قازىرگى كەزدە قازاقستاننىڭ ءبىرىنشى راكەتكاسى ەلەنا رىباكينانىڭ تاسى ورگە دومالاپ تۇر. ارينە, وعان ەش تاڭدانۋعا بولمايدى. كۇنى كەشە عانا ەلەنا «Australian Open-2026» تۋرنيرىندە الەمنىڭ ەڭ مىقتى تەننيسشىلەرىن تەگىستەي ۇتىپ, باس جۇلدەنى ولجالادى. وسى جارقىن جەڭىستەن كەيىن Tennis.com پورتالى جەرلەسىمىزدىڭ جاسىل قۇرلىقتا وتكەن جارىستاعى 20 جەتىستىگىن تىزبەكتەپ شىققان ەكەن. ەندى سوعان نازار اۋدارايىق.
1. وتانداسىمىز «ۇلكەن دۋلىعا» ساناتىنداعى تۋرنيردە ەكىنشى مارتە توپ جاردى. العاش رەت ەلەنا وسىدان ءتورت جىل بۇرىن لوندوندا ءداستۇرلى تۇردە ۇيىمداستىرىلىپ تۇراتىن «ۋيمبلدون» دوداسىندا الدىنا جان سالمادى.
2. كۇنى بۇگىنگى دەيىن كورتتا جۇرگەن ءۇش تەننيسشىگە عانا «ۇلكەن دۋىلعانىڭ» ەكى بىردەي توسەنىشىندە – ءشوپ پەن حاردا باس جۇلدەنى يەلەنۋ باقىتى بۇيىردى. ولار – ۆينۋس ۋيليامس, يگا سۆيونتەك جانە ەلەنا رىباكينا.
3. قازىرگى كەزدە ونەر كورسەتىپ جۇرگەندەر اراسىنان «ۋيمبلدون» مەن اۋستراليانىڭ اشىق بىرىنشىلىگىنىڭ ەكەۋىندە دە جەڭىسكە جەتكەن جالعىز ويىنشى بار. ول – رىباكينا.
4. سوڭعى سەگىز جىلدا WTA-نىڭ قورىتىندى ءتۋرنيرى مەن «Australian Open» دوداسىن قاتار ۇتقان تەك ەلەنا. 2017 مەن 2018 جىلدارى ءدال سونداي تابىسقا دانيالىق كارولينا ۆوزنياتسكي قول جەتكىزگەن ەدى.
5. مەلبۋرندە رىباكينا ءوزىنىڭ 12 تيتۋلىن ولجالادى. وسىعان دەيىن ول «ۇلكەن دۋىلعا», WTA 1000 مەن WTA 250 جارىستارىندا 2 رەت, WTA-نىڭ قورىتىندى تۋرنيرىندە 1 مارتە جانە WTA 500 باسەكەسىندە 5 رەت تەڭدەسسىز دەپ تانىلدى.
6. وتانداسىمىز WTA تۋرنيرلەرىنىڭ فينالىندا قاتارىنان بەسىنشى رەت جەڭىسكە جەتتى. بۇل ءساتتى سەريا 2024 جىلدىڭ ءساۋىر ايىندا گەرمانيانىڭ شتاتگارت قالاسىندا باستالعان ەدى. جالپى فينالدا ول 12 رەت باسىمدىق تانىتىپ, 11 رەت ەسە جىبەردى.
7. رىباكينانىڭ الەمنىڭ ءبىرىنشى جانە ەكىنشى راكەتكالارىمەن ءتۇرلى جارىستاردا جولدارى ءجيى قيىسىپ ءجۇر. يگا سۆەنتەكپەن 12 رەت كەزدەسىپ, ازىرگە تەڭ ەسەپ ساقتالۋدا – 6:6. ال ارينا سوبولەنكونىڭ ءبىزدىڭ قىزدان ءبىر جەڭىسى ارتىق – 7:8.
