استانا. 12 تامىز. مەملەكەت باسشىسى مەملەكەتتىك شەكارانىڭ قازاقستان-قىرعىزستان ۋچاسكەسىندە كەدەندىك باقىلاۋدىڭ دوعارىلۋ راسىمىنە قاتىستى. بۇل تۋرالى akorda.kz حابارلادى.
قازاقستان مەن قىرعىزستاننىڭ شەكاراسىنداعى كەدەندىك باقىلاۋ قىرعىز رەسپۋبليكاسىنىڭ ەۋرازيالىق ەكونوميكالىق وداققا قوسىلۋى تۋرالى شارت ەرەجەلەرى نەگىزىندە دوعارىلدى. ەلباسى شارا بارىسىندا قىرعىزستاننىڭ ەاەو-عا كىرۋىنىڭ ماڭىزدىلىعىن, مۇنىڭ قازاقستان مۇددەسىنە ساي كەلەتىنىن جانە ەكى رەسپۋبليكانىڭ ەكونوميكالىق ءوزارا ىقپالداستىعى اياسىن ودان ءارى كەڭەيتۋگە سەپتىگىن تيگىزەتىنىن اتاپ ءوتتى.
«ەلدەرىمىزدىڭ اراسىنداعى كەدەندىك شەكارانى اشۋ – ەكى مەملەكەتتىڭ بيزنەسى ءۇشىن جاڭا مۇمكىندىكتەر تۋدىراتىن, ءوزارا ساۋدانى جانداندىراتىن ايتۋلى وقيعا. ەاەو اياسىندا قول جەتكەن ۋاعدالاستىقتىڭ شارتتارىن ورىنداي وتىرىپ, ءبىز بىرىڭعاي ەكونوميكالىق كەڭىستىك قالىپتاستىرۋ باعىتىندا ىلگەرىلەي تۇسەتىن بولامىز. مەن بۇدان ناقتى وڭ ناتيجەلەر كورەتىنىمىزگە سەنىمدىمىن», – دەدى نۇرسۇلتان نازارباەۆ.
مەملەكەت باسشىسى الەمدىك نارىقتارداعى كۇردەلى احۋالعا قاراماستان, ءبىزدىڭ ەلدەرىمىز ساۋدا-ەكونوميكالىق ىنتىماقتاستىقتى تابىستى دامىتىپ جاتقانىن, قىرعىزستاننىڭ ءتۇرلى سالالارىن دامىتۋعا قازاقستان 1,5 ميلليارد دوللاردان استام ينۆەستيتسيا سالعانىن ايتتى.
سونىمەن قاتار, نۇرسۇلتان نازارباەۆ ءوزارا ساۋدانى ودان ءارى ۇلعايتۋ ءۇشىن ءالى پايدالانىلماعان رەزەرۆتەر بار ەكەنىنە نازار اۋداردى. «اتاپ ايتقاندا, ەلەكتر ەنەرگەتيكاسى, كولىك, بايلانىس, اگروونەركاسىپ كەشەنى, سونداي-اق تۋريزم سياقتى كوپتەگەن سالاعا مۋلتيپليكاتيۆتى ىقپال ەتەتىن باعىتتاردا ىنتىماقتاستىق كۇشەيتىلەتىن بولادى.
قازىرگى ۋاقىتتا سىرتقى نارىقتاردا داعدارىس قۇبىلىستارى بايقالۋدا, بۇل تاۋار اينالىمىن تومەندەتۋ ارقىلى بىزدەرگە دە اسەر ەتپەي قويمايدى. بىراق وداق اياسىنداعى قىزمەت كەلەشەكتە ەكونوميكالىق كورسەتكىشتەردىڭ وسۋىنە الىپ كەلەدى جانە حالىقتارىمىزدىڭ ءال-اۋقاتىن جاقسارتادى», – دەدى قازاقستان پرەزيدەنتى.
مەملەكەت باسشىسى سونداي-اق قىرعىزستاننىڭ تۇراقتى ءارى بەيبىت دامۋىنا تىلەكتەستىك ءبىلدىردى.
ا.اتامباەۆ ەاەو اياسىنداعى بىرلەسكەن جۇمىس ەكىجاقتى ىنتىماقتاستىقتى ودان سايىن نىعايتا تۇسەتىنىنە سەنىم ءبىلدىرىپ, بولاشاقتا باۋىرلاس حالىقتارىمىزدىڭ اراسىندا ەشقانداي شەكارا بولماۋى تيىستىگىن اتاپ ءوتتى.
«ىستىقكول وبلىسىنىڭ تۇرعىندارى ءۇشىن بۇگىن ەلەۋلى كۇن – نۇرسۇلتان ءابىش ۇلى الماتىدان قاشىقتىقتى ەكى ەسە قىسقارتاتىن, مەيلىنشە توتە جول سالۋ تۋرالى يدەيانى قولدادى», – دەدى قىرعىزستان باسشىسى.
ايدار ورىسباەۆ.
دەرەك, سۋرەت: akorda.kz.