تاياۋ شىعىستا اسكەري-ساياسي احۋالدىڭ كۇرت شيەلەنىسۋىنە بايلانىستى سىرتقى ىستەر مينيسترلىگى قۇزىرلى مەملەكەتتىك ورگاندارمەن جانە شەت مەملەكەتتەردىڭ بيلىك قۇرىلىمدارىمەن تاۋلىك بويى بايلانىس ورناتىپ, جاعدايدى ءجىتى باقىلاپ وتىر, دەپ جازادى Egemen.kz.
وسىعان وراي ەلىمىزدىڭ شەتەلدەگى ديپلوماتيالىق مەكەمەلەرى كۇشەيتىلگەن جۇمىس رەجيمىنە كوشتى. وتانداستارعا قاجەتتى كونسۋلدىق-قۇقىقتىق كومەك كورسەتىلىپ جاتىر. قاقتىعىس ايماعىندا جانە وعان ىرگەلەس ەلدەردە, سونداي-اق ترانزيتتىك اۋماقتاردا جۇرگەن ازاماتتاردىڭ تىزىمدەرى ۇنەمى جاڭارتىلىپ وتىرادى. مەسسەندجەرلەر ارقىلى جەدەل چاتتار ىسكە قوسىلىپ, ازاماتتاردىڭ سۇراقتارىنا جاۋاپ بەرىلىپ, ەلدەگى احۋال جونىندە ناقتى اقپارات پەن ۇسىنىستار جولدانىپ جاتىر.
يراندا الي حامەنەيدىڭ ورنىنا ۋاقىتشا كوشباسشى تاعايىندالدى
مينيسترلىكتىڭ وزىندە جانە شەتەلدەگى مەكەمەلەرىندە شۇعىل بايلانىس جەلىلەرى اشىلعان. قاقتىعىس ايماعىندا جۇرگەن قازاقستاندىقتاردىڭ ناقتى سانى تۋرالى مالىمەت جيناقتالىپ جاتىر. بۇل رەتتە ترانزيتتىك ايماقتارداعى ازاماتتاردىڭ قوزعالىسى ءجيى وزگەرەتىندىكتەن, ولاردىڭ ناقتى سانىن ءدال ايتۋ قيىن ەكەنى دە اتاپ ءوتىلدى.
ديپلوماتيالىق وكىلدىكتەردىڭ قىزمەتكەرلەرى تۋريستىك كومپانيالارمەن بىرلەسىپ, اۋەجايلار مەن ترانزيتتىك ايماقتاردا قالعان ازاماتتاردى ۋاقىتشا ورنالاستىرۋ, باعىت-باعدار بەرۋ ماسەلەلەرىندە قولداۋ كورسەتىپ وتىر. سونىمەن قاتار قازاقستان ازاماتتارىن قاۋىپتى ايماقتاردان شىعارۋ جولدارى مەن باعىتتارى دا پىسىقتالىپ جاتىر.
يران توڭىرەگىندەگى جاعداي: مۇناي نەگە قىمباتتادى؟
مينيسترلىك قوسىمشا تۇسىندىرمەلەر مەن وزەكتى اقپاراتتى رەسمي رەسۋرستار ارقىلى, سونداي-اق Kaspi Travel قوسىمشاسىنا جىبەرىلەتىن حابارلامالار ارقىلى تاراتىپ وتىراتىنىن حابارلادى. ازاماتتارعا سابىر ساقتاپ, جەرگىلىكتى بيلىك ورگاندارىنىڭ تالاپتارى مەن ۇسىنىمدارىن ورىنداۋ, قاتەرلى ايماقتاردان اۋلاق بولۋ جانە ەنگىزىلگەن شەكتەۋلەرگە تۇسىنىستىكپەن قاراۋ جونىندە ۇندەۋ جاسالدى.
ۇلىبريتانيا, گەرمانيا جانە فرانتسيا يرانعا ەسكەرتۋ جاسادى
قازىر قازاقستان ازاماتتارى اراسىندا زارداپ شەككەندەر تۋرالى اقپارات تىركەلگەن جوق. جاعداي وزگەرگەن جاعدايدا ءتيىستى مالىمەت جەدەل تۇردە جاريالانادى. وسىعان بايلانىستى سىرتقى ىستەر مينيسترلىگى مەن شەتەلدەگى مەكەمەلەردىڭ رەسمي حابارلامالارىن مۇقيات قاداعالاۋ ۇسىنىلادى.