ۇلتتىق قۇرىلتايدىڭ V وتىرىسىندا مەملەكەت باسشىسى قاسىم-جومارت توقاەۆ مەملەكەتتىك كەڭەسشى لاۋازىمىن جويۋ جوسپارى بار ەكەنىن مالىمدەدى. پرەزيدەنتتىڭ ايتۋىنشا, بۇل شەشىم مەملەكەتتىك باسقارۋ جۇيەسىن ىقشامداۋ جانە اپپاراتتىق قۇرىلىمداردى وڭتايلاندىرۋ اياسىندا قابىلدانىپ وتىر, دەپ جازادى Egemen.kz.
«قولدانىستاعى پارلامەنتتىڭ قىزمەتىن قامتاماسىز ەتەتىن بىرقاتار اپپاراتتىق قۇرىلىممەن بىرگە مەملەكەتتىك كەڭەسشى لاۋازىمى دا قىسقارتۋعا جاتادى», دەدى مەملەكەت باسشىسى قۇرىلتاي وتىرىسىندا سويلەگەن سوزىندە.
ەلىمىزدە ارنايى كونستيتۋتسيالىق كوميسسيا قۇرىلاتىن بولدى
ەسكە سالساق, مەملەكەتتىك كەڭەسشىنىڭ مارتەبەسى مەن وكىلەتتىگى تۋرالى جارلىققا پرەزيدەنت 2022 جىلعى ماۋسىم ايىندا قول قويعان بولاتىن. قۇجاتقا سايكەس, مەملەكەتتىك كەڭەسشى رەسپۋبليكانىڭ لاۋازىمدى تۇلعاسى سانالادى, ونى قىزمەتكە پرەزيدەنت تاعايىندايدى جانە قىزمەتتەن بوساتادى. مەملەكەتتىك كەڭەسشى مەملەكەت باسشىسىنىڭ تىكەلەي باسشىلىعىمەن جۇمىس ىستەپ, سوعان ەسەپ بەرەدى ءارى سونىڭ باقىلاۋىندا بولادى.
بۇل قىزمەتكە مەملەكەتتىك حاتشى بولعان ەرلان قارين تاعايىندالعان ەدى.
قازىرگى تاڭدا قىزىلوردا قالاسىندا ۇلتتىق قۇرىلتايدىڭ V وتىرىسى ءوتىپ جاتىر. جيىن 12 قاڭتاردا جاريالانعان. پرەزيدەنتتىڭ كومەكشىسى – ءباسپاسوز حاتشىسى رۋسلان جەلدىباي بۇعان دەيىن حابارلاعانداي, قۇرىلتاي بارىسىندا مەملەكەت باسشىسى قازاقستاننىڭ الداعى دامۋ باعىتتارىن ايقىنداپ, قوعام ومىرىندەگى وزەكتى ماسەلەلەرگە توقتالادى.