2025 جىلدىڭ 25 جەلتوقسانىندا اۋىل شارۋاشىلىعى مينيسترلىگى ءترانزيتتى قوسپاعاندا ەلىمىزدەن بارلىق كولىك تۇرىمەن ءسابىزدى شەتكە, ەۋرازيالىق ەكونوميكالىق وداققا مۇشە ەلدەرگە تاسىمالداۋعا 3 ايعا تىيىم سالۋ شەشىمى تۋرالى جاريالاعان ەدى. بۇل باستاما شارۋالار تاراپىنان نارازىلىققا ۇشىرادى. فەرمەرلەر مەن كاسىپكەرلەردى الاڭداتقان ماسەلەنى بۇگىن ءماجىلىس وتىرىسىندا دەپۋتات تەمىر قىرىقباەۆ كوتەرىپ, پرەمەر-ءمينيستردىڭ ورىنباسارى – ۇلتتىق ەكونوميكا ءمينيسترى سەرىك جۇمانعارينگە ساۋال جولدادى, دەپ جازادى Egemen.kz.
دەپۋتاتتىڭ ايتۋىنشا تاجىريبە ەكسپورتقا تىيىم سالۋ باعانىڭ تومەندەۋىنە اكەلمەيتىنىن كورسەتىپ وتىر. مۇندايدا نەگىزگى اۋىرتپالىق وندىرۋشىلەرگە تۇسەدى. ال دەلدالدار مەن لوگيستيكالىق تىزبەكتىڭ باسقا قاتىسۋشىلارى بۇل شەكتەۋدەن زارداپ شەكپەيدى.
«ساراپشىلار باعانى تەك ەكسپورتتى شەكتەۋ ارقىلى تۇراقتاندىرۋدى ءتيىمسىز دەپ ەسەپتەيدى. بيزنەس قاۋىمداستىعى دا ءوز ۇستانىمىن اشىق ءبىلدىرىپ جاتىر. ەگەر مەملەكەت ىشكى نارىققا قاجەتتى ءونىم كولەمىن ناقتى ايقىنداسا فەرمەرلەر ونى قامتاماسىز ەتۋگە دايىن. قازاقستان كارتوپ جانە كوكونىس وسىرۋشىلەر وداعىنىڭ مالىمەتىنشە, قويمالار تولى, ءسابىز بەن كارتوپ تاپشىلىعى جوق. وسىعان بايلانىستى اۋىل شارۋاشىلىعى مينيسترلىگى ۇسىنعان ءونىم تاپشىلىعى جونىندەگى دەرەكتەردىڭ وبەكتيۆتىلىگىنە كۇمان تۋىندايدى. بۇل مەملەكەت پەن وندىرۋشىلەر اراسىندا جۇيەلى ديالوگتىڭ جوق ەكەنىن كورسەتەدى», دەدى تەمىر قىرىقباەۆ.
بۇعان دەيىن «Egemen Qazaqstan» گازەتىنىڭ پاۆلودارداعى ءتىلشىسى مۇرات قاپان ۇلى ەرتىس-بايان ءوڭىرىنىڭ فەرمەرلەرىندە ءسابىز ءونىمى مول ەكەنىن ايتىپ, ولاردىڭ اتالعان ءونىم ەكسپورتىنا شەكتەۋ ەنگىزبەۋدى سۇراپ وتىرعانىن جازعان ەدى. ءتىلشىمىز كەلتىرگەن دەرەكتەردى دەپۋتاتاتتىق ساۋالىندا تەمىر قىرىقباەۆ تا قاپەرگە سالدى.
«پاۆلودار وبلىسىنداعى فەرمەرلەردىڭ قولىندا 120 مىڭ توننادان استام ءسابىز قورى بار. قازىرگى جاعدايدا ونى كەلىسى 80 تەڭگەدەن ساتۋدىڭ ءوزى قيىن. سەبەبى سۇرانىس تومەن. ال ءسابىز – ۇزاق ساقتالمايتىن ءونىم. سوندىقتان ەكسپورتقا ۋاقىتشا شەكتەۋ قولدا بار ءونىمدى وتكىزۋ مۇمكىندىگىن ودان ءارى تارىلتادى. ويلاستىرىلماعان اكىمشىلىك شەشىمدەر وتاندىق فەرمەرلەردىڭ شەتەلدىك نارىقتارداعى ورنىن السىرەتىپ, ولاردى باسەكەلەستەرگە وڭاي بەرىپ قويۋعا اكەلەدى. فەرمەرلەر جىلدار بويى قالىپتاستىرعان لوگيستيكاسى مەن سەرىكتەستىك بايلانىسى ءبىر عانا شەشىمنىڭ سالدارىنان ءۇزىلۋى مۇمكىن», دەدى دەپۋتات.
ول بۇعان دەيىن دە كارتوپ, ەت جانە پياز ەكسپورتىنا وسىنداي شەكتەۋلەر ەنگىزىلگەنىمەن, ولاردان ناقتى قورىتىندى جاسالماعانىنا نازار اۋداردى. سونىمەن قاتار, ۇكىمەتتەن ءسابىز ەكسپورتقا شەكتەۋ ەنگىزۋ تۋرالى ۇسىنىس قانداي ەكونوميكالىق جانە ستاتيستيكالىق ەسەپتەۋلەرگە نەگىزدەلدى, ىشكى نارىق قاجەتتىلىگى مەن قولدا بار قورلار بويىنشا قانداي دەرەكتەر پايدالانىلعانىن جانە ىشكى نارىقتى كەپىلدەندىرىلگەن كولەمدە ونىممەن قامتاماسىز ەتىپ, ارتىق ءونىمدى ەكسپورتقا شىعارۋعا مۇمكىندىك بەرەتىن ناقتى ءارى تۇسىنىكتى مودەل ازىرلەۋ جوسپارى قاشان ازىرلەنەتىنىن سۇرادى.