استانا. 24 ناۋرىز. قىرعىزستان استاناسى بىشكەك قالالىق كەنەشىنىڭ دەپۋتاتتارى قىرعىز ۇلتتىق وپەرا جانە بالەت تەاترىنىڭ ساحناسىندا بانكەت وتكىزگەن. ەلدىڭ مادەنيەت مينيسترلىگى مۇنى مورالعا دا, ەتيكاعا دا جاتپايتىن ماسقارا تىرلىك دەپ باعالاپ وتىر. بۇل تۋرالى كيرتاگ ءتىلشىسى حابارلادى.
مۇنىڭ الدىندا, 23 ناۋرىز كۇنى بىرقاتار بۇقارالىق اقپارات قۇرالدارىندا ءبىر توپ جاستاردىڭ وپەرا جانە بالەت تەاترىنىڭ ساحناسىندا مەرەكەلىك داستارحان جايىپ, شۋلى بانكەت ۇيىمداستىرعانى جايلى اقپارلار تاراعان ەدى. باق مالىمەتى بويىنشا, ولاردىڭ اراسىندا بىشكەك قالالىق كەنەشىنىڭ دەپۋتاتى, بەلگىلى قىرعىز وليگارحىنىڭ بالاسى جۋمابەك سالىمبەكوۆ بولعان.
وسىعان وراي قىرعىزستان مادەنيەت, اقپارات جانە تۋريزم مينيسترلىگى بۇگىن, 24 ناۋرىز كۇنى ارنايى مالىمدەمە تاراتىپ, وندا قاتىسۋشىلاردى مورالعا جات جانە ەتيكالىق نورمالارعا سايكەس كەلمەيتىن ارەكەت جاسادى دەپ ايىپتادى.
«اتالمىش شارانىڭ مورالعا جات سيپاتى بار, ول مۇنى ۇيىمداستىرۋشىلار مەن قاتىسۋشىلاردا الدەقانداي ءبىر ەتيكالىق نورمالاردىڭ مۇلدەم بولماعانىن كورسەتىپ وتىر. قازىرگى تاڭدا مينيسترلىك بۇل ماسەلەنىڭ جاي-جاپسارىن تەاتردىڭ باسشىلىعىمەن جانە اكىمشىلىگىمەن بىرگە انىقتاپ جاتىر», - دەلىنگەن ۆەدومستۆو مالىمدەمەسىندە.
ەندى مينيسترلىك ءتيىستى زاڭناماعا سايكەس, تەاتر باسشىلىعىنا قاتىستى بارىنشا قاتاڭ جازا قولدانۋعا ۋادە بەرىپ وتىر.
اتاپ وتە كەتۋ كەرەك, تەاتردىڭ ديرەكتورى تيمۋر سالاماتوۆ كيرتاگ تىلشىسىنە تەاتر ساحناسىندا ەشقانداي دا بانكەت بولماعانىن مالىمدەدى. ءتۇسىرىلىپ الىنعان داستارحان كورىنىستەرى بار بولعانى بۋتافوريا جانە كورسەتىلىمگە ارنالعان بەينەبايان بولعان.
مۇرات ايتقوجا.
مانبە: كيرتاگ.
سۋرەت: ك-News.