كونستيتۋتسيالىق رەفورما اياسىندا ۇلتتىق زاڭداردىڭ حالىقارالىق كەلىسىمدەردەن جوعارى تۇرۋى جانە مەملەكەتتىك ءتىل ساياساتىن كەزەڭ-كەزەڭىمەن كۇشەيتۋ ماسەلەسى كوتەرىلدى. ءماجىلىس دەپۋتاتى قازىبەك يسا بۇل قادامداردى قۇقىقتىق ەگەمەندىكتى نىعايتاتىن ءارى ۇلتتىق مۇددەنى قورعاۋعا باعىتتالعان ستراتەگيالىق شەشىم دەپ باعالايدى, دەپ جازادى Egemen.kz.
«اق جول» فراكتسياسىنىڭ وكىلى دامىعان ەلدەر تاجىريبەسىنە توقتالدى. ونىڭ ايتۋىنشا, اقش, گەرمانيا, فرانتسيا سياقتى مەملەكەتتەردە حالىقارالىق شارتتار كونستيتۋتسياعا قايشى كەلسە, قايتا قارالادى نەمەسە ورىندالمايدى.
ەربولات ساۋرىقوۆ: اتا زاڭ زياتكەرلىك مەنشىك قۇقىقتارىن قورعاۋدى كۇشەيتەدى
«وسى باپ ارقىلى مەملەكەت باسشىسى قاسىم-جومارت توقاەۆتىڭ 2022 جىلى ايتقان «وسىدان وتىز جىل بۇرىنعى حالىقارالىق شارتتاردى قايتا قاراۋ كەرەك» دەگەن باستاماسى ىسكە اسۋى كەرەك. ەسكى بيلىك ءۇشىن ءتيىمدى, حالىق ءۇشىن ءتيىمسىز بولعان مۇناي كەلىسىمدەرىندە كەتكەن ەسەمىزدى قايتارىپ, ەل قازىناسىن قورعاۋعا مۇمكىندىك تۋادى», دەدى دەپۋتات.
قازىبەك يسانىڭ پىكىرىنشە, ۇلتتىق زاڭداردىڭ حالىقارالىق كەلىسىمدەردەن جوعارى تۇرۋىن بەكىتۋ ەلىمىزدى قۇقىقتىق ەگەمەندىگى بار, ۇلتتىق مۇددەسىن قورعاي الاتىن مەملەكەت رەتىندە كۇشەيتەدى.
ن.اۋەسباەۆ: جاڭا كونستيتۋتسيادا پرەزيدەنت وكىلەتتىلىگى ءبىر رەت قانا 7 جىلدىق مەرزىمگە بەكىتىلەدى
«سوندىقتان بۇل نورما ۋاقىت تالابىنا ساي ءارى ستراتەگيالىق تۇرعىدان سالماقتى شەشىم», دەپ اتاپ ءوتتى ول.
دەپۋتات مەملەكەتتىك ءتىل ماسەلەسىنە دە ارنايى توقتالدى.
«پارلامەنتتە قازاق ءتىلى ءۇشىن مەنەن ارتىق كۇرەسكەن ەشكىم جوق. مەملەكەتتىك ءتىل تۋرالى زاڭ قابىلداۋ جونىندە ساۋال كوتەرگەنىمدە قولداۋ بىلدىرمەي, قارسى شىققاندار قازىر ءتىل جايلى اقىل ايتۋعا كوشتى. بۇگىندە پارلامەنتتىڭ 90 پايىزى قازاقشا سويلەيدى, وزگە ەتنوس وكىلدەرى دە مەملەكەتتىك تىلدە ەركىن پىكىر ءبىلدىرىپ ءجۇر. سوندىقتان مەملەكەتتىك ءتىلىمىز ۇلتىمىزدى ۇيىستىراتىن مارتەبەسى ايقىن تىلگە اينالۋى قاجەت», دەدى قازىبەك يسا.
ونىڭ ايتۋىنشا, 2024 جىلى «قازاقستان ازاماتتىعىن الۋ ءۇشىن مەملەكەتتىك تىلدەن ەمتيحان تاپسىرۋ كەرەك» دەگەن نورما زاڭعا ەنگىزىلدى.
ماقسات تولىقباي: جاڭا اتا زاڭنىڭ قازاق تىلىندەگى نۇسقاسى تولىقتاي قايتا جازىلدى
«بۇل تالاپ مەملەكەتتىك قىزمەتكە ورنالاسۋدا دا ساقتالۋى ءتيىس. تەستىلەۋ جۇيەسىن قايتا قاراپ, مازمۇنىن تولىقتىرۋ قاجەت. «اق جول» پارتياسى كوتەرگەن باستامالاردىڭ بىرتىندەپ ىسكە اسىپ كەلە جاتقانى سونىڭ دالەلى», دەدى دەپۋتات.
دەپۋتات سوزىندە قازىرگى گەوساياسي احۋال جاعدايىندا ءتىل ماسەلەسىنىڭ قاۋىپسىزدىك فاكتورىنا اينالعانى دا ايتىلعان. دەپۋتاتتىڭ پايىمىنشا, ءتىل ساياساتىنا قاتىستى كەز كەلگەن شەشىم بايىپپەن, سالماقتى تۇردە قابىلدانۋى كەرەك. بۇل تۇراقتىلىقتى ساقتاۋدىڭ ماڭىزدى تەتىگى سانالادى.