«قازمۇنايگاز» ۇك» اق باسقارما توراعاسى ساۋات مىڭباەۆ اتالعان كومپانيانىڭ بىرىڭعاي كادرلىق رەزەرۆكە تىركەلگەن قىزمەتكەرلەرىمەن كەزدەستى. وعان سونداي-اق, بىرىڭعاي كادرلىق رەزەرۆكە ۇمىتكەرلەردى ىرىكتەۋگە قۇرىلعان كوميسسيا قۇرامى دا قاتىستى.
«جاس كەلسە – ىسكە» دەيتىن قازاق قاي كەزدە دە باتىر بولار بالاسىن جاس دەپ باسىنباي, قايتا «ارقادان قاعىپ», قولداپ-قولپاشتاپ, ءبىلىمدى ۇرپاقتىڭ كىشىلىگىن كەمسىتپەي, كەرىسىنشە كوتەرمەلەپ وتىرعان. ءيا, «بۇلاق كورسەڭ كوزىن اش» دەگەن دانالىق ءسوز دە وسىندايدا ايتىلسا كەرەك-ءتى. «قازمۇنايگاز» كومپانياسىنىڭ رەزەرۆتىك مامانداردى ىرىكتەۋىنىڭ ءوزى بولاشاق باسشىلاردىڭ قارىم-قابىلەتىن ەرتە بايقاپ, ولاردىڭ تالپىنىسىنا تامىر تارتىپ, ۇمتىلىستارىن شىڭداۋعا باعىتتالعان ەكەن. وسىنداي جاس مامانداردىڭ باسىن قوسقان كەزدەسۋدە ساۋات مىڭباەۆ جينالعانداردى بىرىڭعاي كادرلىق رەزەرۆكە الىنۋلارىمەن قۇتتىقتادى. ول سونداي-اق, «قازمۇنايگاز»-دىڭ ۇزاق مەرزىمدى دامۋىنداعى باسىم باعىتتارىنىڭ ءبىرى – بولاشاعى زور جاس كوشباسشىلاردى ىزدەپ, زاماناۋي قۇزىرەتتى مەڭگەرگەن, جاڭا تۇرپاتتاعى باسشىلاردى دايىنداۋ ماقساتىنداعى كادرلىق رەزەرۆتى دايىنداۋ ەكەنىن باسا ايتتى.
ارينە, كومپانيا باسشىلارى بيزنەستى ترانسفورماتسيالاۋ اياسىندا رەزەرۆتەگى قىزمەتكەرلەرگە ۇلكەن ءۇمىت ارتادى, سەبەبى, وزدەرىنىڭ قاجىرلى ەڭبەكتەرى مەن جوعارى بىلىكتىلىكتەرىنىڭ ارقاسىندا ولار «قازمۇنايگاز» كومپانياسىنىڭ العا قويعان ستراتەگيالىق ماقساتتارى مەن مىندەتتەرىن جۇزەگە اسىرۋعا ەلەۋلى ۇلەس قوسادى دەگەن زور سەنىمدە.
بۇگىندە «قازمۇنايگاز» ۇك اق ترانسفورماتسيالاۋ باعدارلاماسىن ويداعىداي جۇزەگە اسىرۋدا. مىنە, بىرىڭعاي كادرلىق رەزەرۆتى قالىپتاستىرۋ جوباسى دا وسى باعدارلامانىڭ ءبىر بولشەگى بولىپ تابىلادى.
كەزدەسۋ بارىسىندا رەزەرۆتەگى قىزمەتكەرلەردى تانىستىرعان كوميسسيا مۇشەلەرى – باسقارۋشى ديرەكتورلار دا ءسوز سويلەدى. سونداي-اق, «سامۇرىق-قازىنا» ۇاق اق-نىڭ ادام رەسۋرستارىن باسقارۋ بويىنشا باس ديرەكتورى د.كريۋسبەرگ تە قاتىستى. ال «قازمۇنايگاز» ۇك ادامي رەسۋرستاردى باسقارۋ جانە ەڭبەكاقى تولەۋ جونىندەگى باسقارۋشى ديرەكتورى س ەرىك ابدەنوۆ ءوز كەزەگىندە بۇل كەزدەسۋدىڭ ماڭىزدىلىعىن ەرەكشە اتادى.
«كادرلىق رەزەرۆ قۇرۋ – بۇل ترانسفورماتسيا باعدارلاماسىنىڭ ىشىندەگى شۇعىل جوبا. نەگە دەسەڭىز, قازىرگى تاڭدا بىزدەگى باسشىلىقتا جۇرگەن ازاماتتار – مۇناي-گاز سالاسىندا جىلدار بويى جۇمىس ىستەگەن تاجىريبەلى مىقتى قۇرام. بىراق بۇگىندە ولاردىڭ كوپشىلىگىنىڭ جاسى ەلۋدەن اسقان, ياعني, باسشىلىق قۇرامنىڭ ەلۋ پايىزدان استامى ەلۋ جاستان اسقان ازاماتتار. ەندى بۇل ماسەلە 5-10 جىلدىڭ ىشىندە ۇلكەن پروبلەمالار تۋدىرۋى مۇمكىن. كوپ ازاماتتارىمىز ءتيىستى زەينەت جاسىنا جەتەدى. سونىمەن, جاڭا باسشىلار كەرەك بولادى. وسى جاڭا باسشىلاردى الدىن الا دايىنداۋ ماسەلەسىن بىرىڭعاي كادرلىق رەزەرۆ شەشەدى», دەدى ول.
