پرەمەر-مينيستر ولجاس بەكتەنوۆ پەن ازيا دامۋ بانكىنىڭ (ادب) پرەزيدەنتى ماساتو كاندا پرەزيدەنت قاسىم-جومارت توقاەۆ بەلگىلەگەن ستراتەگيالىق باعىتتار شەڭبەرىندە ينۆەستيتسيالىق ىنتىماقتاستىقتى دامىتۋ مەن ينفراقۇرىلىمدىق جانە الەۋمەتتىك ماڭىزى بار جوبالاردى قارجىلاندىرۋ ماسەلەلەرىن تالقىلادى.
كەزدەسۋ بارىسىندا كولىك جانە لوگيستيكا, تج, تسيفرلىق تەحنولوگيالاردى دامىتۋ, تۇرعىن ءۇي نارىعى, «جاسىل» قارجىلاندىرۋ باعىتىنداعى جوبالار جونىندە ءسوز بولدى. سونداي-اق جاساندى ينتەللەكت, داتا-ورتالىقتار سالۋ, تالشىقتى-وپتيكالىق ماگيسترالدار جۇرگىزۋ, كولىك دالىزدەرى مەن كەدەندىك راسىمدەردى تسيفرلاندىرۋ سالاسىنداعى ىنتىماقتاستىقتى دامىتۋ الەۋەتى تۋرالى اتاپ ءوتىلدى. قاراعاندىدا كادرلار دايارلاۋ جانە عىلىمي زەرتتەۋلەر جۇرگىزۋ ءۇشىن 300 توسەكتىك ورىنعا ارنالعان ۋنيۆەرسيتەتتىك اۋرۋحانا سالۋ بويىنشا ءمجا جوباسىن جۇزەگە اسىرۋ بارىسى قارالدى.
پرەمەر-مينيستر مەملەكەت باسشىسى قاسىم-جومارت توقاەۆ قازاقستاننىڭ ينفراقۇرىلىمدى جاڭعىرتۋ جونىندەگى نەگىزگى ارىپتەستەرىنىڭ ءبىرى – ازيا دامۋ بانكىمەن جان-جاقتى ءوزارا ءىس-قيمىلعا ەرەكشە ءمان بەرەتىنىن اتاپ ءوتتى. ىنتىماقتاستىق ساپالى وسىمگە جانە حالىقتىڭ ءال-اۋقاتىن ارتتىرۋعا باسا نازار اۋدارا وتىرىپ, ەكونوميكالىق دامۋدى ترانسفورماتسيالاۋعا باعىتتالعان.
ازيا دامۋ بانكىنىڭ پرەزيدەنتى ماساتو كاندا قارجى سەكتورىنىڭ تۇراقتىلىعىن ارتتىرۋدى قوسا العاندا, ەلىمىزدىڭ قۇرىلىمدىق رەفورمالار بويىنشا جۇرگىزىپ جاتقان جۇمىسىن جوعارى باعالادى, سونداي-اق ەكونوميكا سەكتورلارىن اۋقىمدى تۇردە تسيفرلاندىرۋدى قولداۋعا مۇددەلى ەكەنىن ءبىلدىردى.
ۇكىمەت پەن ازيا دامۋ بانكى اراسىندا 2026–2029 جىلدار ارالىعىندا جالپى سوماسى شامامەن 5,5 ملرد دوللار بولاتىن 15 كەلەشەگى زور جوبانى جۇزەگە اسىرۋ بويىنشا ءوزارا تۇسىنىستىك تۋرالى مەموراندۋمعا قول قويىلدى. قۇجات ەكونوميكادا جاڭا اۋقىمدى جوبالاردى جۇزەگە اسىرۋ ءۇشىن مۇمكىندىك اشادى. اتاپ ايتقاندا, وڭىرلىك ءوزارا بايلانىس, تابيعي اپاتتارعا توزىمدىلىكتى ارتتىرۋ, سۋ رەسۋرستارىن باسقارۋ, تكش, تۇرعىن ءۇي نارىعىن دامىتۋ جانە تاعى دا باسقا باعىتتار بويىنشا باستامالار جوسپارلانعان. سونداي-اق ادب جەكە سەكتوردى, ونىڭ ىشىندە اوك, كولىك جانە لوگيستيكا سياقتى باسقا دا سالالارداعى جوبالاردى قارجىلاندىرۋدى جالعاستىرادى.
سونىمەن قاتار «قازاۆتوجول» ۇك» اق پەن ازيا دامۋ بانكى اراسىندا سارىاعاش قالاسىن اينالىپ وتەتىن, ۇزىندىعى 102 شاقىرىم بولاتىن اينالما جول سالۋ جوباسى بويىنشا كەلىسىمشارتقا قول قويىلدى. اتالعان جول ب.قونىسباەۆ اتىنداعى وتكىزۋ پۋنكتى ارقىلى وزبەكستانعا شىعۋدى قامتاماسىز ەتەدى. جاڭا جول ترانزيتتىك اعىندى ەلدى مەكەننەن تىس جەرلەرگە شىعارۋعا مۇمكىندىك بەرەدى, اۆتوموبيل قاتىناسىن جەدەلدەتەدى جانە قازاقستان مەن وزبەكستان اراسىنداعى ساۋدانىڭ تيىمدىلىگىن ارتتىرادى.