الەمگە «پوپ مۋزىكاسىنىڭ كورولى» اتىمەن تانىلعان مايكل دجەكسوننىڭ ءومىر جولىنا ارنالعان «مايكل» اتتى بيوگرافيالىق ءفيلمنىڭ العاشقى تولىققاندى ترەيلەرى كورەرمەن نازارىنا ۇسىنىلدى. بەينەروليكتى Lionsgate كينوستۋدياسى جاريالادى, دەپ جازادى Egemen.kz.
ءفيلمنىڭ رەسمي پروكاتقا شىعۋى 23 ساۋىرگە جوسپارلانعان. كارتينادا باستى ءرولدى مارقۇمنىڭ جيەنى دجاافار دجەكسون سومدايدى. ترەيلەردەن ونىڭ اتاقتى اعاسىنىڭ ساحناداعى قيمىلىن, داۋىس مانەرىن جانە ورىنداۋ ءستيلىن شىنايى جەتكىزۋگە تىرىسقانىن بايقاۋعا بولادى.
ەكى مينۋتتان اساتىن بەينەروليكتە مايكل دجەكسوننىڭ الەمدىك داڭققا جەتۋ جولى, شىعارماشىلىق قالىپتاسۋى, العاشقى تابىستارى مەن ساحناداعى جارقىن ساتتەرى كورىنىس تاپقان. ترەيلەر بارىسىندا ءانشىنىڭ ەڭ تانىمال حيتتەرى دە پايدالانىلعان. بۇل كورەرمەندى سول ءداۋىردىڭ اتموسفەراسىنا جەتەلەپ, اڭىز تۇلعانىڭ ونەر جولىن قايتا ەسكە تۇسىرەدى.
ديماش پەن دجەكسون
ءفيلمنىڭ رەسمي سينوپسيسىندە كارتينانىڭ تەك مۋزىكالىق جەتىستىكتەرمەن شەكتەلمەيتىنى اتاپ وتىلگەن. تۋىندىدا دجەكسوننىڭ وتباسىلىق توپتاعى العاشقى قادامدارىنان باستاپ, الەمدەگى ەڭ ايگىلى ارتىستەردىڭ بىرىنە اينالعان كەزەڭىنە دەيىنگى جولى قامتىلادى. سونىمەن قاتار ونىڭ شىعارماشىلىق امبيتسياسى, ساحنا سىرتىنداعى ءومىرى, جەكە كونتسەرتتەرىندەگى العاشقى قويىلىمدارى دا كەڭىنەن كورسەتىلەدى.
الەمدى باۋراعان داۋىس نەمەسە ءانشى ديماش قۇدايبەرگەننىڭ ومىرىندەگى تىلسىم وقيعالار حاقىندا
كارتينا اۆتورلارى مايكل دجەكسوننىڭ ونەر ادامى رەتىندە عانا ەمەس, جەكە تۇلعا رەتىندەگى بولمىسىن اشۋعا ۇمتىلعان. ونىڭ بالا كەزدەن باستاپ ۇلكەن ساحناعا دەيىنگى كۇردەلى جولى, تابىسقا جەتۋ ءۇشىن جاساعان ەڭبەگى مەن جاۋاپكەرشىلىگى كوركەم تىلمەن بەينەلەنەدى.