ۆيتسە-پرەمەر – ۇلتتىق ەكونوميكا ءمينيسترى سەرىك جۇمانعاريننىڭ توراعالىعىمەن ۇكىمەتتە جاڭا ماۋسىمداعى كوكتەمگى دالا جۇمىستارىنا دايىندىق جونىندە وسى جىلعى العاشقى جيىن ءوتتى.
اۋىل شارۋاشىلىعى ۆيتسە-ءمينيسترى ازات سۇلتانوۆتىڭ حابارلاۋىنشا, بيىل ەگىستىك القاپتارىنىڭ جالپى كولەمى 23,8 ملن گەكتاردى قۇرايدى, بۇل 2025 جىلمەن سالىستىرعاندا 180 مىڭ گەكتارعا ارتىق. ەگىستى ءارتاراپتاندىرۋ ستراتەگياسى اياسىندا ءداندى داقىلدار القاپتارى قىسقارتىلىپ, 15,9 ملن گەكتار بولدى, بۇل وتكەن جىلمەن سالىستىرعاندا 112,4 مىڭ گەكتارعا از.
بۇعان قوسا جوعارى مارجينالدى ءارى قايتا وڭدەۋدە سۇرانىسقا يە داقىلداردىڭ ەگىستىك القاپتارى ۇلعايتىلىپ جاتىر. ماسەلەن, مايلى داقىلدار 55,2 مىڭ گەكتارعا ارتىپ, 4,045 ملن گەكتاردى قۇرايدى, ارپا – 93,8 مىڭ گەكتارعا (2,4 ملن گەكتار), جۇگەرى – 42,9 مىڭ گەكتارعا (217,5 مىڭ گەكتار), مال ازىقتىق داقىلدار 37,4 مىڭ گەكتارعا (3,1 ملن گەكتار) ۇلعايادى.
«جامبىل وبلىسىندا جۇگەرىنى تەرەڭ وڭدەۋ بويىنشا «Fufeng Group» كومپانياسىنىڭ تىك ينتەگراتسيالانعان جاڭا يندۋستريالىق پاركىن شيكىزاتپەن قامتاماسىز ەتۋگە جۇگەرى ەگىستىگىن ەداۋىر ارتتىرۋ قاجەت. بيىل العاشقى كەزەڭدى ىسكە قوسۋ بارىسىندا زاۋىتقا 500–700 مىڭ توننا جۇگەرى قاجەت بولادى, ال كەيىن بۇل كولەم 1 ملن تونناعا جەتەدى. مال ازىقتىق داقىلدار القاپتارىنىڭ ۇلعايۋى بيىل مال شارۋاشىلىعىن دامىتۋعا ارنالعان كەشەندى باعدارلامانىڭ باستالۋىمەن بايلانىستى بولادى», دەدى ا.سۇلتانوۆ.
جاڭا ۆەگەتاتسيالىق كەزەڭگە دايىندىق پەن ەلدىڭ وڭتۇستىك وڭىرلەرىندە ەگىستىك كولەمىنىڭ بولجامدى ۇلعايۋى اياسىندا قىزىلوردا, تۇركىستان, جامبىل وبلىستارىنىڭ فەرمەرلەرىمەن كەزدەسۋلەر وتكىزىلدى. سۋدى كوپ قاجەت ەتەتىن داقىلداردى ازايتىپ, ونىڭ ورنىنا سۋ سىيىمدىلىعى تومەن ءارى تەرەڭ وڭدەۋدىڭ جاڭا وندىرىستەرىندە سۇرانىسقا يە داقىلدارعا كوشۋ نۇسقالارى تالقىلاندى. اتاپ ايتقاندا, قىزىلوردا وبلىسىندا كۇرىش ەگىستىگىن 8,5 مىڭ گەكتارعا, تۇركىستان وبلىسىندا 7,4 مىڭ گەكتارعا قىسقارتۋ ماسەلەسى قاراستىرىلىپ وتىر. ماقتا ەگىستىگىنىڭ بولجامدى كولەمى 148,5 مىڭ گەكتار بولعان جاعدايدا, تامشىلاتىپ سۋارۋ قولدانىلاتىن القاپتار 15 مىڭ گەكتارعا ۇلعايادى, ال ءداستۇرلى سۋارۋ ادىستەرى قولدانىلاتىن القاپتار 11 مىڭ گەكتارعا قىسقارتىلادى.
تابىستى ەگىس ناۋقانىنىڭ نەگىزگى قۇرامداس بولىكتەرى – تىڭايتقىشتار, ساپالى تۇقىم مەن ارزانداتىلعان ديزەل وتىنى. قاجەتتى رەسۋرستاردى ۋاقتىلى ساتىپ الۋعا اگرارلىق نەسيە كورپوراتسياسى وتكەن جىلدىڭ قازان ايىنان باستاپ فەرمەرلەردەن جەڭىلدىكپەن نەسيەلەۋگە ءوتىنىم قابىلداۋدى باستادى. بۇگىندە وتىنىمدەردىڭ ەڭ كوبى تۇركىستان (28%), اقمولا (13%), سولتۇستىك قازاقستان (13%), قوستاناي (11%), قاراعاندى (6%) وبلىستارىنان ءتۇسىپ وتىر.
ۆيتسە-پرەمەر ەنەرگەتيكا مينيسترلىگىنە شارۋالارعا ارنالعان ديزەل وتىنىنىڭ جەڭىلدىكتى باعاسىن قىسقا مەرزىمدە ايقىنداۋ مەن وڭىرلەردى مۇناي وڭدەۋ زاۋىتتارىنا ءبولۋ كەستەسىن بەكىتۋدى تاپسىردى. ديزەل وتىنىن جەتكىزۋ اقپان ايىندا باستالادى.
بيىلعى كوكتەمگى ەگىسكە قاجەتتى 2,3 ملن توننا تۇقىمنىڭ ىشىندە 1,5 ملن توننا جازدىق داقىلدار ساراپتاماعا جەتكىزىلدى. الدىن الا تەكسەرۋدەن 1,3 ملن توننا تۇقىم وتكىزىلدى, ونىڭ 98,1%-ى كونديتسيالىق دەپ تانىلدى, ياعني ەگۋ ستاندارتىنىڭ 1 جانە 2 سىنىبىنا سايكەس كەلەدى.