قازاقستاننىڭ مۇناي-گاز سالاسى – ۇنەمى وزگەرىس جاعدايىندا قارقىندى دامىپ كەلە جاتقان سالا. سوعان سايكەس تەحنيكا مەن تەحنولوگيانىڭ قازىرگى دەڭگەيىن سيپاتتايتىن قىزمەتكەرلەر بىلىكتىلىكتەرى مەن تالاپتارىنىڭ ورىندالۋى قاجەت. اسىرەسە, باسشىلىق قۇرامنىڭ, زاماناۋي تەحنولوگيانى مەڭگەرگەن, «بەس قارۋى» ساي بولعانى ابزال. ال بۇل تۇرعىدان العاندا, جوعارىدا اتالعان جوبا نەگىزىندە بولاشاق مامانداردى ەرتە باستان بارلىق جاعىنان وقىتىپ-جەتىلدىرىپ, تولىققاندى كوشباسشى رەتىندە قالىپتاستىرۋعا مۇمكىندىك بار.
بىرىڭعاي كادرلىق رەزەرۆ باعدارلاماسىنىڭ نەگىزگى ماقساتى –باسقارۋشىلىق قىزمەتتە بولاشاق باسشىلاردىڭ ءداستۇر ساباقتاستىعىن قامتاماسىز ەتۋ ءۇشىن ولاردى ماقساتتى تۇردە جۇيەلى دايىنداۋ, سونىمەن قاتار, ۇزدىك جۇمىسكەرلەرگە قمگ كومپانيالار توبىندا لاۋازىمدارىن جوعارىلاتۋعا, وسۋگە مۇمكىندىك بەرۋ. ال كادرلىق رەزەرۆتىڭ قاتىسۋشىلارى قاتاڭ باقىلاۋدا كانديداتتاردىڭ كاسىبي جانە جەكە قاسيەتتەرىن ناقتى ءارى ايقىن باعالاۋ ناتيجەسىندە بايقاۋدان وتكەن «قازمۇنايگاز» كومپانيالار توبىنىڭ قىزمەتكەرلەرى بولىپ تابىلادى.
جالپى, رەزەرۆ قۇرامىنا بارلىعى 99 كانديدات قامتىلىپ, ولاردىڭ ىشىنەن اسسەسسمەنت باعالاۋ مەن كوميسسيا شەشىمىن ەسكەرۋ ناتيجەسىندە قازىرگى كۇنى بۇل قۇرامعا 30 ادام ىرىكتەلىپ الىنىپتى. رەزەرۆتەگى 30 ادامنىڭ 18-ءى – كورپوراتيۆتىك ورتالىقتىڭ قىزمەتكەرلەرى, 12-ءسى – قمگ كومپانيالار توبىنىڭ قىزمەتكەرلەرى. ءاربىر رەزەرۆتەگى ادامعا جەكە جوسپار بەكىتىلگەن, وندا ءارى قارايعى دامۋعا ارنالعان قۇزىرەت پەن سالالار كورسەتىلگەن. سونداي-اق, ءار رەزەرۆتەگى ادامعا ءارى قارايعى قىزمەتتىك ءوسۋ جولدارى كورسەتىلگەن لاۋازىمدىق جوسپاردىڭ دا بەكىتىلگەنىن ايتا كەتكەن ءجون.
كومپانيا ءوز كەزەگىندە رەزەرۆتەگىلەردىڭ ءبىلىم الىپ, ءوسۋى ءۇشىن بارلىق قاجەتتى جاعدايدى جاسايدى. يا, «بولار بالا بەسىگىندە بۇلقىنار» دەمەكشى, كومپانيانىڭ بولاشاق باسشىلارى ەڭبەك تاجىريبەلەرىندەگى العاشقى قادامدارىنان-اق قارىم-قابىلەتتەرىن تانىتىپ, كوكەيگە قونىمدى ءبىلىم-بىلىك, ۇتىمدى يدەيالارىمەن كوزگە تۇسكەن ەكەن. جيىنعا قاتىسقان سايدىڭ تاسىنداي وتىز قىز-جىگىت كەزدەسۋدە بىرىنەن سوڭ ءبىرى جۇرت الدىنا شىعىپ ءسوز سويلەپ, وزدەرىنىڭ بۇل ىرىكتەۋگە قاتىسىپ, ودان ۇزدىك شىققاندارىنا ريزاشىلىقتارىن ءبىلدىردى. «ماسەلە, بولاشاقتا باستىق بولۋ عانا ەمەس, ءبىز ءوزىمىزدى بار جاعىنان كورسەتكىمىز كەلەدى, مامان رەتىندە وسكىمىز كەلەدى, ءبىلىمىمىزدى شىڭداعىمىز كەلەدى» دەگەن ويلارىن بىلدىرگەن جاس ماماندار, بولاشاقتا كومپانيا ءۇشىن, جالپى ەل ەكونوميكاسىنىڭ وركەندەۋى جولىندا بارىنشا ايانباي قىزمەت ەتەتىندەرىن جەتكىزدى.