8. سوبولەنكو مەن شۆەنتەك الەمنىڭ ءبىرىنشى راكەتكالارى اتانىپ وتىرعان تۇستا دا جەرلەسىمىز ولاردى كوبىنە-كوپ ۇتتى. ول كەزدەگى ەسەپ – 9:4.
9. جوعارىدا ەسىمدەرى اتالعان بەلارۋس پەن پولشا تەننيسشىلەرى WTA رەيتينگىندە كوش باستاپ تۇرعان تۇستا ولاردىڭ ەكەۋى تەك رىباكينا عانا ۇتتى.
10. 2023 جىلدان بەرى ارينا سوبولەنكونىڭ جاسىل قۇرلىقتاعى جارىستا تەك ەلەنا رىباكينادان عانا ەكى رەت ۇتىلدى.
11. الەمنىڭ ءبىرىنشى راكەتكالارىمەن جولى 15 رەت قيىسقان جەرلەسىمىز سونىڭ توعىزىندا جەڭىس تويىن تويلادى.
12. جەر جاھاننىڭ ەڭ ۇزدىك ويىنشىلارىمەن وتكەن كەزدەسۋلەردەگى ەلەنانىڭ جەڭىس كوەففيتسەنتى 60 پايىزدى قۇرايدى. بۇل – WTA تاريحىنداعى ەڭ ۇزدىك كورسەتكىش!
13. سوڭعى 17 جىل ارالىعىندا «ۇلكەن دۋلىعانىڭ» ءبىر تۋرنيردە الەمنىڭ ءبىرىنشى جانە ەكىنشى راكەتكالارىن قاتارىنان ۇتقان ەكى ويىنشى عانا بولدى. سولاردىڭ ءبىرى – رىباكينا.
14. «Australian Open» جارىسىندا WTA رەيتينگىندە كوش باستاپ تۇرعان قوس مىقتىنى ۇتۋ باقىتى تورتكۇل دۇنيەنىڭ ءتورت تەننيسشىسىنە عانا بۇيىردى. سولاردىڭ قاتارىندا ەلەنا دا بار.
15. بۇگىنگى تاڭدا تەڭدەسسىز دەپ تانىلىپ وتىرعان تەننيسشيلەردى وتانداسىمىز WTA دەڭگەيىندەگى دودالاردا ءۇش رەتتتەن اسا ۇتتى. ونداي ناتيجەگە تەك ءتورت تەننيسشى عانا قول جەتكىزە العان.
16. ول توپ-10-دىقتىڭ قاتارىندا جۇرگەن ۇزدىكتەردى قاتارىنان 10 كەزدەسۋدە ۇتتى.
17. رىباكينا توپ تۋرنيرلەردەگى سوڭعى 21 كەزدەسۋدىڭ 20-سىندا جەڭىسكە جەتتى.
18. بىلتىر وتكەن «ۋيمبلدوننان» كەيىن ول 45 رەت كورتقا شىعىپ, 38 قارسىلاسىن قاپى قالدىردى. بۇل – سول مەرزىم ارالىعىنداڭى ەڭ جاقسى كورسەتكىش!
19. بيىلعى ماۋسىمدا ەلەنا ەيس جاساۋ جاعىنان جەكە-دارا كوش باستاپ تۇر. ونىڭ قاڭىراتا سوققان سوققىلارى 69 مارتە دىتتەگەن جەرىنە ءدوپ ءتۇستى. سول ەيستەردىڭ 47-ءسى اۋستاراليانىڭ اشىق بىرىنشىلىگىنىڭ ەنشىسىندە.
20. مەلبۋرندەگى جارقىن جەڭىسىنىڭ ارقاسىندا ەلەنا رىباكينا قايتا توپ-3 تەننيسشىنىڭ قاتارىنا قوسىلدى. سونىمەن قاتار ول ەكىنشى ورىندا تۇرعان ويىنشىدان ۇپاي سانىن 368-گە دەيىن قىسقارتتى.