بيىل مەملەكەت باسشىسى مەديتسينا قىزمەتكەرلەرىن قۇقىقتىق قورعاۋدى كۇشەيتۋ تۋرالى زاڭعا قول قويدى. اتالعان زاڭ قىلمىستىق كودەكسكە مەديتسينا قىزمەتكەرلەرىن, سونداي-اق جەدەل مەديتسينالىق جاردەم بريگادالارى جۇرگىزۋشىلەرىنىڭ ومىرىنە, دەنساۋلىعىنا قاۋىپ توندىرگەن ازاماتتاردى قىلمىستىق جاۋاپكەرشىلىككە تارتاتىن جاڭا باپتى ەنگىزۋدى كوزدەيدى.
دەنساۋلىق ساقتاۋ مينيسترلىگىنىڭ مالىمەتىنشە, 2019 جىلدان بەرى قاراي ەلىمىزدە دارىگەرلەرگە, فەلدشەرلەرگە, دەنساۋلىق ساقتاۋ سالاسىنىڭ وزگە دە قىزمەتكەرلەرىنە 280-نەن اسا شابۋىل جاسالعان. بىلتىردىڭ وزىندە عانا وسىنداي 58 دەرەك تىركەلىپ وتىر. مىسالى, وسىدان ەكى جىل بۇرىن قوستاناي وبلىستىق جەدەل مەديتسينالىق جاردەم قىزمەتىنىڭ فەلدشەرى انەل بايمۇرزينا سوققىعا جىعىلىپ, اۋرۋحاناعا جاتىپ شىقتى. وتكەن جىلى ۋرولوگ-دارىگەر انتون كيستانوۆ اۋىر سوققى الىپ, جانساقتاۋ بولىمىنە ءتۇستى.
مەملەكەت باسشىسى مۇنداي كەلەڭسىز وقيعالاردىڭ «زاڭ جانە ءتارتىپ» قاعيداتتارى اياسىندا قاتاڭ جولىن كەسۋدى تاپسىرىپ وتىر. وسىعان وراي, قوستاناي وبلىسى دەنساۋلىق ساقتاۋ سالاسىنىڭ ارداگەرلەرى ەلىمىزدە مەديتسينا قىزمەتكەرلەرىن قورعاۋ ماقساتىندا ىسكە اسىرىلىپ جاتقان دايەكتى شارالار مەن پرەزيدەنتتىڭ وسى باعىتتاعى ايقىن ۇستانىمىنا ريزاشىلىق ءبىلدىرىپ وتىر.
«بۇدان بىلاي مەديتسينالىق قىزمەتكەرلەر مەن جەدەل جاردەم كولىگىنىڭ جۇرگىزۋشىلەرىنە كۇش كورسەتىپ, زورلىق-زومبىلىق جاساعان ازاماتتار قاتاڭ قىلمىستىق جاۋاپكەرشىلىككە تارتىلادى. ءتىپتى 12 جىلعا دەيىن باس بوستاندىعىنان ايىرىلۋى مۇمكىن. مەن 40 جىل بويى دارىگەر بولىپ جۇمىس ىستەدىم. جۇمىس بارىسىندا كەيدە ۇستىمىزدەن شاعىم ءتۇسىپ, وكپە-رەنىش ايتىلىپ جاتاتىن كەزدەر دە بولدى. ءبىز مۇنىڭ جاقىن ادامى ءۇشىن شىرىلداعان جاناشىر جاننىڭ جان اشۋى ەكەنىن تۇسىنەتىنبىز. الايدا كەيىنگى جىلدارى مەديتسينا قىزمەتكەرلەرى كاسىبي مىندەتىن اتقارۋ بارىسىندا زورلىق-زومبىلىق كورىپ, ءتىپتى اۋىر سوققىعا جىعىلىپ جاتقانى جاسىرىن ەمەس. جانى قينالىپ جاتقان اۋىر ناۋقاسقا جانۇشىرا جەتكەن ارىپتەستەرىمىزدىڭ تەكتەن-تەك تاياققا جىعىلىپ, اۋرۋحاناعا تۇسكەنىن كورىپ, تالاي رەت شاراسىزدىقتان جانىمىز كۇيىپ, وزەگىمىز ورتەنگەن. دارىگەردى قاشاندا دارىپتەپ, قۇرمەت كورسەتىپ كەلگەن حالىق ەدىك. ءبىز وزىمىزگە ەشقاشان ەرەكشە جاعداي جاسايتىن مارتەبە سۇراعان ەمەس. تەك قىزمەتىمىزدىڭ قاۋىپسىز بولۋىن, كوپشىلىكتىڭ دارىگەرگە سىي-قۇرمەتپەن قاراۋىن قالايمىز. وسى تىلەگىمىزدى مەملەكەت ەستىسە ەكەن دەگەن ۇمىتتە جۇردىك. بيىل پرەزيدەنتىمىز قاسىم-جومارت توقاەۆ قول قويعان زاڭ – ەلىمىزدە مەديتسينا قىزمەتكەرلەرىنە قاتىستى زورلىق-زومبىلىققا ەشقانداي جول بەرىلمەيتىنىن, زاڭنىڭ قاشاندا ۇستەم ەكەندىگىن, «زاڭ جانە ءتارتىپ» تۇجىرىمداماسىنىڭ قاعيدالارى كەزەڭ-كەزەڭىمەن جۇيەلى تۇردە ىسكە اسىرىلىپ جاتقانىن ايقىن كورسەتىپ وتىر», دەيدى دەنساۋلىق ساقتاۋ سالاسىنىڭ ارداگەرى, قازاقستاننىڭ ەڭبەك سىڭىرگەن دارىگەرى كوپەي مالشىباەۆا.
قوستاناي وبلىسى