جامبىل وبلىسى ءىىد ۇيىمداسقان قىلمىسقا قارسى كۇرەس باسقارماسىنىڭ قىزمەتكەرلەرى قولىنا جول سومكە ۇستاعان قىرعىز رەسپۋبليكاسىنىڭ تۇرعىنىن تەكسەرۋ بارىسىندا, ودان كالاشنيكوۆ اۆتوماتىن, ماكاروۆ تاپانشاسىن, ماگازينى مەن ۇڭعىسىنا دىبىس تۇنشىقتىرعىش ورناتىلعان پسن تاپانشاسىن, ءارتۇرلى كاليبرلى 55 وق دارىلەرىن تاركىلەدى.
جەدەل ءىس-شارا ءىىد باستىعى, پوليتسيا پولكوۆنيگى بەكەت ايماعامبەتوۆتىڭ جەكە قاداعالاۋىمەن وتكىزىلدى. ويتكەنى, اتىس قارۋلارىن الىپ وتپەك بولعان كۇدىكتىنى تۇتقىنداۋ بويىنشا ارنايى وپەراتسيا ەكى اپتاعا سوزىلدى. اسا قىراعىلىقتى تالاپ ەتەتىن وسى جاۋاپتى كۇندەرى جامبىلدىق پوليتسەيلەر قر ۇقك 2035 اسكەري ءبولىمىنىڭ شەكاراشىلارىمەن بىرگە شەكارا بۇزۋشى ءوتۋى مۇمكىن ايماقتى بىرلەسىپ كۇزەتكەن. اقىرى مەركى اۋدانىنداعى گرانيتوگورسك بەكەتى ماڭىنداعى سۋ بوگەتىنەن وتپەكشى بولعان قىرعىز رەسپۋبليكاسى شۋ وبلىسىنىڭ تۇرعىنى قولعا ءتۇستى. شەكارا بۇزۋشىنىڭ ايتۋىنشا, الەكساندروۆكا اۋىلىنىڭ بەلگىسىز ەكى ازاماتى وعان قارۋى بار سومكەنى بەس مىڭ سومعا (شامامەن 15 مىڭ تەڭگە) وتكىزىپ بەرۋدى وتىنگەن.
قازىرگى تاڭدا 63 جاستاعى كۇدىكتى قاماۋدا وتىر. ول تيىسىنشە قارۋدى زاڭسىز ساتىپ العانى, ساقتاعانى, تاسىمالداعانى نەمەسە قارۋدى الىپ جۇرگەنى جانە ونى كەدەندىك شەكارادان وتكىزگەنى ءۇشىن قر قك 250 جانە 251-باپتارى بويىنشا بەس جىلعا دەيىن باس بوستاندىعىنان ايىرىلماق.
كوسەمالى ساتتىباي ۇلى, جامبىل وبلىسى.