قازاقستان − گەرمانيا كەلىسسوزدەرى: قاي سالالاردا سەرىكتەستىك ارتادى؟

ەرمەك كوشەرباەۆ قازاقستان گەرمانيامەن بايلانىستاردى ەۋروپالىق وداقتاعى نەگىزگى ستراتەگيالىق سەرىكتەستىكتىڭ ءبىرى رەتىندە قاراستىراتىنىن اتاپ ءوتتى. ونىڭ ايتۋىنشا, استانا ەكىجاقتى فورماتتا دا, ەۋروپالىق وداق پەن ورتالىق ازيانىڭ وڭىرلىك الاڭدارى اياسىندا دا ەكونوميكالىق ىقپالداستىقتى تەرەڭدەتۋگە مۇددەلى.

«قازاقستان گەرمانيامەن ىنتىماقتاستىقتى دامىتۋعا ايرىقشا ءمان بەرەدى جانە ونى ەۋروپالىق وداقتاعى نەگىزگى ستراتەگيالىق سەرىكتەستەرىنىڭ ءبىرى رەتىندە قاراستىرادى. گەرمانيامەن ەكىجاقتى دەڭگەيدە دە, ەۋروپالىق وداق پەن ورتالىق ازيانىڭ وڭىرلىك فورماتتارى شەڭبەرىندە دە ەكونوميكالىق ىنتىماقتاستىقتى بەلسەندى تۇردە ىلگەرىلەتۋگە دايىنبىز جانە كەلىسىلگەن باستامالاردى ناقتى جوبالار مەن ناتيجەلەرگە اينالدىرۋعا نيەتتىمىز», دەدى مينيستر.

گەرمانيا اقش-تاعى التىن قورىن ەلگە قايتارۋدى كوزدەپ وتىر

كەزدەسۋ بارىسىندا تاراپتار قازاقستاننىڭ الەۋمەتتىك-ەكونوميكالىق دامۋ كورسەتكىشتەرىنە دە توقتالدى. سىرتقى ىستەر ءمينيسترىنىڭ مالىمەتىنشە, حالىقارالىق ۆاليۋتا قورىنىڭ دەرەكتەرى بويىنشا ەل ەكونوميكاسىنىڭ كولەمى 300 ملرد اقش دوللارىنا جەتىپ, قازاقستان الەمنىڭ جەتەكشى 50 ەكونوميكاسىنىڭ قاتارىنا ەنگەن. بۇل جان باسىنا شاققاندا شامامەن 15 مىڭ اقش دوللارىنا تەڭ. سونداي-اق 2000-2025 جىلدار ارالىعىندا ناقتى جالپى ىشكى ءونىمنىڭ ورتاشا ءوسىمى 3,6 پايىزدى قۇراپ, قازاقستان قارقىندى دامىپ كەلە جاتقان بەس ەلدىڭ قاتارىنا كىرگەن.

ءوز كەزەگىندە كاتارينا رايحە قازاقستاندى گەرمانيا ءۇشىن ورتالىق ازياداعى سەنىمدى سەرىكتەس دەپ اتاپ ءوتتى.

«قازاقستان گەرمانيا ءۇشىن ورتالىق ازياداعى سەنىمدى سەرىكتەس. تۇراقتى دامۋ مەن يننوۆاتسيالار نەگىزىندە ەكونوميكالىق جانە ەنەرگەتيكالىق ىنتىماقتاستىعىمىزدى ودان ءارى تەرەڭدەتۋگە نيەتتىمىز», دەدى ول.

تاراپتار ەنەرگەتيكالىق ىنتىماقتاستىققا ەرەكشە نازار اۋداردى. اتاپ ايتقاندا, ءبىزدىڭ مۇنايدى گەرمانيانىڭ شۆەدت قالاسىنداعى مۇناي وڭدەۋ زاۋىتىنا جەتكىزۋ ماسەلەسى جانە قازاقستاننان گەرمانيا مەن ەۋروپالىق وداق ەلدەرىنە «جاسىل» سۋتەگى ءوندىرۋ مەن ەكسپورتتاۋ پەرسپەكتيۆالارى قاراستىرىلدى. سونىمەن بىرگە ماشينا جاساۋ, حيميا ونەركاسىبى جانە تاۋ-كەن مەتاللۋرگيا سالالارىنداعى بىرلەسكەن جوبالار, نەمىس تەحنولوگيالارى مەن ۇزدىك تاجىريبەنى ترانسفەرلەۋ مۇمكىندىكتەرى تالقىلاندى.

قازاقستان مەن گەرمانيا تۋريزم سالاسىنداعى سەرىكتەستىكتى كەڭەيتەدى

لوگيستيكا سالاسىندا ترانسكاسپي حالىقارالىق كولىك باعىتىن دامىتۋ, سونداي-اق كولىك پەن ونەركاسىپتىك پروتسەستەردى تسيفرلاندىرۋ باعىتىنداعى ءوزارا ءىس-قيمىلدى كۇشەيتۋ قاجەتتىگى ايتىلدى. كەزدەسۋ قورىتىندىسىندا تاراپتار ستراتەگيالىق سەرىكتەستىكتى ودان ءارى نىعايتۋعا دايىن ەكەندەرىن راستاپ, مازمۇندى ديالوگتى جالعاستىرۋعا ۋاعدالاستى.

الماتىدا قازاقستان − گەرمانيا Nexus ينستيتۋتى قۇرىلادى

ساپار اياسىندا قازاقستان سىرتقى ىستەر ءمينيسترى Deutsche Bahn, Noble Elements, Lanxess, Rhenus Group جانە DIHK وكىلدەرىمەن دە كەزدەستى. وندا ساۋدا-ەكونوميكالىق جانە ينۆەستيتسيالىق ىنتىماقتاستىقتىڭ قازىرگى احۋالى, ونەركاسىپ, حيميا, لوگيستيكا, ماشينا جاساۋ, دەنساۋلىق ساقتاۋ جانە كاسىپتىك ءبىلىم بەرۋ سالالارىنداعى ارىپتەستىكتى كەڭەيتۋ جولدارى تالقىلاندى.

ەرمەك كوشەرباەۆ استانا مەن بەرلين اراسىنداعى قاتىناستاردىڭ ستراتەگيالىق سيپاتىن اتاپ ءوتىپ, قازاقستاننىڭ جوعارى تەحنولوگيالىق ينۆەستيتسيا تارتۋعا, وزىق وندىرىستىك شەشىمدەردى ەنگىزۋگە جانە گەرمان بيزنەسىمەن كووپەراتسيانى تەرەڭدەتۋگە مۇددەلى ەكەنىن جەتكىزدى. نەمىس كومپانيالارى ءوز كەزەگىندە قازاقستاندا جۇرگىزىلىپ جاتقان رەفورمالاردى جوعارى باعالاپ, قازاق نارىعىنداعى قاتىسۋىن ارتتىرۋعا دايىن ەكەندەرىن ءبىلدىردى. كەلىسسوزدەر قورىتىندىسى بويىنشا تاراپتار سىندارلى ديالوگتى جالعاستىرىپ, ناقتى بىرلەسكەن جوبالاردى ىسكە اسىرۋعا نيەتتى ەكەنىن راستادى.