س. سەيفۋللين اتىنداعى قازاق اگروتەحنيكالىق زەرتتەۋ ۋنيۆەرسيتەتىندە جوعارى وقۋ ورنىنىڭ كورنەكتى تۇلەگى, قازاقستاننىڭ ەڭبەك ەرى, «رودينا» اگروفيرماسى جشس-ءنىڭ باس ديرەكتورى, ەلىمىزدىڭ ەڭبەك سىڭىرگەن قايراتكەرى, كاسىپكەر ءارى مەتسەنات يۆان ادام ۇلى ساۋەردىڭ اتىنداعى اۋديتوريا سالتاناتتى تۇردە اشىلدى, دەپ جازادى Egemen.kz.
ءىس-شاراعا مەملەكەتتىك ورگانداردىڭ وكىلدەرى, پارلامەنت دەپۋتاتتارى, عىلىمي قاۋىمداستىق مۇشەلەرى, اگرارلىق كاسىپورىنداردىڭ باسشىلارى, قوعام قايراتكەرلەرى, سونداي-اق پروفەسسور-وقىتۋشىلار قۇرامى مەن ستۋدەنتتەر قاتىستى. سونىمەن قاتار ءىس-شاراعا يۆان ادام ۇلىنىڭ كۋرستاستارى قاتىسىپ, ستۋدەنتتىك جىلداردى ەسكە الدى. بۇل باستامانىڭ ۋنيۆەرسيتەت پەن ونىڭ تۇلەكتەرى ءۇشىن ماڭىزدىلىعىن اتاپ ءوتتى.
ءىس-شارا اياسىندا جاڭا بۋىنعا ارنالعان Smart-اۋديتوريا سالتاناتتى تۇردە اشىلدى. زاماناۋي مۋلتيمەديالىق تەحنولوگيالار جانە تسيفرلىق وقىتۋ ەلەمەنتتەرىمەن جابدىقتالعان بۇل ءبىلىم بەرۋ كەڭىستىگى ستۋدەنتتەردىڭ ۇشقىر ويلاۋ قابىلەتىن قالىپتاستىرۋعا, پراكتيكالىق داعدىلارىن دامىتۋعا جانە زياتكەرلىك الەۋەتىن ارتتىرۋعا باعىتتالعان. اۋديتوريا ءبىلىم بەرۋدىڭ تسيفرلىق ترانسفورماتسياسى تالاپتارىنا تولىقتاي ساي كەلەدى.
سالتاناتتى ءراسىم بارىسىندا يۆان ساۋەردىڭ ۋنيۆەرسيتەتتى دامىتۋعا قوسقان ۇلەسىنە ەرەكشە نازار اۋدارىلدى. قوعامداعى بەلسەندىلىگى جانە مەتسەناتتىق قىزمەتىمەن تانىمال ول كوپتەگەن جىلدار بويى ءبىلىم بەرۋ سالاسىنداعى باستامالاردى قولداپ كەلەدى. اتاۋلى اۋديتوريانىڭ اشىلۋى – ونىڭ تۋعان ۋنيۆەرسيتەتىنىڭ ينفراقۇرىلىمىن دامىتۋعا, ستۋدەنتتەر مەن وقىتۋشىلار ءۇشىن قولايلى ءارى تەحنولوگيالىق ءبىلىم بەرۋ ورتاسىن قالىپتاستىرۋعا باعىتتالعان يگى ىستەرىنىڭ جالعاسى.
ۋنيۆەرسيتەت باسقارما توراعاسى – رەكتور, ۇعا اكادەميگى قانات مارات ۇلى تىرەۋوۆ ءوز سوزىندە يۆان ساۋەر تۇلعاسىنىڭ ۋنيۆەرسيتەت پەن ەل ءۇشىن ايرىقشا ماڭىزىن اتاپ ءوتتى.
ء«بىزدىڭ ۋنيۆەرسيتەت ءۇشىن يۆان ساۋەردىڭ س. سەيفۋللين اتىنداعى قازاق اگروتەحنيكالىق زەرتتەۋ ۋنيۆەرسيتەتىنىڭ كورنەكتى تۇلەگى ءارى قۇرمەتتى پروفەسسورى ەكەنى ەرەكشە قۇندى. ول عىلىم مەن ءبىلىمنىڭ ماڭىزىن ءاردايىم العا قويادى. بۇل اۋديتوريا – جاي عانا وقۋ ورنى ەمەس, ستۋدەنتتەردى ەڭبەكقورلىققا, جاۋاپكەرشىلىككە جانە تۋعان جەرگە دەگەن سۇيىسپەنشىلىككە تاربيەلەيتىن شابىت مەكەنى», دەدى رەكتور.
سالتاناتتى شارانىڭ جالعاسى رەتىندە يۆان ادام ۇلى ساۋەر «اگرارلىق بيزنەستى باسقارۋ تاجىريبەسى جانە اۋىل شارۋاشىلىعىنىڭ ورنىقتى دامۋى» تاقىرىبىندا اشىق ءدارىس وقىپ, تاجىريبەسىمەن, باسقارۋشىلىق كوزقاراسىمەن ءبولىستى.
اتاۋلى Smart-اۋديتوريانىڭ اشىلۋى ۋنيۆەرسيتەتتىڭ ماتەريالدىق-تەحنيكالىق بازاسىن نىعايتۋعا جانە اگرارلىق سالا ءۇشىن ۋاقىت تالابىنا ساي, باسەكەگە قابىلەتتى ماماندار دايارلاۋعا باعىتتالعان ماڭىزدى قادام بولدى.