىستەر ەنگىزىلىپ, مەملەكەتتىك ورگانداردىڭ قاجەتتى تۇسىندىرمەلەرى الىنعان.
سالا وكىلدەرىنىڭ سوزىنشە, باعدارلاما توقتاپ تۇرعان جوق. ىسكە قوسۋ جۇمىستارى وتكەن جىلدىڭ سوڭىنان بەرى جالعاسىپ كەلەدى. دەگەنمەن ءبىر ماسەلە تۇبەگەيلى شەشىلمەي وتىر.
قايرات ەلامانوۆ اتاپ وتكەندەي, ەگەر كولىكتى ليزينگ ارقىلى راسىمدەگەن جۇرگىزۋشى جول قوزعالىسى ەرەجەسىن بۇزسا, ايىپپۇل اۆتوماتتى تۇردە كولىك يەسى رەتىندە ليزينگتىك كومپانياعا كەلەدى. ايىپپۇل ۋاقىتىندا تولەنبەگەن جاعدايدا كومپانيانىڭ شوتتارى بۇعاتتالۋى مۇمكىن. بۇل – ءارى كومپانيا, ءارى كليەنت ءۇشىن تاۋەكەل. ءدال وسى قۇقىقتىق ولقىلىق اۆتوليزينگتىڭ بەلسەندى دامۋىن تەجەپ وتىر.
سوعان قاراماستان باعدارلاماعا قىزىعۋشىلىق بار. ديلەرلىك ورتالىقتار, وندىرۋشىلەر مەن ديستريبيۋتورلار ازاماتتاردان وتىنىشتەردى قابىلداپ جاتىر.
اۆتوليزينگ باعدارلاماسى كوپشىلىكتىڭ سۇرانىسىن وتەي الا ما؟
ماڭىزدى جايت – اۆتوليزينگ نارىقتىق تالاپتارمەن جۇمىس ىستەيدى, ياعني بۇرىنعى سۋبسيديالانعان اۆتونەسيە باعدارلامالارىنداعىداي كەپىلدەندىرىلگەن جەڭىلدىكتەر قاراستىرىلماعان. 24.kz مالىمەتىنشە, بۇل قۇرالدىڭ تارتىمدىلىعى ونىڭ شارتتارىنا, مولشەرلەمەسىنە جانە يكەمدىلىگىنە بايلانىستى بولماق.
اۆتوساراپشى الەكسەي الەكسەەۆتىڭ پىكىرىنشە, ليزينگ كولىك ساتىپ الۋدىڭ قوسىمشا ءارى ءتيىمدى تاسىلىنە اينالۋى ءتيىس. ونىڭ ايتۋىنشا, ەگەر ليزينگ شىنىمەن ءتيىمدى بولسا, اۆتوساتۋ كولەمى ارتىپ, ەلدەگى اۆتوپارك جاڭارادى.
ساراپشىلاردىڭ باعالاۋىنشا, اۆتوليزينگ نارىقتان ءوز ورنىن تابا الادى. الايدا ونىڭ كەڭ تارالۋى ءۇشىن:
قۇقىقتىق ولقىلىقتاردى جويۋ; راسىمدەردى ناقتىلاۋ; قارجىلىق تۇراقتىلىقتى كۇشەيتۋ قاجەت.قىسقاشا ايتقاندا, اۆتوليزينگتىڭ نەسيەگە تولىققاندى بالاماعا اينالۋى قۇقىقتىق ماسەلەلەردىڭ قانشالىقتى جەدەل شەشىلەتىنىنە بايلانىستى.
اۆتوليزينگ باعدارلاماسى ىسكە قوسىلىپ, مولشەرلەمە تومەندەتىلدى