ورنى بولەك ورتالىق

پارلامەنت سەناتى مەن ءماجىلى­سىنىڭ دەپۋتاتتارى ناۋرىزباي باي­قاداموۆ, رۋسلان رۇستەموۆ, مۇرات ابەنوۆ, مارحابات جايىم­بەتوۆ, مۇرات ەرگەشباەۆ, «قازاقستان حالقى­نا» قوعام­دىق قورىنىڭ باسقارما تور­اعاسى ءلاززات شىڭعىس­باەۆانىڭ جانە جۇرتشى­لىقتىڭ قاتىسۋىمەن وتكەن سالتاناتتى جيىندا وبلىس اكىمى نۇرلىبەك نالىباەۆ سالاماتتى ءومىر سالتىن ۇستانۋدىڭ ماڭىزىن اتاپ ءوتىپ, جينالعان قاۋىمدى جاڭا نىساننىڭ اشىلۋىمەن قۇتتىقتادى.

– ءبىزدىڭ ءار باستامامىز ەلدىڭ بىرلىگىنىڭ ارقاسىندا جۇزەگە اسىپ كەلەدى. سونىڭ دالەلى «قازاقستان حالقىنا» قورىنىڭ قولداۋىمەن سالىنعان ينكليۋزيۆتى سپورت ورتالىعى. جوبانى ىسكە اسىرۋعا 2,9 ملرد تەڭگە ءبولىندى. مۇندا سپورتشىلارىمىزعا ارنال­عان ۆولەيبول, كۇرەس, جالپى دەنە دايىندىعى زالدارى بار. ءبىر مەزەتتە 131 ادامنىڭ سپورتپەن جۇيەلى شۇعىلدانۋىنا مۇمكىندىك جاسالعان, – دەدى وبلىس اكىمى.

ايماق باسشىسى ءوڭىردىڭ الەۋمەتتىك-ەكونوميكالىق دامۋى­نا, تۇرعىنداردىڭ ءال-اۋقاتىن ارتتىرۋعا قوسقان ەلەۋلى ۇلەسى ءۇشىن ءلاززات شىڭعىسباەۆا باسقاراتىن «قازاقستان حالقىنا» قورى ۇجىمىنا سىر جۇرتشىلىعىنىڭ اتىنان العىس ايتتى.

جالپى, «قازاقستان حالقىنا» قوعامدىق قورى وڭىردەگى ماڭىزدى الەۋمەتتىك باستامالارعا 12 ملرد 851 ملن تەڭگە باعىتتاعان. سونىڭ ىشىندە اۋىل مەكتەپتەرىنىڭ ماتەريالدىق بازاسىن نىعايتۋعا 5 ملرد تەڭگەدەن اسا قارجى قارالسا, دەنساۋلىق ساق­تاۋ, الەۋمەتتىك قورعاۋ سالالارىن­دا 5 ملرد تەڭگەنىڭ جوبالارى ىسكە اسىرىلىپ كەلەدى.

سپورت ينفراقۇرىلىمىن دامى­تۋعا بولىنگەن 2 ملرد 728 ملن تەڭگەگە وتكەن جىلى شيەلى, جالاعاش اۋداندارىندا جاڭا سپورت كەشەندەرى سالىنىپ, پايدالانۋعا بەرىلدى. سىرداريا, قارماقشى اۋداندارىنداعى سپورت نىساندارى جاڭا قۇرال-جابدىقتارمەن قامتاماسىز ەتىلدى.

كاسىپكەرلەر, ۇلتتىق كومپانيالار مەن سپورت فەدەراتسيالارى دا وبلىس تۇرعىندارىنىڭ بۇقارالىق, كاسىبي سپورتپەن اينالىسۋىنا مۇمكىندىك جاساپ وتىر. وسىنىڭ ارقاسىندا 4 جىلدان بەرى 23 سپورت نىسانى, 20 سپورت كەشەنى سالىندى. «اۋىل – ەل بەسىگى» باعدارلاماسى اياسىندا ەلدى مەكەندەردە تاعى 4 سپورت كەشەنى ەل يگىلىگىنە تابىستالادى. ايماقتا العاش رەت ەرلەر مەن ايەلدەرگە ارنالعان «قىزىلوردا بوكس كلۋبى» جۇمىسىن باستادى. قازاقستان فۋتبول فەدەراتسياسىنىڭ قولداۋىمەن قىزىلوردا قالاسىن­داعى عاني مۇراتباەۆ اتىنداعى ستاديون­نىڭ قوسالقى الاڭى مەن جالاعاش اۋدانىنىڭ ورتالىق ستاديونى كۇردەلى جوندەۋدەن ءوتىپ, قولدانىسقا بەرىلدى. جەرگىلىكتى كاسىپكەرلەر دەمەۋشىلىگىمەن 1 ملرد 600 ملن تەڭگەگە 80 سپورت-ويىن الاڭى سالىندى.

وبلىس ورتالىعىنداعى ءىرى جوبالاردىڭ ءبىرى اۋماعى 25 مىڭ شارشى مەترلىك «قىزىلوردا ارەنا» كوپبەيىندى سپورت كەشەنى بولىپ وتىر. بۇل نىساندا وليمپيادالىق ستاندارتتارعا ساي 50 مەترلىك باسسەين, ازيا, الەم چەمپيوناتتارىن وتكىزۋگە ارنالعان 2 500 ورىندىق زال, وليمپيادالىق سپورت تۇرلەرىنە ارنالعان جاتتىعۋ زالدارى بولادى.

قىزىلوردا