ChatGPT كامەلەتكە تولماعان پايدالانۋشىلاردى قورعاۋدى كۇشەيتۋ ماقساتىندا ولاردىڭ جاسىن اۆتوماتتى تۇردە ايقىندايتىن جۇيەنى ىسكە قوسادى, دەپ جازادى Egemen.kz.
جاڭا جۇيە OpenAI پلاتفورماسىندا قولدانۋشىنىڭ اككاۋنتى قاشان اشىلعانىن, قانشالىقتى ءجيى پايدالاناتىنىن جانە قانداي سۇراقتار قوياتىنىن قاراپ, ونىڭ 18 جاسقا تولعان-تولماعانىن شامالاپ انىقتايدى. ەگەر جۇيە پايدالانۋشىنى ءجاسوسپىرىم دەپ تاپسا, ChatGPT اۆتوماتتى تۇردە قوسىمشا قاۋىپسىزدىك رەجيمىنە كوشەدى. بۇل رەجيمدە زورلىق-زومبىلىق, سەكسۋالدىق مازمۇن, وزىنە زيان كەلتىرۋ جايلى اقپارات جانە قاۋىپتى ارەكەتكە يتەرمەلەيتىن ونلاين چەللەندجدەر كورسەتىلمەيدى.
كومپانيا وكىلدەرىنىڭ ايتۋىنشا, جاستى انىقتايتىن بۇل جۇيە بالالاردىڭ دامۋ ەرەكشەلىكتەرىن زەرتتەگەن عىلىمي ەڭبەكتەر مەن ساراپشىلاردىڭ تۇجىرىمدارىنا سۇيەنىپ جاسالعان. سوعان قاراماستان, جاسوسپىرىمدەر ChatGPT-ءدى ساباق وقۋىنا, شىعارماشىلىق جۇمىسقا جانە انىقتامالىق اقپارات ىزدەۋگە بۇرىنعىداي پايدالانا بەرەدى.
OpenAI ChatGPT-ءدىڭ تەگىن نۇسقاسىندا جارنامانى ىسكە قوسادى
بۇل جاڭارتۋ ينتەرنەتتەگى بالالاردىڭ قاۋىپسىزدىگىنە مەملەكەتتەر كوبىرەك كوڭىل بولە باستاعان كەزەڭدە جاريالاندى. قازىر ەۋرووداق ەلدەرىندە 16 جاسقا دەيىنگى بالالارعا الەۋمەتتىك جەلىلەردى شەكتەۋ ماسەلەسى تالقىلانىپ جاتىر. ال اۆستراليادا مۇنداي تىيىم كۇشىنە ەنگەن, بىراق ول تالاپ ChatGPT-گە تىكەلەي قاتىستى ەمەس.
تاقىرىپتىڭ وزەكتىلىگىن ارتتىرعان تاعى ءبىر جاعداي – كاليفورنيادا OpenAI مەن ونىڭ باس ديرەكتورى سەم ولتمانعا قارسى سوت ءىسىنىڭ قوزعالۋى. 16 جاستاعى ءجاسوسپىرىمنىڭ اتا-اناسى پلاتفورما بالاسىنىڭ پسيحولوگيالىق جاعدايىنا كەرى اسەر ەتتى دەپ ەسەپتەيدى. بۇعان دەيىن كومپانيا اتا-انالارعا ارنالعان باقىلاۋ مۇمكىندىكتەرىن ەنگىزگەن. ونىڭ ىشىندە چات-بوتتىڭ بەلگىلى ءبىر ۋاقىتتا جۇمىس ىستەمەۋى جانە اڭگىمە بارىسىندا قاۋىپتى بەلگىلەر بايقالسا, ەسكەرتۋ بەرۋ فۋنكتسياسى بار.
ەگەر جۇيە قولدانۋشىنىڭ جاسىن قاتە انىقتاسا, ول كامەلەتكە تولعانىن دالەلدەۋ ءۇشىن ونلاين سەلفي جىبەرىپ نەمەسە جەكە كۋالىگىنىڭ كوشىرمەسىن جۇكتەي الادى. بۇعان دەيىن ۇلىبريتانيادا بيلىك پارتياسىنىڭ دەپۋتاتتارى دا 16 جاسقا دەيىنگىلەرگە الەۋمەتتىك جەلىلەردى پايدالانۋعا تىيىم سالۋدى ۇسىنعان. تسيفرلانۋ كۇشەيگەن سايىن, الەم ەلدەرى بالالار مەن جاسوسپىرىمدەردىڭ ينتەرنەتتەگى قاۋىپسىزدىگىن قاتاڭ باقىلاۋعا كوشىپ جاتىر.
وسى ءۇردىس الەمنىڭ بىرنەشە ەلدەرىندە قولداۋ تاپقان. ايتالىق اۋستراليادا ون التىعا تولماعان جەتكىنشەكتەر الەۋمەتتىك جەلىنى پايدالانا المايدى. جەرگىلىكتى جۇرتقا ەنگىزگەن زاڭنىڭ كىلتيپاندارىن ارنايى جازعان بولاتىنبىز.
بۇل جاڭالىق ءبىزدىڭ ەلىمىزدە دە جاڭعىرىپ جاتقانى جاسىرىن ەمەس. كۇنى كەشە پرەمەر-ءمينيستردىڭ ورىنباسارى – مادەنيەت جانە اقپارات ءمينيسترى ايدا بالاەۆا ۇكىمەت وتىرىسىندا بۇقارالىق اقپارات قۇرالدارى سالاسىنداعى زاڭنامانى جەتىلدىرۋ تۋرالى مالىمدەمە جاسادى.ء مينيستردىڭ ايتۋىنشا, 16 جاسقا تولماعان ازاماتتاردىڭ الەۋمەتتىك جەلىلەردە ءوز بەتىنشە تىركەلۋىنە تىيىم سالۋدى كوزدەيتىن قۇقىقتىق نورمالار ازىرلەندى. بۇل ەرەجەلەر ونلاين-پلاتفورمالار مەن باق تۋرالى زاڭ جوبالارىنا ەنگىزىلىپ, قازىرگى تاڭدا قوعامدىق تالقىلاۋعا ۇسىنىلعان.