قىتايدىڭ حاينان ارالىندا الەمگە تانىمال «نامىس دودا» سپورتتىق-تانىمدىق تەلەشوۋىنىڭ تۇسىرىلىمدەرى ءوتتى. ال ماۋسىمنىڭ باسىندا حايكوۋ قالاسىندا (حاينان ارالىنىڭ اكىمشىلىك ورتالىعى) الەمگە تانىمال «نامىس دودا» سپورتتىق شوۋ-سايىسى باستالدى.
قازاقستاندىق سپورتشىلاردىڭ ءبىر توبى ءارتۇرلى سپورت ءتۇرلەرى بويىنشا الەمدىك سپورتتىق-تانىمدىق تەلەشوۋ ويىنىنا قاتىسۋ ءۇشىن قىتايعا جول ءجۇرىپ كەتتى. وسى جىلى ويىنعا قىتاي, ۆەنگريا, فرانتسيا, الجير وكىلدەرى قاتىسۋدا. بۇل رەتتە, قازاقستان 2007 جىلى 4-ءشى ورىندى, 2008 جىلى 2-ءشى جۇلدەنى, 2012 جىلى ويىنداردىڭ باس جۇلدەسى – 1-ءشى ورىندى يەلەنگەنىن ايتا كەتكەن ءجون.
ەسكە سالا كەتەيىك, ءاربىر قاتىسۋشى ەلدەن وعان تانىمال تۇلعالار: سپورت تۇرلەرى بويىنشا الەم چەمپيوندارى, ەسترادا جۇلدىزدارى قاتىسادى. قازاقستاندىق قۇرامانىڭ باس باپكەرى – ەرەجەسىز جەكپە-جەك بويىنشا ءۇش دۇركىن الەم چەمپيونى, ەۋروپا مەن ازيانىڭ چەمپيونى, ەرەجەسىز جەكپە-جەك بويىنشا الەم كۋبوگىنىڭ يگەرى ارداق نازاروۆ.
ءاربىر باعدارلامادا ەسترادا جۇلدىزدارىنىڭ اراسىنان قاتىسۋشىلاردى باپتايتىن كوماندا كاپيتاندارى تاڭدالادى. قاتىسۋشىلارعا جانكۇيەر بولۋ ءۇشىن بىرقاتار قازاقستاندىق ەسترادا جۇلدىزدارى جولعا شىقتى: قازاقستاننىڭ ەڭبەك سىڭىرگەن ءارتىسى مايرا ءىلياسوۆا, جەڭىس ىسقاقوۆا, «مۋزارت» توبى, ايتىسكەر-اقىن تورەعالي تورەالى, ماقپال يسابەكوۆا, گۇلنۇر ورازىمبەتوۆا, رۇستەم نۇرجىگىت, بەيبىت قۇشقاليەۆ, «دەنار» توبى, اكتريسا جانە ءانشى ايگۇل يمانباەۆا, اكتريسا اسەل ساعاتوۆا, ءانشى اسحات تارعىنوۆ, اقىلبەك جەمەنەي, جۇرگىزۋشى نۇرحان قادىرباەۆ, تەلەجۇرگىزۋشى جانە پروديۋسەر ءلايلا سۇلتانقىزى, ءانشى جىگىتتەر سۇلتان كۇنتۋعان جانە ايقىن تولەپبەرگەن, جۇرگىزۋشىلەر نۇرلان قويانباەۆ پەن اسحات سادىرباي. جوبانىڭ باس پروديۋسەرى – گاۋھار يمانقۇلوۆا, اتقارۋشى پروديۋسەرى – التىنبەك راحمەتوۆ.
ءبىر قىزىعى, بيىل جوبانىڭ ەرەجەلەرى وزگەردى. ەندى قاتىسۋشىلار ءار ويىن جارىسىندا جەڭىس ءۇشىن بارىنشا تەر توگۋلەرى ءتيىس. بۇدان بۇرىن «چەمپيون قابىرعاسى» ويىنى ۇپايلاردى ەسەپتەۋ كەزىندە ماڭىزدى جانە شەشۋشى بولاتىن. بۇگىنگى كۇنى ۇپاي سانىن ساناۋ جانە التىن, كۇمىس, قولا مەدالدار ءار ويىن اياقتالعان سايىن تابىستالىپ, ەڭ سوڭىندا ويىننىڭ بارلىق كەزەڭدەرى بويىنشا جالپى ۇپاي سانى قوسىلادى.
شوۋدىڭ تەلەۆيزيالىق نۇسقاسى «قازاقستان» تەلەارناسىنان الداعى كۇزدە «نامىس دودا» اتاۋىمەن كورسەتىلەدى. ايتا كەتۋ كەرەك, «بولشيە گونكي» 1962 جىلى فرانتسيادا «Intervilles» (قالاارالىق) اتاۋىمەن شىعىپ, الەمنىڭ 30-دان استام ەلىندە تانىمال بولىپ, كوپتەگەن مەملەكەتتەر قاتىساتىن سپورتتىق-تانىمدىق تەلەشوۋعا اينالدى. ويىنداردىڭ نەگىزىن سول جىلدارى فرانتسيانىڭ پرەزيدەنتى شارل دە گولل قالادى, ونىڭ ماقساتى حالىقتار دوستىعىن نىعايتىپ, ەۋروپا جاستارىنىڭ كوڭىلىن كوتەرۋ ەدى.
جوبانىڭ اۋديتورياسى 2 ملرد. ادامدى قۇرايدى, مۇنداي كەڭ اۋقىم تەك قانا وليمپيا ويىندارىندا عانا جينالادى ەكەن. بۇل تەلەۆيزيا دامۋىنداعى الەمدىك بارلىق اعىمدار مەن باعىتتارعا سايكەس كەلەتىن وتاندىق تەلەۆيزياداعى ءىرى كولەمدەگى جانە جوعارى ساپاداعى بىردەن-ءبىر شوۋ بولىپ تابىلادى.
راۋان ەسقالي