مەملەكەت باسشىسى ۇكىمەتكە ۋاقىت وزدىرماي شەشەتىن بىرقاتار مىندەت قويدى. اتاپ ايتقاندا, تۇراقتى ءارى قالىپتى ينفلياتسيا كورسەتكىشىن جانە مەملەكەت قارجىسىنىڭ تەڭگەرىمدىلىگىن قامتاماسىز ەتۋدى, سونداي-اق بىلتىرعى جولداۋدا جاريالانعان جاڭا ينۆەستيتسيالىق كەزەڭدى تولىعىمەن جۇزەگە اسىرۋدى تاپسىردى, دەپ حابارلايدى Egemen.kz.
پرەزيدەنت جاپپاي تسيفرلاندىرۋ جانە جاساندى ينتەللەكتىنى ەنگىزۋ كومەكشى قىزمەت اتقارۋمەن شەكتەلمەي, ەكونوميكالىق دامۋدىڭ باستى ارقاۋى بولۋى ءتيىس ەكەنىن ايتتى.
«جي نەگىزىندە تسيفرلاندىرۋدىڭ بىرقاتار باستى مىندەتتەرىن ورىنداۋ قاجەت. بۇل – ەڭبەك ونىمدىلىگىن ارتتىرۋ, ەكونوميكانىڭ ەكسپورتقا باعدارلانعان سەكتورلارىن قالىپتاستىرۋ, قوسىلعان قۇنى جوعارى ءونىم شىعارۋ جانە قازاقستاندى جاھاندىق تسيفرلىق ەكونوميكا تىزبەگىنە كىرىكتىرۋ. جاڭا ينۆەستيتسيالىق كەزەڭدى ىسكە اسىرۋ ەلىمىزدىڭ يندۋستريا, ەنەرگەتيكا, كولىك سالالارىنداعى زاماناۋي جۇيەسىن قالىپتاستىرۋعا مۇمكىندىك بەرەدى.
جاساندى ينتەللەكتىنى دامىتۋ, بۇل – ۇران ەمەس, بۇل ەكونوميكالىق يدەولوگيانىڭ نەگىزگى تىرەگى, ءتىپتى ۇلتتىق يدەولوگيامىزدىڭ مىزعىماس تۇعىرى بولۋعا ءتيىس. وسىنداي جاۋاپتى ساتتە دۇرىس, باتىل ءارى ءتيىمدى شەشىمدەردى دەر كەزىندە قابىلداۋ وتە ماڭىزدى. شىنايى ومىرگە تۇك قاتىسى جوق «قۇرعاق» ۇسىنىستار بەرۋ, قىسقاسى, ناتيجەسى جوق ىسپەن اينالىسۋ مۇلدەم بولماۋى قاجەت», دەدى پرەزيدەنت.
ء«ارتۇرلى كوزقاراس – ءبىرتۇتاس ۇلت»: پرەزيدەنت ەلىمىز ءۇشىن ماڭىزدى قاعيداتتى اتادى
مەملەكەت باسشىسى ينفلياتسيانى ويعا قونىمدى, قالىپتى دەڭگەيگە ءتۇسىرىپ, ونىڭ شارىقتاپ كەتۋىنە جول بەرمەۋ كەرەكتىگىنە توقتالدى.
«ينفلياتسيانىڭ نە سەبەپتى جوعارى بولىپ تۇرعانى بەلگىلى, كەسەلدىڭ سەبەبى انىقتالدى. ەندى وسى ماسەلەنى شەشۋ كەرەك. بىراق ۇسىنىلاتىن شارالار ەلدىڭ دامۋىنا كەرى اسەرىن تيگىزبەۋى قاجەت. ءدال وسى تۇستا ءتۇرلى پىكىر ايتىلىپ جاتىر. ۇكىمەت پەن ۇلتتىق بانككە بىرلەسىپ ناقتى ءىس-قيمىل الگوريتمىن ازىرلەۋدى تاپسىرامىن. وسى ماڭىزدى جۇمىسقا بارلىق مەكەمە وكىلدەرى مەن ساراپشىلار قاتىسۋعا ءتيىس. تاعى دا قايتالاپ ايتامىن: قولايسىز احۋالدى شۇعىل رەتكە كەلتىرۋ قاجەت. بيىلدان باستاپ ءۇش جىل قاتارىنان ينفلياتسيانى تومەندەتۋ ءۇشىن ناقتى شارالار قابىلداۋ كەرەك. بىرلەسكەن ءىس-قيمىل باعدارلاماسىن ساپالى ورىنداۋ ايرىقشا ماڭىزدى. ماسەلەنى شەشۋدىڭ ورنىنا بوس ءسوزدى كوبەيتىپ, قاجەتسىز «جول كارتالارىن» ازىرلەۋ – جاۋاپكەرشىلىكتەن قاشۋ دەگەن ءسوز. الدىن الا ەسكەرتۋ: ونداي جاعدايدا قاتاڭ شارا قولدانىلادى. حالىقتىڭ تابىسى ارتسا عانا, ناقتى ناتيجەگە قول جەتكىزدىك دەپ ساناۋعا بولادى», دەدى پرەزيدەنت.
توقاەۆ: ادۆوكاتتاردىڭ ۇسىنىسىمەن اتا زاڭ جوباسىنا ادۆوكاتۋرا تۋرالى جەكە باپ قوسىلدى