جىلداعى ءداستۇر بويىنشا الماتىداعى تەگىن سىرعاناۋ الاڭدارى قالا تۇرعىندارى مەن قوناقتارىنا بيىل دا ايقارا اشىق. دالىرەك ايتقاندا, مۇنداعى جيىرمادان استام مۇز ايدىننىڭ 11-ءى اقىسىز جۇمىس ىستەيدى.
بيىلعى ماۋسىمدا الەۋمەتتىك مۇز ايدىندارى قالانىڭ ءار اۋدانىنداعى حالىق كوپ جينالاتىن ورىنداردا ەسىك اشتى. قىس قىزىعىن قىزىقتاعان مەگاپوليس تۇرعىندارىنا سىرعاناق ورىندارى تۇڭعىش پرەزيدەنت ساياباعىندا, «الماتى ارەنا», «حالىق ارەنا» سپورت كەشەندەرى اۋماعىندا, رەسپۋبليكا سارايى ماڭىندا, 28 پانفيلوۆشىلار, «Kokjiek Garden» جانە «گۇلدەر» ساياباعىندا, قازاق-بريتان تەحنيكالىق ۋنيۆەرسيتەتىنىڭ اۋماعىندا, ناۋرىزباي اۋدانى اكىمدىگىنىڭ الاڭقايىندا ءتۇن جارىمىنا دەيىن ۇزدىكسىز جۇمىس ىستەپ تۇر. قالا تۇرعىندارى مەن قوناقتارى قالاعان ۋاقىتىندا سىرعاناق تەۋىپ, سەرگي الادى. ءتىپتى مۇنداعى ارناۋلى نۇسقاۋشىلار كەلۋشىلەرگە تەگىن كەڭەس بەرىپ, قىزمەت كورسەتەدى.
دەمالۋشىلار وزىمەن بىرگە كونكيلەرىن الا كەلۋگە ءتيىس. سونداي-اق سىرعاناق الاڭدارىنىڭ ماڭىندا تاماقتانۋعا ارنالعان ارناۋلى ورىندار مەن كونكيلەردى جالعا بەرۋ ورتالىقتارى جۇمىس ىستەيدى. ۇيىمداستىرۋ- شىلار جالعا بەرۋ باعاسى قولجەتىمدى بولۋى ءاردايىم قاداعالانىپ وتىراتىنىن ايتادى.
مۇزايدىندارى الماتىنىڭ مىڭ قۇبىلعان اۋا رايىنا ورايلاستىرىلعان. كۇن رايى 10 گرادۋسقا دەيىن جىلىسا دا, سىرعاناق ەرىمەيدى. ياعني الاڭداردىڭ ارناۋلى توڭازىتقىش قۇرالى مۇزدى ەرىتپەۋگە قولايلى تەمپەراتۋرانى قامتاماسىز ەتە الادى. قالا جۇرتشىلىعىنا قۋانىش سىيلاعان الەۋمەتتىك جوبانى جۇزەگە اسىرۋعا جەرگىلىكتى اكىمدىك مۇرىندىق بولعان.
«ويىن-ساۋىق ورتالىقتارىنداعى مۇزايدىندارىنا بارعاندا ءبىراز شىعىندالاتىنبىز. بىلتىردان بەرى وسى تەگىن سىرعاناق الاڭدارىنا كەلەتىن بولدىم. بۇل دا قاراپايىم تۇرعىندار مەن ستۋدەنت جاستارعا جاسالعان ۇلكەن كومەك دەپ ەسەپتەيمىن», دەيدى قالا تۇرعىنى جاندوس الىمعوجا.
سىرعاناق الاڭدارىنىڭ ەسىگى كوكتەمنىڭ العاشقى ايىنا دەيىن اشىق.
الماتى