الماتى وبلىسىندا اسكەري قىزمەتشى اتىس كەزىندە جارالاندى

الماتى وبلىسىندا 5571 اسكەري ءبولىمىنىڭ وقۋ پوليگونىندا وتكەن وقۋ اتىستارى بارىسىندا قاۋىپسىزدىك تالاپتارىنىڭ بۇزىلۋى سالدارىنان ۇلتتىق ۇلاننىڭ مەرزىمدى قىزمەتتەگى اسكەري قىزمەتشىسى اياعىنان جەڭىل وق جاراقاتىن الدى. بۇل تۋرالى ۇلتتىق ۇلاننىڭ «وڭتۇستىك» وڭىرلىك قولباسشىلىعىنىڭ ءباسپاسوز قىزمەتى حابارلادى.

«2026 جىلعى 13 قاڭتار كۇنى ساعات 15:05 شاماسىندا جاۋىنگەرلىك دايىندىق جوسپارىنا سايكەس 5571 اسكەري ءبولىمىنىڭ اسكەري قىزمەتشىلەرىمەن وقۋ پوليگونىندا وقۋ اتىستارى وتكىزىلدى. قاۋىپسىزدىك تالاپتارىنىڭ بۇزىلۋى ناتيجەسىندە 2-2025 شاقىرىلىمىنىڭ مەرزىمدى قىزمەتتەگى اسكەري قىزمەتشىسى گ. اك-74 اۆتوماتىنان سول جاق اياعىن جاناما اتىپ الدى. وقيعا ورنىندا وعان قاجەتتى مەديتسينالىق كومەك كورسەتىلىپ, كەيىن شۇعىل تۇردە قوناەۆ قالالىق اۋرۋحاناسىنا جەتكىزىلدى», دەلىنگەن سارسەنبى كۇنگى حابارلامادا.

بەرىلگەن مالىمەتتەرگە سايكەس, اسكەري قىزمەتشىنىڭ جاعدايى تۇراقتى, ومىرىنە قاۋىپ ءتونىپ تۇرعان جوق.

وقيعانىڭ ءمان-جايى انىقتالىپ جاتىر, دەرەك بويىنشا قىزمەتتىك تەكسەرىس تاعايىندالدى.

ايتا كەتەيىك, 7 قاڭتار كۇنى شىمكەنتتە مەرزىمدى اسكەري قىزمەتتەگى سارباز كەنەتتەن جۇرەگى توقتاپ, كوز جۇمعان ەدى.