قازاقستان مەن وزبەكستان سىرداريا وزەنىندە ون اۆتوماتتاندىرىلعان گيدروبەكەت ورناتۋ جوباسىن ىسكە اسىرۋدى جوسپارلاپ وتىر. گەرمانيانىڭ حالىقارالىق ىنتىماقتاستىق قوعامىنىڭ (GIZ) قولداۋىمەن ازىرلەنگەن بۇل جوبا ترانسشەكارالىق سۋدى ءبولۋدىڭ اشىقتىعى مەن دالدىگىن قامتاماسىز ەتۋگە باعىتتالعان. قازىرگى ۋاقىتتا GIZ وسى جوبا بويىنشا تەحنيكالىق تاپسىرمانى ازىرلەۋ اياقتالدى, دەپ حابارلايدى Egemen.kz.
تۇركىستان قالاسىندا قازاقستان مەن وزبەكستان اراسىنداعى سۋ قاتىناستارىنىڭ بارلىق باعىتى بويىنشا ەكىجاقتى ىنتىماقتاستىقتى تەرەڭدەتۋ باعىتىنداعى بىرلەسكەن جۇمىس توبىنىڭ XIII وتىرىسى, سونداي-اق ورتالىق ازيادا ءوزارا ءتيىمدى ءارى ورنىقتى سۋ-ەنەرگەتيكالىق ىنتىماقتاستىق تەتىگىن ازىرلەۋ جونىندەگى كۇش-جىگەردى ۇيلەستىرۋگە باعىتتالعان قازاق-وزبەك بىرلەسكەن جۇمىس توبىنىڭ II وتىرىسى ءوتتى.
وتىرىستارعا قر سۋ رەسۋرستارى جانە يرريگاتسيا ءمينيسترى نۇرجان نۇرجىگىتوۆ, وزبەكستان رەسپۋبليكاسىنىڭ سۋ شارۋاشىلىعى ءمينيسترى شاۆكات حامراەۆ جانە تۇركىستان وبلىسىنىڭ اكىمى نۇرالحان كوشەروۆ قاتىستى.
وتىرىستا «دوستىق» مەملەكەتارالىق كانالىن تازالاۋ جانە جوندەۋ جۇمىستارى قارالدى. بىلتىر قازاقستان تاراپى كانالدىڭ ۋچاسكەلەرىندە, ەڭىستەرىندە, كوللەكتورلارىندا جانە باس قۇرىلىسجايلارىندا مەحانيكالىق تازالاۋ جۇمىستارىن جۇرگىزدى.
قازاقستان مەن وزبەكستان پرەزيدەنتتەرى بىرلەسكەن جوبالاردى ىسكە قوسۋ راسىمىنە قاتىستى
سونىمەن قاتار نىساننىڭ باس جانە بوگەيتىن قۇرىلىسجايلارىنداعى قاقپالارعا جوندەۋ جۇمىستارى جاسالدى. بيىل «دوستىق» كانالىن مەحانيكالىق تازالاۋ جانە باس قۇرىلىسجايلارىن جوندەۋ جۇمىستارى جالعاسىن تابادى.
تاراپتار سونداي-اق سۋ ۇنەمدەۋ تەحنولوگيالارىن ەنگىزۋ جانە پايدالانۋ سالاسىندا تاجىريبە الماسۋعا كەلىستى. سىرداريا وزەنىندە ار مەملەكەت اۋماعىندا بەس-بەستەن اۆتوماتتاندىرىلعان گيدروبەكەت نىسانىن سالۋ جوسپارلانىپ وتىر.
«بىلتىر ەكى مەملەكەتتىڭ باسشىلارىنىڭ قاتىسۋىمەن ءبىز ترانسشەكارالىق سۋ نىساندارىن بىرلەسىپ باسقارۋ جانە ۇتىمدى پايدالانۋ تۋرالى ۇكىمەتارالىق كەلىسىمگە قول قويدىق. بۇل قۇجات كوپجىلدىق جۇمىستىڭ ناتيجەسى بولدى, سونىڭ ارقاسىندا ترانسشەكارالىق سۋدى باسقارۋدىڭ كەلىسىلگەن تاسىلدەرىن ازىرلەۋ مۇمكىن بولدى. سوندىقتان بۇل كەلىسىمنىڭ قابىلدانۋى تاريحي ماڭىزعا يە وقيعا بولدى. كەلىسىم ورتالىق ازياداعى سۋ ديپلوماتياسىن دامىتۋعا ەلەۋلى ۇلەس قوسادى جانە بولاشاقتاعى ءوزارا ءتيىمدى ىنتىماقتاستىقتىڭ نەگىزگى باعىتتارىن ناقتى ايقىندايدى. ءبىز ەكىجاقتى ارىپتەستىكتى تاتۋ كورشىلىك, ءوزارا قۇرمەت جانە سىندارلى ديالوگ رۋحىندا ودان ءارى دامىتۋعا نيەتتىمىز», دەدى سۋ رەسۋرستارى جانە يرريگاتسيا ءمينيسترى نۇرجان نۇرجىگىتوۆ.
تۇركىستان وبلىسىندا جەمىس-جيدەك وڭدەيتىن زاۋىت ىسكە قوسىلدى