ەلىمىز حالىقارالىق اۆتوموبيل تاسىمالدارىنىڭ گەوگرافياسىن جۇيەلى تۇردە كەڭەيتىپ كەلەدى. 2025 جىلى ەل 42 مەملەكەتپەن ۇكىمەتارالىق كەلىسىمدەر جاساسىپ, اۆتوترانزيت پەن ەكسپورت-يمپورت باعىتتارىن ارتاراپتاندىرۋعا ناقتى قادام جاسادى. بۇل شەشىمدەر وتاندىق تاسىمالداۋشىلاردىڭ سىرتقى نارىققا شىعۋىن جەڭىلدەتىپ, وڭىرلىك لوگيستيكاداعى قازاقستاننىڭ ءرولىن كۇشەيتۋدى كوزدەيدى, دەپ جازادى Egemen.kz.
اتاپ ايتقاندا, تۇركىمەنستان جانە يران باعىتىندا رۇقسات ەتىلمەگەن تاسىمالداۋ جۇيەسى ەنگىزىلدى. بۇل جۇك كولىكتەرىنىڭ قوزعالىسىن جەدەلدەتىپ, اكىمشىلىك كەدەرگىلەردى ازايتۋعا مۇمكىندىك بەردى. ال تۇركيامەن ۋاعدالاستىققا قول جەتكىزىلۋى تاياۋ شىعىس پەن ەۋروپاعا شىعاتىن دالىزدەردىڭ الەۋەتىن ارتتىردى.
ترانزيتتىك سەرپىن: قازاقستان كولىك جۇيەسىنىڭ جاڭا كەزەڭى
قازاقستان اۆتوترانزيت سالاسىندا تاعى ءبىر ماڭىزدى ناتيجەگە قول جەتكىزدى. ەل قىتاي اۋماعى ارقىلى ترانزيتتىك اۆتوتاسىمالداۋ قۇقىعىن العان العاشقى مەملەكەت اتاندى. سونىمەن بىرگە قحر جانە وزبەكستانمەن بىرلەسىپ, شەتەلدىك رۇقسات بلانكىلەرىنىڭ 65%-ى تسيفرلى فورماتقا كوشىرىلدى. بۇل تاسىمال راسىمدەرىنىڭ اشىقتىعىن ارتتىرىپ, ۋاقىت پەن شىعىندى قىسقارتۋعا جول اشتى.
باسقا باسىلىمداردان: قازاقستان نەگىزگى ترانزيتتىك دالىزدەردى دامىتىپ جاتىر
نارىقتاعى ءتارتىپ پەن قاۋىپسىزدىكتى كۇشەيتۋ ماقساتىندا ەل اۋماعىندا جۇك كولىكتەرىن تسيفرلى ولشەۋ جۇيەسى ەنگىزىلىپ جاتىر. قازىردىڭ وزىندە ايىپپۇلداردى اۆتوماتتى تۇردە راسىمدەۋ جۇيەسىمەن بىرىكتىرىلگەن 73 اۆتوماتتاندىرىلعان ولشەۋ ستانساسى ورناتىلعان. بۇل ارتىق جۇكتەمە مەن جول ينفراقۇرىلىمىنا كەلەتىن زالالدى ازايتىپ, تاسىمال سالاسىنداعى ءادىل باسەكەنى قامتاماسىز ەتۋگە باعىتتالعان.
قازاقستاننىڭ ترانزيتتىك الەۋەتى قالاي وزگەردى؟
قابىلدانعان شارالار حالىقارالىق اۆتوتاسىمالدىڭ ينستيتۋتسيونالدىق نەگىزىن نىعايتىپ قانا قويماي, قازاقستاندى وڭىرلىك لوگيستيكالىق حاب رەتىندە ورنىقتىرۋعا قىزمەت ەتەدى.