جاسىل ەنەرگيانىڭ جاردەمى

وسى كۇنى وڭىردە تابيعي رەسۋرستى ەنەرگياعا اينالدىرۋ باعىتىندا ءبىرشاما جوبا بار. ولاردىڭ قاتارى ارتقان سايىن جاڭادان ءىرى ءوندىرىس ورىندارىن اشۋعا مۇمكىندىك كوبەيە بەرمەك. بۇدان بولەك, 6 ملرد تەڭگەگە قۋاتتىلىعى 20 مۆت-تىق كۇن ەلەكتر ستانسالارى سالىنىپ جاتىر. بۇل جوبالار حالىقتىڭ تۇرمىس ساپاسىن جاقسارتۋعا جاڭا سەرپىن بەرەدى.

كۇن ەلەكتر ستانساسىنىڭ اشىلۋىندا ءسوز سويلەگەن وبلىس اكىمى نۇرلىبەك نالىباەۆ «ەلدىڭ دامۋى اۋىلدان, اۋىل­دىڭ گۇلدەنۋىنەن باستالادى. ءار ەلدى مەكەننىڭ دامۋى, كەلەشەگىنىڭ جارقىن بولۋى ەل بىرلىگىنە بايلانىستى», دەدى.

جيىندا اۋداننىڭ الەۋمەتتىك-ەكو­نوميكالىق دامۋىنا وزىندىك ۇلەسى بار ازاماتتار مەن كۇن ەلەكتر ستانساسىن ىسكە قوسقان سالا قىزمەتكەرلەرى وبلىس اكىمىنىڭ العىسحاتىمەن ماراپاتتالدى.

قىتايدىڭ ءىرى ەنەرگەتيكالىق حول­دينگتەرىنىڭ ءبىرى «China Huadian Corporation» كومپانياسىنىڭ ەلىمىز­دەگى العاشقى جوباسىنىڭ جۇزەگە اسۋىنا «قازاق ينۆەست» ۇك» اق قول­داۋ كورسەتكەن. ستانسا سالۋ ءۇشىن 80 گەكتار جەر ۋچاسكەسى بولىنگەننەن كەيىن سىرتقى ىستەر مينيسترلىگىن­دەگى ينۆەستيتسيالار كوميتەتىمەن ين­ۆەس­تيتسيالىق كەلىسىمشارت جاسالىپتى. 11,5 ملرد تەڭگە ينۆەستيتسيا تارتۋ ارقىلى سالىنعان ستانسا قۇرىلىسىن­دا جاقىن ماڭداعى ەڭبەكشى اۋىل­دىق وكرۋگ تۇرعىندارى جۇمىس ىستەدى. پايدالانۋعا بەرىلگەننەن كەيىن 10 تۇ­راقتى جۇمىس ورنى قۇرىلىپ وتىر.

ستانسادا 56 316 زاماناۋي كۇن پانەلى ورناتىلعان. كۇننىڭ قوزعالىسىن قاداعالايتىن ترەكەرلىك جۇيەلەر ەلەكتر ەنەرگياسىن 20–25% كوپ ءوندىرىپ, بارىنشا ءتيىمدى پايدالانۋدى قامتاماسىز ەتەدى.

 «جاڭارتىلعان ەنەرگيا كوزدەرىن دامىتۋ تۋرالى ايتقاندا اۋەلى كۇن, جەل مەن سۋ ەسكە تۇسەدى. بىراق كوبىنە قوسالقى ستانسالار مەن نۇكتەلەر سەكىلدى ەنەرگەتيكالىق ينفراقۇرىلىم جەلىلەرى قيىندىق تۋعىزىپ جاتاتىن. كۇن مول تۇسەتىن, جەلى تۇراقتى وڭىرلەردىڭ وزىندە جاسىل ەنەرگەتيكانى دامىتۋعا وسىنداي كوزگە كورىنبەيتىن ماسەلەلەر كەدەرگى بولاتىن. سوندىقتان دا وسىدان 3 جىل بۇرىن ىڭعايلى اۋماق تاڭداۋ بارىسىندا قاراتاۋ ەتەگىندەگى «قازاتومپروم» كومپانياسىنا تيەسىلى قوسالقى ستانساعا كوزىمىز ءتۇستى. وعان جاڭارتىلاتىن ەنەرگەتيكا نىساندارىن قوسۋ مۇمكىندىگىن زەرتتەدىك. وسىلايشا, جۇمىس ىستەپ تۇرعان ترانسفورماتورلىق ستانسا­نىڭ ارقاسىندا وڭىرگە جالپى قۋاتى 100 مۆت ەكى كۇن ەلەكتر ستانساسى ­جانە قۋاتى 50 مۆت ءبىر جەل ەلەكتر ستان­ساسى جوبالارىمەن ينۆەستورلاردى ­تار­تۋعا مۇمكىندىك تۋدى. بۇل جوبالارعا جۇمسالاتىن جالپى ينۆەس­تيتسيا كولەمى 49,5 ملرد تەڭگە بولادى», دەيدى «قازاق ينۆەست» ۇك» اق وڭىرلىك ديرەكتورى مۇرات بالاباەۆ.

وڭىرلىك ديرەكتوردىڭ ايتۋىنشا, الداعى ۋاقىتتا ايماقتا كۇن جانە جەل ەلەكتر ستانسالارى كوبەيە بەرەدى. شيەلى, جاڭاقورعان, ارال اۋداندارى مەن قىزىلوردا قالاسىنداعى بۇل نىسانداردىڭ جالپى قۋاتى 260,5 مۆت-قا جەتەدى.

بۇل ەنەرگەتيكاعا عانا ەمەس, سونىمەن قاتار قورشاعان ورتا مەن ايماقتىڭ بولاشاعىنا قوسىلعان ۇلكەن ۇلەس بولماق.

قىزىلوردا