ادىلەت يمامبەكوۆ – گارۆارد ۋنيۆەرسيتەتىندە وقىعان ءارى PhD قورعاعان العاشقى قازاق. ونىڭ عىلىمي ەڭبەكتەرى ءالى كۇنگە دەيىن وزەكتى.
جاس عالىم 2012 جىلى نەبارى 30 جاسىندا تيان-شان تاۋىندا قايتىس بولعان. سوعان قاراماستان, ەڭبەكتەرى بۇگىنگە دەيىن حالىقارالىق عىلىمي ورتادا قولدانىلىپ كەلەدى. ونىڭ حيرش يندەكسى – 26. بۇل كورسەتكىش عالىم ەڭبەكتەرىنە باسقا زەرتتەۋشىلەر قانشالىقتى ءجيى سىلتەمە جاسايتىنىن بىلدىرەدى. ياعني ونىڭ زەرتتەۋلەرى عىلىمعا ناقتى پايدا اكەلىپ, وزگە جۇمىستارعا نەگىز بولعان. مۇنداي دەڭگەيگە كوپجىلدىق تاجىريبەسى بار پروفەسسورلاردىڭ ءوزى ءاردايىم جەتە بەرمەيدى. ءا. يمامبەكوۆتىڭ زەرتتەۋلەرى وتكىزگىشتىك, كۆانتتىق ەسەپتەۋ جانە جاڭا بۋىن ەلەكترونيكاسى سياقتى بولاشاق تەحنولوگيالاردىڭ تەوريالىق نەگىزىن تۇسىندىرۋگە كومەكتەسەدى.