سەمەي قالاسىندا ۇلتتىق ويىنداردى دارىپتەۋگە باعىتتالعان «ابايدىڭ زياتكەرلىك ىزىمەن» توعىزقۇمالاق ۇيىرمەسى ءوز جۇمىسىن باستادى. ۇيىرمە اباي وبلىسىنىڭ قوعامدىق كەلىسىم ورتالىعى مەن وڭىرلىك توعىزقۇمالاق فەدەراتسياسىنىڭ بىرلەسۋىمەن اشىلدى, دەپ جازادى Egemen.kz.
ۇيىرمەنىڭ اشىلۋ ءراسىمى وبلىستىق دوستىق ۇيىندە ءوتتى. اتالعان مادەني-سپورتتىق ءىس-شارا مەملەكەت باسشىسى قاسىم-جومارت توقاەۆتىڭ 2025 جىلعى 29 جەلتوقساندا جارلىعىمەن بەكىتىلگەن قازاقستان حالقى اسسامبلەياسىن 2030 جىلعا دەيىن دامىتۋ تۇجىرىمداماسىندا كورسەتىلگەن جاستاردىڭ وي-ءورىسىن كەڭەيتۋ جانە قوعامدىق كەلىسىمدى نىعايتۋ مىندەتتەرى اياسىندا ۇيىمداستىرىلدى.
توعىزقۇمالاق – حالقىمىزدىڭ سان عاسىرلىق وي-ءورىسىن دامىتقان زياتكەرلىك دودا. ول ەسەپكە جۇيرىك بولۋدى, الداعى قادامدى الدىن الا سارالاۋدى جانە تاكتيكالىق ۇتىمتال شەشىم قابىلداۋدى قالىپتاستىراتىن ويىن. سونىمەن قاتار توعىزقۇمالاق ويىنى حاكىم ابايدىڭ دا سۇيىكتى ويىندارىنىڭ ءبىرى بولعانى بەلگىلى. بۇل تۋرالى ابايتانۋشىلار مەن قاتار م.اۋەزوۆتىڭ «اباي جولى» رومانىندا دا كورىنىس بەرەدى. سوندىقتان دا توعىزقۇمالاق ويىنىڭ اباي ەلىندە دامۋى زاڭدى قۇبىلىس بولسا كەرەك.
ماڭعىستاۋلىق وقۋشى توعىزقۇمالاقتان الەم چەمپيونى اتاندى
– بىلتىر پرەزيدەنت جارلىعىمەن بەكىتىلگەن تۇجىرىمداما اياسىندا زياتكەر ۇلت قالىپتاستىرۋ ماقساتىندا وسى يدەيانى قولعا العان بولاتىنبىز. وعان وبلىستاعى ەتنومادەني بىرلەستىكتەرى مەن الەۋمەتتىك سەرىكتەستەرىمىزدى شاقىرىپ وتىرمىز, – دەيدى دوستىق ءۇيىنىڭ ادىسكەرى ەرسىن ورلەۋبەك.
ۇيىرمەنى تاجىريبەلى جاتتىقتىرۋشى لەونيد پارفيەۆ جۇرگىزەدى. ونىڭ ايتۋىنشا, ول توعىزقۇمالاق ويىنىمەن 2000 جىلدان بەرى اينالىسىپ كەلەدى.
– 2016 جىلدان باستاپ سپورت مەكتەبىندە كاسىبي جاتتىقتىرۋشى رەتىندە جۇمىس ىستەدىم. سوڭعى جىلدارى شاكىرتتەرىم حالىقارالىق جارىستاردا جوعارى ناتيجەلەرگە قول جەتكىزگەن. اتاپ ايتقاندا, وتكەن جىلدىڭ قاراشا ايىندا ماليكا اسەمحانوۆا الەم چەمپيونى اتانعان, – دەدى جاتتىقتىرۋشى.
ءىس-شارا بارىسىندا ارداگەرلەر كەڭەسىنىڭ توراعاسى مۇراتقازى ءالين ۇيىرمەنىڭ تاربيەلىك ماڭىزىنا توقتالدى.
