استانا. 25 ناۋرىز. فرانتسيانىڭ وڭتۇستىگىندە كەشە اپاتقا ۇشىراعان Germanwings اۋە كومپانياسى ۇشاعى كەزدەيسوقتىقتىڭ اسەرىنەن قايعىلى جاعدايعا تاپ بولعان. Lufthansa اۆياكومپانياسى ۆيتسە-پرەزيدەنتى حايكە بيرلەنباح (سۋرەتتە ورتادا) سەيسەنبى كۇنى وسىنى مالىمدەدى. بۇل تۋرالى Interfax حابارلادى.
«قازىرگى ساتتە ءبىز بۇل جەردە كەزدەيسوق باقىتسىز جاعداي ورىن العان دەپ ەسەپتەيمىز, قالعان بولجامداردىڭ ءبارى الىپ-قاشپا ءسوز بولىپ شىعار ەدى», - دەدى ول بارسەلوناداعى «ەل-پرات» اەروپورتىندا جۋرناليستەرگە.
بۇدان الدىن گەرمانيا بيلىگى لاينەر بورتىندا تەراكت بولعانىن بايقاتاتىن ايعاقتىڭ جوق ەكەنىن جاريالاعان ەدى. فرانتسۋزدىڭ اۆيااپاتتار جونىندەگى ساراپشىسى روببەر گالان سونداي-اق مەيلىنشە ىقتيمال بولجامنىڭ اۋا رايى جاعدايىنىڭ كۇرت ناشارلاپ كەتۋى نەمەسە پيلوتتىڭ قاتەلىگى بولىپ تابىلاتىنىن مالىمدەگەن بولاتىن.
مۇرات ايتقوجا.
مانبە, سۋرەت: Interfax.