قىزىلقوعا اۋدانىنىڭ جانگەلدين اۋىلىندا تۇراتىن ەرلى-زايىپتىنىڭ ولىمىنە بايلانىستى 29 جاستاعى جىگىتكە ىزدەۋ جاريالانعان ەدى. ەندى ونىڭ 5 بالاسى مەملەكەتتىك مەكەمەلەرگە ورنالاستىرىلدى, دەپ حابارلايدى Egemen.kz.
اتىراۋ وبلىستىق ءبىلىم باسقارماسىنىڭ ءباسپاسوز قىزمەتى بۇل دەرەكتى راستادى.
«وبلىستىق پوليتسيا دەپارتامەنتىنەن 2 اقپانى كۇنى ماحامبەت اۋدانىنىڭ اكىمدىگىنە شۇعىل شارالار قابىلداۋ جونىندەگى ۇسىنىس حات ءتۇستى. حاتتا كۇدىكتىنىڭ كامەلەتتىك جاسقا تولماعان 5 بالاسىن قاۋىپسىز جەرگە, ياعني مەملەكەت قورعاۋىنا الۋ جونىندە كورسەتىلگەن. وسىعان بايلانىستى ماحامبەت اۋدانى اكىمدىگى جانىنداعى كامەلەتكە تولماعانداردىڭ ىستەرى جانە ولاردىڭ قۇقىقتارىن قورعاۋ جونىندەگى كوميسسيانىڭ شەشىمىمەن كامەلەتكە تولماعان بالالاردىڭ ۇشەۋى ءبىلىم بەرۋ باسقارماسىنىڭ كامەلەتكە تولماعانداردى بەيىمدەۋ ورتالىعىنا, 3 جانە 1 جاستاعى ەكى ءسابي دەنساۋلىق ساقتاۋ باسقارماسىنا قاراستى مامانداندىرىلعان بالالار ۇيىنە ۋاقىتشا ورنالاستىرىلدى», دەپ حابارلادى باسقارمانىڭ ءباسپاسوز قىزمەتى.
ەسكە سالا كەتەيىك, بۇدان بۇرىن اتىراۋ وبلىسىنداعى ەرلى-زايىپتىنىڭ ولىمىنە بايلانىستى كۇدىكتىگە ىزدەۋ جاريالانعان ەدى.
ءىز-ءتۇزسىز جوعالىپ كەتكەن اتىراۋلىق ەرلى-زايىپتى جەر قوينىنا تاپسىرىلدى