بۇگىن قازاقستان حالىق پارتياسى دەپۋتاتتىق فراكتسياسىنىڭ وتىرىسىندا جاڭا كونستيتۋتسيا جوباسى تالقىلاندى. جيىن بارىسىندا دەپۋتاتتار ۇسىنىلىپ وتىرعان كونستيتۋتسيالىق وزگەرىستەردىڭ مازمۇنى مەن ەلدىڭ ساياسي-قۇقىقتىق دامۋىنا ىقپالى جونىندە پىكىر الماستى, دەپ حابارلايدى Egemen.kz.
فراكتسيا جەتەكشىسى ماگەررام ماگەرراموۆ مەملەكەت باسشىسىنىڭ باستاماسىمەن جۇزەگە اسىپ جاتقان رەفورمالار ازاماتتاردىڭ ەل تاعدىرىنا بەلسەندى ارالاسۋىنا سەرپىن بەرگەنىن اتاپ ءوتتى. ونىڭ ايتۋىنشا, بۇل وزگەرىستەر قوعامدى شەشىم قابىلداۋ ۇدەرىستەرىنە كەڭىنەن تارتۋعا باعىتتالعان.
«كونستيتۋتسيالىق رەفورمانىڭ باستاۋى – پرەزيدەنتتىڭ 2025 جىلعى جولداۋىندا جاريالاعان ءبىر پالاتالى پارلامەنت قۇرۋ جونىندەگى باستاماسى بولدى. وسىعان بايلانىستى پارلامەنتتىك رەفورما جونىندەگى جۇمىس توبى قۇرىلىپ, ول 6 اي بويى جۇمىس ىستەدى. جۇمىس توبىنا پارلامەنت رەفورماسى بويىنشا 600 ۇسىنىس, كونستيتۋتسياعا وزگەرىستەر ەنگىزۋ جونىندە 1 600-دەن استام ۇسىنىس ءتۇستى. ازاماتتاردىڭ ايقىن سۇرانىسىن ەسكەرە وتىرىپ, مەملەكەت باسشىسى ۇلتتىق قۇرىلتايدىڭ بەسىنشى وتىرىسىندا كونستيتۋتسيالىق رەفورما جۇرگىزۋدى ۇسىندى. وسى ماقساتتا كونستيتۋتسيالىق رەفورما جونىندەگى كوميسسيا قۇرىلدى. كوميسسيا قۇرامىنا ەلىمىزدىڭ بارلىق وڭىرلەرىنەن جانە ءتۇرلى كاسىبي سالالاردان 130 ادام كىردى. كوميسسياعا 2 000-نان استام ۇسىنىس كەلىپ ءتۇستى. ولار زەردەلەنىپ, جيناقتالىپ, 30 قاڭتاردا جاڭا كونستيتۋتسيا جوباسى ۇسىنىلدى. قازىر بۇل قۇجات قوعامدا كەڭىنەن تالقىلانىپ جاتىر», دەدى م.ماگەرراموۆ.
ادامي كاپيتال – مەملەكەتتىڭ باستى بايلىعى: AMANAT فراكتسياسى جاڭا كونستيتۋتسيا جوباسىن تالقىلادى
جاڭا كونستيتۋتسيا جوباسى ۇلتتىق قۇرىلتايدىڭ وكىلەتتىگىن كەڭەيتۋدى كوزدەيدى ءارى جاڭا جوعارى كونسۋلتاتيۆتىك ورگان – حالىق كەڭەسىن قۇرۋدى ۇسىنادى. بۇل ورگانعا كونستيتۋتسيادا جەكە ءبولىم ارنالىپ, ونىڭ قىزمەتى ارنايى كونستيتۋتسيالىق زاڭمەن رەتتەلمەك. سونىمەن قاتار قۇجاتتا قازاقستان رەسپۋبليكاسىنىڭ ۆيتسە-پرەزيدەنتى ينستيتۋتىن ەنگىزۋ قاراستىرىلعان. بۇل باستامانى مەملەكەت باسشىسى بيىلعى 20 قاڭتاردا قىزىلوردادا وتكەن ۇلتتىق قۇرىلتايدىڭ قورىتىندى وتىرىسىندا كوتەرگەن بولاتىن ايتقان ەدى.
«ۆيتسە-پرەزيدەنت ينستيتۋتىن ەنگىزۋ بيلىك ءترانزيتى كەزىندەگى جۇيەلىك تاۋەكەلدەردى تومەندەتەدى. مەملەكەت بيلىكتىڭ ساباقتاستىعىن قامتاماسىز ەتەتىن, الدىن الا ايقىندالعان تەتىككە يە بولادى. بۇل – شۇعىل ساياسي يمپروۆيزاتسيالارعا جول بەرمەيتىن شەشىم. قازاقستان حالىق پارتياسىنىڭ فراكتسياسى ەلدە جۇرگىزىلىپ جاتقان كونستيتۋتسيالىق رەفورمانى تولىق قولدايدى», دەپ مالىمدەدى فراكتسيا جەتەكشىسى.
«اۋىل» فراكتسياسىنىڭ دەپۋتاتتارى اتا زاڭ جوباسىن ءبىراۋىزدان قولدادى
وتىرىس بارىسىندا دەپۋتاتتار دا ءوز كوزقاراستارىن ءبىلدىردى. يرينا سميرنوۆا جاڭا نەگىزگى زاڭنىڭ پرەامبۋلاسىنا ەرەكشە توقتالىپ, ونى «جاڭا كونستيتۋتسيانىڭ كومپاسى» دەپ اتادى.
اسىلبەك نۇرالين جاڭا كونستيتۋتسيادا ەڭبەك ەتۋ قۇقىعىنىڭ ناقتى بەكىتىلۋى حالىق پارتياسىنىڭ سايلاۋالدى باعدارلاماسىمەن تولىق ۇندەسەتىنىن اتاپ ءوتتى.
سەيتجان كەنجەگۇل مەملەكەتتىڭ الەۋمەتتىك باعىتتاعى ساياساتىن ازاماتتاردىڭ قۇقىقتارى مەن بوستاندىقتارىن قورعاۋدىڭ باستى قۇندىلىقتىق نەگىزى رەتىندە قولدايتىنىن جەتكىزدى.
ال يسلام سۇڭقار جاڭا كونستيتۋتسيا ەلدىڭ عىلىمي جانە يننوۆاتسيالىق دامۋىنا مۇلدە جاڭا باعدار بەرەتىنىن ايتتى.
فراكتسيا مۇشەلەرى جاڭا كونستيتۋتسيا قازاقستاننىڭ بەرىك ىرگەتاسىنا اينالىپ, سونىڭ نەگىزىندە ازاماتتاردىڭ كەپىلدەندىرىلگەن قۇقىقتارى مەن بوستاندىقتارى نىعاياتىنىنا سەنىمدى. سونىمەن بىرگە بۇل قۇجات حالىقتىڭ ەل ىسىنە ناقتى ءارى ءتيىمدى تۇردە قاتىسۋىنا كەڭ مۇمكىندىك اشادى دەپ ەسەپتەيدى.
جالپىۇلتتىق سوتسيال-دەموكراتيالىق پارتيا اتا زاڭنىڭ جاڭا جوباسىن تالقىلادى