داۋلەت قاناشاەۆ, «قازگەرمۇناي» بك جشس:
– كادرلىق رەزەرۆ قۇرامىنا وتكەن ءاربىر قىزمەتكەر ءوزىنىڭ جەكە كادرلىق جوسپارىن انىق بىلەدى. بۇل بۇگىنگى كەزدەسۋ بارىسىندا دا ايقىندالدى. مەنىڭ جوسپارىم بويىنشا بۇل تەك قانا لاۋازىمدىق ساتىدان جوعارىلاۋ ەمەس, مامان رەتىندە ءوسۋدىڭ ۇلكەن مۇمكىندىگى. ءوزىمىزدى بارىنشا جەتىلدىرۋگە بار جاعداي جاسالعان. بىزگە وسىنداي مۇمكىندىك بەرىپ وتىرعان «قازمۇنايگاز» كومپانياسى باسشىلىعىنا العىسىمىز زور. ءوز تاراپىمىزدان بىزگە ارتىلعان ءۇمىتتى اقتاۋعا ۇمتىلامىز.
رەنات ساليكوۆ, «پاۆلودار مۇنايحيميا زاۋىتى» جشس:
– مەن بۇل زاۋىتتا جۇمىس ىستەگەنىمەن جەتى جىل. بۇل ارالىقتا لاۋازىمدىق قىزمەتتىڭ ەڭ كىشى ساتىسىنان باستاپ, بۇگىندە تەحنولوگيالىق قوندىرعىلار ءبولىمىنىڭ باستىعى قىزمەتىنە دەيىن كوتەرىلدىم. بۇل باعدارلامانىڭ ماڭىزى الدىمەن ءوزىمىزدىڭ جەكە قارىم-قابىلەتىمىزدى دامىتۋدىڭ كوزى, ماقساتتارعا جەتۋدىڭ جولى, ويدا بار يدەيالاردى جۇزەگە اسىرۋدىڭ كىلتى دەپ بىلەمىن. ءبىر سوزبەن ايتقاندا, بۇل ادامنىڭ مامان رەتىندەگى ءوسۋ جولىنداعى – ۇلكەن مۇمكىندىگى.
ايجان كيريباەۆا, «قازمۇنايگاز» ۇك اق:
– ءوزىمدى كادرلىق رەزەرۆ قۇرامىنان كورۋ مەن ءۇشىن قۋانىش. مۇنداي مۇمكىندىك بەرگەن ادامي رەسۋرستار دەپارتامەنتى باسشىلىعىنا العىسىم شەكسىز. كادرلىق رەزەرۆ قۇرامىنداعىلاردىڭ بارىنە اق جول تىلەيمىن. مەنىڭشە, كوپ نارسە وزىمىزگە بايلانىستى. «ادامدى ادام ەتەتىن – ەڭبەك» دەمەكشى, ايانباي ەڭبەك ەتكەن ادام ايتەۋىر شىڭعا شىعارى انىق. ال قىزمەتكەرلەرىمىزدىڭ ەڭبەگىن باعالاپ, ولارعا وسىنداي مۇمكىندىك بەرىپ وتىرعان كومپانيامىزبەن ماقتانامىز. تەك قانا العا!
تولەگەن ەرمۇحامبەتوۆ, «قازمۇنايگاز» ۇك اق:
– ءبىز وزىمىزگە ارتىلعان زور جاۋاپكەرشىلىكتى جاقسى سەزىنەمىز. سەبەبى, ءبىز بولاشاق باسشىمىز دەگەن ويدىڭ جەتەگىندە ەمەس, بولاشاقتا كومپانيانى وركەندەتە ءتۇسۋ ءۇشىن نە ىستەي الامىز دەگەن ماسەلەنىڭ جەتەگىندە جۇرۋگە ءتيىسپىز. بۇل تۇرعىدا بۇگىن وزدەرىڭىز كەزدەسكەن وتىز قىزمەتكەر دە لايىقتى ورىندارىن بىلەدى دەپ ويلايمىن. ءبىز ءوزىمىزدى جەتىلدىرە وتىرىپ, كومپانيانىڭ قۋاتىن ارتتىرۋعا كۇش سالامىز.
دينارا بىتىكوۆا,
«ەگەمەن قازاقستان».