«كەرەي, قايدا باراسىڭ؟» دەپ جىرلاعان بۇقار بابامىز ءتىرىلىپ كەلسە, قىمباتشىلىقتىڭ قىسىمىن كورىپ,«باعا, قايدا باراسىڭ؟» دەپ تولعايتىنداي كورىنەدى. كىم ءبىلسىن؟ كۇننەن-كۇنگە كەرنەۋى كۇشەيگەن قىمباتشىلىق حالىقتىڭ قالتاسىنا اۋىر سوعىپ وتىر. اسىرەسە, ءۇي الۋ ماسەلەسى كۇن ءتارتىبىنىڭ باسىندا تۇر, دەپ جازادى Egemen.kz.
AERC جۇرگىزگەن ەسەپكە سۇيەنسەك, 2025 جىلدىڭ جەلتوقسانىندا جاڭا تۇرعىن ءۇي باعاسى ءبىر جىلدا 15,7%-عا وسكەن. بىراق, بۇل ءوسىم بارلىق قالادا بىردەي ەمەس. ءبىر وڭىردە باعا قاتتى كوتەرىلسە, ەندى ءبىر جەردە وزگەرىس اسا بايقالمايدى.
ماسەلەن, قوناەۆ پەن پاۆلوداردا جاڭا پاتەرلەر ءبىر جىلدا 23%-عا قىمباتتاعان. الماتىدا ءوسىم 20%-عا جەتسە, استانادا 17,4%-دى قۇرادى. ال پەتروپاۆل مەن سەمەيدە باعا بار بولعانى 2-3 پايىز شاماسىندا عانا كوتەرىلگەن. جەلتوقسان ايىنىڭ وزىندە جاڭا ۇيلەردىڭ قۇنى تاعى 0,4 پايىزعا ارتقان.
باعانىڭ وسۋىمەن قاتار, پاتەر ساتىپ الۋشىلار دا كوبەيىپ كەلەدى. بىلتىر جەلتوقساندا ءبىر ايدىڭ ىشىندە 53 مىڭنان استام ساتىپ الۋ-ساتۋ مامىلەسى جاسالعان. بۇل قاراشا ايىمەن سالىستىرعاندا ۇشتەن بىرىنە جۋىق كوپ. مۇنداي بەلسەندىلىككە بىرنەشە سەبەپ بار. قۇرىلىس كومپانيالارى جاڭا سالىق كودەكسى تالقىلانىپ جاتقان تۇستا قارقىنىن باسەڭدەتپەي وتىر. وعان قوسا, جەڭىلدەتىلگەن يپوتەكا مەن مەملەكەتتىك قولداۋ تەتىكتەرى دە نارىقتى ۇستاپ تۇر.
ەلىمىزدە تۇرعىن ءۇيدى جالعا الۋ باعاسى ءوستى. باسپانا قاي ايماقتا قىمباتقا تۇسەدى؟
ۇلتتىق ستاتيستيكا بيۋروسى دەرەكتەرى جاڭا پاتەردىڭ ورتاشا باعاسى قازىر قانشا ەكەنىن كورسەتەدى. 2025 جىلدىڭ جەلتوقسانىندا ەل بويىنشا ءبىر شارشى مەتردىڭ قۇنى شامامەن 571 مىڭ تەڭگەگە جەتكەن. الماتىدا بۇل كورسەتكىش ەڭ جوعارى, ال ورالدا ەڭ تومەن دەڭگەيدە قالىپ وتىر.
ال Krisha.kz سايتىنداعى حابارلاندىرۋلاردى قاراساڭىز, باعانىڭ ودان دا جوعارى ەكەنىن بايقاۋعا بولادى. مۇندا ءبىر شارشى مەتردىڭ ورتاشا قۇنى 556 مىڭ تەڭگەدەن اسادى, ال ەليتالىق ۇيلەردە باعا ميلليون تەڭگەدەن دە جوعارى.
قىسقاسى, قازىرگى كورىنىس ءبىر نارسەنى اڭعارتادى: تۇرعىن ءۇي نارىعىندا سۇرانىس بار, قوزعالىس بار. سوندىقتان ازىرگە ءۇي باعاسى وزدىگىنەن ءتۇسىپ كەتەدى دەپ كۇتۋ قيىن.
قازاقستاندا تۇرعىن ءۇيدى جالعا الۋ قۇنى 13 پايىزعا ءوستى