پرەمەر-مينيستر ولجاس بەكتەنوۆ «ەگەمەن قازاقستان» گازەتىندە جاريالانعان «جاسامپازدىققا جەتەلەگەن جەتى جىل» اتتى ماقالاسىندا مەملەكەت باسشىسى جاريالاعان «تازا قازاقستان» باستاماسىنىڭ جالپىۇلتتىق يدەياعا ۇلاسقانىنا توقتالدى, دەپ جازادى Egemen.kz.
ونىڭ ايتۋىنشا بۇكىل ەل بويىنشا ميلليونداعان ادام ەكولوگيالىق اكتسيالارعا شىعىپ, تابيعي ايماقتاردى قوقىستان تازارتۋ, كوگالداندىرۋ, قالپىنا كەلتىرۋ جۇمىستارىن جۇرگىزىپ جاتىر. جۇزدەگەن مىڭ توننا قوقىس جينالىپ, ميلليونداعان اعاش كوشەتتەرى وتىرعىزىلدى. وسى يدەيانىڭ ارقاسىندا ەكولوگيالىق مادەنيەت قالىپتاسىپ, تازالىق پەن ءتارتىپ كۇندەلىكتى ءومىر سالتىنا اينالدى.
«پرەزيدەنت «اركىم وزىنەن باستاۋى كەرەك» قاعيداتىنا ءوز تاجىريبەسىمەن ۇلگى كورسەتىپ كەلەدى. مەملەكەت باسشىسى قورشاعان ورتانىڭ عانا ەمەس, ادامنىڭ وي-ساناسىنىڭ تازالىعىنا دا ايرىقشا ءمان بەرەدى. بۇل باستاما ەل ازاماتتارىنىڭ, اسىرەسە جاستاردىڭ تاراپىنان قولداۋ تاۋىپ, اۋقىمدى قوزعالىسقا اينالدى», دەدى ولجاس بەكتەنوۆ.
«تازا قازاقستان» جاڭا كونستيتۋتسيانىڭ وزەگىنە اينالماق
ۇكىمەت باسشىسى سونداي-اق ەكولوگيالىق كۇن تارتىبىندە مەملەكەت باسشىسى سۋ قاۋىپسىزدىگى ماسەلەسىنە باسا نازار اۋدارىپ وتىرعانىن ايرىقشا اتاپ ءوتتى.
«پرەزيدەنت تاپسىرماسى بويىنشا قازىر 20 جاڭا سۋ قويماسىن سالۋ, كەمىندە 15 مىڭ شاقىرىم يرريگاتسيالىق كانالدى رەكونسترۋكتسيالاۋ باعدارلاماسى جۇزەگە اسىرىلىپ كەلەدى. ەلىمىزدەگى كولەمدى سۋ ايدىندارى – كاسپي مەن ارال تەڭىزدەرىن ساقتاپ قالۋ ماسەلەسى ءبىرىنشى كەزەككە شىقتى. ەلىمىزدە اتالعان اكۆاتوريانىڭ وزەكتى ماسەلەلەرىن تەرەڭ زەردەلەۋ ءۇشىن كاسپي تەڭىزىنىڭ قازاق عىلىمي-زەرتتەۋ ينستيتۋتى قۇرىلدى. جيناقتاپ كەلگەندە بۇل ەكولوگيالىق قاۋىپسىزدىك پەن تابيعاتتى تۇراقتى پايدالانۋدىڭ كەشەندى ءتاسىلىن قالىپتاستىرادى», دەدى پرەمەر-مينيستر.
جاھاندىق سۋ رەسۋرستارى تاقىرىبىنداعى ماڭىزدى ماسەلەلەردىڭ ءبىرى – مۇزدىقتاردى ساقتاپ قالۋ. ساراپشىلاردىڭ بولجامىنشا, 2100 جىلعا قاراي ورتالىق ازياداعى مۇزدىقتار كولەمى ايتارلىقتاي كىشىرەيەدى. بەكتەنوۆ پرەزيدەنتتىڭ وسى ماسەلەلەرگە دە ايرىقشا نازار اۋدارىپ وتىرعانىن ايتتى.
«قاسىم-جومارت توقاەۆ حالىقارالىق دەڭگەيدە «سۋ مۇنارالارى سەرىكتەستىگىن» قۇرۋ باستاماسىن كوتەردى, ونىڭ ماقساتى – مۇزدىقتاردى زەرتتەۋ ءارى قورعاۋ ءۇشىن جاھاندىق زەرتتەۋ ورتالىقتارىنىڭ كۇش-جىگەرىن بىرىكتىرۋ, سول ارقىلى گلياتسيولوگيالىق عىلىمدى قولداۋدى ورتاق ءبىر جۇيەگە كەلتىرۋ», دەدى ول.
«تازا قازاقستان»: اباي ۋنيۆەرسيتەتىنىڭ ستۋدەنتتەرى ىلە-الاتاۋ پاركىمەن ەكولوگيالىق جوبالاردى ىسكە اسىرادى