توعىزقۇمالاق – ويىن عانا ەمەس, ۇلتتىڭ رۋحاني قازىناسى – ماقسات شوتاەۆ
– مۇنى ۇلكەندەرگە عانا ارنالعان دەگەن تۇسىنىك دۇرىس ەمەس. توعىزقۇمالاق ويىنى جاستار مەن بالالاردىڭ ويلاۋ جۇيەسىن دامىتاتىن ماڭىزدى قۇرال. بۇل ويىن حاكىم ابايدىڭ ءوزى ەرەكشە ءمان بەرگەن زياتكەرلىك مۇرانىڭ ءبىرى, – دەدى ول.
جيىنعا قازاقستان حالقى اسسامبلەياسىنىڭ مۇشەلەرى, اسسامبلەيا جاستارى جانە ەتنومادەني بىرلەستىكتەردىڭ وكىلدەرى قاتىستى. ۇيىرمەنىڭ اشىلۋىنا قاتىسقان ۋليانا اباشەۆانىڭ بۇل تەك زياتكەرلىك ويىن عانا ەمەس, ەتنوسارالىق مادەني بايلانىستىڭ جارقىن ۇلگىسى.
– بۇل – حالقىمىزدىڭ مادەني مۇراسىنىڭ اجىراماس بولىگى. تەرەڭ تاريحى بار ۇلتتىق ۇستەل ويىنى. ۇيىرمەنىڭ اشىلۋى ۇلتتىق قۇندىلىقتاردى ناسيحاتتاۋعا جانە جاستاردىڭ زياتكەرلىك قابىلەتتەرىن دامىتۋعا باعىتتالعان ماڭىزدى قادام بولدى. توعىزقۇمالاق ويىنىنىڭ نەگىزگى ماقساتى – لوگيكالىق ويلاۋدى, ستراتەگيالىق جوسپارلاۋدى, العا قاراي وي قورىتا ءبىلۋدى, سونداي-اق شىدامدىلىق پەن زەيىندىلىكتى دامىتۋ. ويىن بارىسىندا قاتىسۋشىلار قارسىلاستىڭ ءاربىر ءجۇرىسىن تالداپ, دۇرىس شەشىم قابىلداۋعا, ءوز ارەكەتتەرىن الدىن الا جوسپارلاۋعا ۇيرەنەدى. ۇيىرمەنىڭ اشىلۋ بارىسىندا ءبىز توعىزقۇمالاق ويىنىنىڭ شىعۋ تاريحىمەن, ەرەجەلەرىمەن جانە نەگىزگى قاعيدالارىمەن تانىستىق. ءىس-شارا وتە قىزىقتى ءارى اسەرلى ءوتتى. ساباق بارىسىندا بارشا قاتىسۋشىلار بەلسەندىلىك تانىتىپ, ويىنعا دەگەن ۇلكەن قىزىعۋشىلىق كورسەتتى. الداعى ۋاقىتتا ۇيىرمە جۇمىسىنا تۇراقتى تۇردە قاتىسىپ, توعىزقۇمالاق ويىنىن تەرەڭىرەك مەڭگەرىپ, ويىن شەبەرلىگىن جەتىلدىرگىمىز كەلەدى. ۇلتتىق ويىن ارقىلى زياتكەرلىك قابىلەتتەرىمىزدى دامىتىپ, مادەني مۇرامىزعا دەگەن قۇرمەتىمىزدى ارتتىرامىز دەپ سەنەمىز, – دەيدى ول.
ۇيىمداستىرۋشىلاردىڭ ايتۋىنشا, ۇيىرمەنىڭ باستى ماقساتى ۇلتتىق زياتكەرلىك ويىنداردى كەڭىنەن ناسيحاتتاۋ عانا ەمەس, سونىمەن قاتار ەتنوسارالىق تاتۋلىقتى نىعايتىپ, ورتاق قىزىعۋشىلىق نەگىزىندە جاستاردى بىرىكتىرۋ. توعىزقۇمالاق ادال باسەكەنى دارىپتەپ قانا قويماي, جاستاردىڭ ءبىر-بىرىمەن جاقىن ارالاسىپ, ورتاق ىسكە ۇيىسۋىنا مۇمكىندىك بەرمەك.
اباي وبلىسى