جەتى جىلدا نەگىزگى كاپيتالعا سالىنعان ينۆەستيتسيا كولەمى ەكى ەسەگە جۋىق ءوستى

«كوپتەگەن سىن-قاتەرگە جاۋاپ رەتىندە ءبىرىنشى كەزەكتە مەملەكەتىمىزدىڭ ۇزاقمەرزىمدى ورنىقتىلىعىن نىعايتۋدى ماقسات ەتكەن اۋقىمدى رەفورمالار جۇزەگە اسىرىلدى. پرەزيدەنت توقاەۆ جالاڭ ۇران مەن پوپۋليزمگە جول بەرگەن جوق, ۋاقىتشا ناتيجەلەرگە دە ەشقاشان يەك ارتقان ەمەس. مەملەكەت باسشىسى حالىقتىڭ ءال-اۋقاتىن جاقسارتۋعا, ەكونوميكالىق جانە ساياسي تۇراقتىلىقتى قامتاماسىز ەتۋگە باعىتتالعان ەلدىكتىڭ مىزعىماس بەرىك تۇعىرىن قالىپتاستىرۋ جولىندا ەڭبەك ەتىپ كەلەدى», دەدى ۇكىمەت باسشىسى.

2025 جىلى الەمدىك ەكونوميكانىڭ ءوسىمى 3,3%-دى قۇراسا, قازاقستاندا ىشكى جالپى ءونىم 6,5%-عا ارتقان. جەتى جىل ىشىندە نومينالدى ءىجو 1,7 ەسەگە ۇلعايىپ, 2019 جىلعى 181,7 ملرد دوللاردان 2025 جىلى 305,9 ملرد دوللارعا جەتتى. جان باسىنا شاققانداعى ءىجو 9,8 مىڭ دوللاردان 15 مىڭ دوللارعا دەيىن ءوستى.

پرەزيدەنت رەفورمالارى: ءبىلىم مەن عىلىمدى قارجىلاندىرۋ بەس ەسەدەن استام ءوستى

ەكونوميكا قۇرىلىمىندا دا وزگەرىس بار. بۇرىن ءوسىم كوبىنە سىرتقى شيكىزاتتىق كونيۋنكتۋراعا تاۋەلدى بولسا, قازىر شيكىزاتتىق ەمەس سەكتورلار مەن ىشكى سۇرانىس نەگىزگى قوزعاۋشى كۇشكە اينالعان. وڭدەۋ ونەركاسىبى, قۇرىلىس, ساۋدا, كولىك جانە قىزمەت كورسەتۋ سالالارى وسىمگە ەلەۋلى ۇلەس قوسىپ وتىر.

وڭدەۋ ونەركاسىبىنىڭ كولەمى 2019 جىلعى 11,5 ترلن تەڭگەدەن 2025 جىلى 30,63 ترلن تەڭگەگە دەيىن ءوسىپ, 2,5 ەسەدەن استام ۇلعايدى. ءىجو قۇرىلىمىنداعى ۇلەسى 11,4%-دان 12,7%-عا ارتسا, كەن ءوندىرۋشى سەكتوردىڭ ۇلەسى 14,5%-دان 12%-عا دەيىن قىسقارعان.

وڭىرلەردە جاڭا وندىرىستەر ىسكە قوسىلدى. قوستاناي وبلىسىندا KIA اۆتوكولىكتەرىن شىعاراتىن جانە شويىن قۇيۋ زاۋىتتارى جۇمىسىن باستادى. قاراعاندى وبلىسىندا تۇرمىستىق تەحنيكا مەن اۆتوموبيل شينالارى وندىرىلەدى. اتىراۋ وبلىسىندا پوليپروپيلەن ءوندىرىسى جولعا قويىلدى. الماتى وبلىسىندا ۆولفرام كونتسەنتراتى شىعارىلا باستادى. پاۆلودار وبلىسىندا تەمىرجول تەحنيكاسىنا ارنالعان قوسالقى بولشەكتەر ءوندىرىسى ىسكە قوسىلسا, شىمكەنتتە اليۋميني قاپتاما ءوندىرىسى مەن باعالى مەتالداردى قايتا وڭدەۋ كاسىپورىندارى اشىلدى. بۇل جوبالار ونداعان ءىرى زاۋىت پەن مىڭداعان جۇمىس ورنىن قامتيدى.

بەكتەنوۆ: «تازا قازاقستان» باستاماسى قازاقستاندىقتار تاراپىنان قولداۋ تاپتى

قۇرىلىس سالاسى دا تۇراقتى ءوسىم كورسەتىپ كەلەدى. تەك وتكەن جىلدىڭ وزىندە 20 ملن شارشى مەتردەن استام تۇرعىن ءۇي پايدالانۋعا بەرىلدى. بۇل كورسەتكىش پاۆلودار مەن قوستاناي قالالارىنىڭ جالپى تۇرعىن ءۇي قورىنان اسىپ تۇسەدى.

حالىقارالىق ۆاليۋتا قورى دەرەكتەرىنە سايكەس, قازاقستان الەمدەگى ءىرى 50 ەكونوميكانىڭ قاتارىنا ەندى جانە ورتاشا جىلدىق ءوسىم قارقىنى بويىنشا العاشقى بەستىكتىڭ ىشىندە تۇر. ال World Competitiveness Center جاريالاعان World Competitiveness Ranking رەيتينگىندە ەلىمىز جاھاندىق باسەكەگە قابىلەتتىلىك يندەكسى بويىنشا 34-ورىنعا يە بولدى.

ماقالادا ەكونوميكانىڭ ء«بىر سالاعا بايلانىپ قالعان» مودەلىنەن ارىلعانى ايتىلعان. كەن ءوندىرۋ سەكتورىنداعى ۋاقىتشا قۇبىلۋلار ماكروەكونوميكالىق تۇراقتىلىققا ايتارلىقتاي اسەر ەتپەيدى. بۇل دامۋدىڭ تەڭگەرىمدى ءارى ورنىقتى ۇلگىسىنە بەت بۇرعاندى كورسەتەدى.

ولجاس بەكتەنوۆ: جاڭا كونستيتۋتسيا – بولاشاقتىڭ ستراتەگيالىق تاڭداۋى

پرەمەر-ءمينيستردىڭ ايتۋىنشا, قاسىم-جومارت توقاەۆ جۇرگىزىپ وتىرعان ينۆەستيتسيالىق ساياسات ەكونوميكانى جاڭعىرتۋدىڭ نەگىزگى قۇرالدارىنىڭ بىرىنە اينالعان. جەتى جىل ىشىندە نەگىزگى كاپيتالعا سالىنعان ينۆەستيتسيالار 12,6 ترلن تەڭگەدەن 22,7 ترلن تەڭگەگە دەيىن ءوستى. قارجىنىڭ باسىم بولىگى وڭدەۋ ونەركاسىبىنە, ينفراقۇرىلىمعا, ەنەرگەتيكاعا, لوگيستيكا مەن اگروونەركاسىپ كەشەنىنە باعىتتالعان.

وسىلايشا, سوڭعى جەتى جىلدا جۇزەگە اسقان رەفورمالار ەكونوميكانىڭ ساپالى وزگەرۋىنە جانە ۇزاقمەرزىمدى ورنىقتىلىقتىڭ نىعايۋىنا نەگىز قالاپ وتىر.