ۇكىمەت داۋىس بەرۋ قورىتىندىسى بويىنشا «قازاقستان بالالارى» بىرىڭعاي تۇجىرىمداماسىن بەكىتتى, دەپ حابارلايدى Egemen.kz.
تۇجىرىمدامانى بەكىتۋ بارىسىندا پرەمەر-مينيستر بالالارعا جان-جاقتى قامقورلىق جاساۋ – مەملەكەتتىڭ باستى باسىمدىقتارىنىڭ ءبىرى ەكەنىنە توقتالىپ, ءتيىستى مينيسترلىككە بىرقاتار تاپسىرما بەردى.
«وقۋ-اعارتۋ مينيسترلىگى مۇددەلى مەملەكەتتىك ورگاندارمەن, اكىمدىكتەرمەن بىرلەسىپ, تۇجىرىمداماداعى بارلىق ءىس-شارالاردىڭ ساپالى ءارى ۋاقتىلى ورىندالۋىن قامتاماسىز ەتسىن. بۇعان قوسا بالا قۇقىقتارى جونىندەگى ۋاكىلمەن ءتيىمدى ءوزارا ءىس-قيمىلدى جولعا قويۋ كەرەك. مادەنيەت جانە اقپارات مينيسترلىگىمەن بىرلەسىپ, «قازاقستان بالالارى» تۇجىرىمداماسىن ىسكە اسىرۋ بويىنشا اقپاراتتىق ناۋقاندى ۇيىمداستىرىپ, جوسپارلانعان ءىس-شارالار مەن ولاردىڭ ورىندالۋى تۋرالى حالىقتى اشىق ءارى تۇسىنىكتى جولمەن حاباردار ەتىپ وتىرسىن», دەدى ولجاس بەكتەنوۆ.
جالپى ۇيلەستىرۋ پرەمەر-ءمينيستردىڭ ورىنباسارى – مادەنيەت جانە اقپارات ءمينيسترى ايدا بالاەۆاعا بەكىتىلدى.
ەسكە سالايىق, ولجاس بەكتەنوۆ ۇكىمەت وتىرىسىندا بالالار مەن جاسوسپىرىمدەردىڭ دۇرىس تاماقتانۋ ماسەلەسىن كوتەردى.