پاۆلودار وبلىسىندا ءماجىلىس دەپۋتاتتارى قوعامدىق ۇيىمدار مەن بەلسەندىلەرمەن جۇزدەسىپ, ۆولونتەرلىكتىڭ ازاماتتىق قوعامداعى ورنى مەن بولاشاعىن ءسوز ەتتى. كەزدەسۋ مەملەكەت باسشىسى ايقىنداعان باسىمدىقتاردى ىسكە اسىرۋداعى ەرىكتىلەر قوزعالىسىنىڭ رولىنە ارنالدى, دەپ جازادى Egemen.kz.
ءىس-شاراعا «AMANAT» پارتياسى فراكتسياسىنىڭ مۇشەلەرى ۆەرا كيم, جارقىنبەك امانتاي جانە نۇرجان اشىمبەتوۆ قاتىستى. اشىق فورماتتا وتكەن اڭگىمەدە ۆولونتەرلىك جۇمىستىڭ ەل ومىرىندەگى ورنى مەن ونى ودان ءارى دامىتۋ تەتىكتەرى تالقىلاندى.
ءماجىلىس دەپۋتاتى, ۇلتتىق ۆولونتەرلىك جەلىنىڭ جەتەكشىسى ۆەرا كيم ەلىمىزدە ەرىكتىلىك ءبىر رەتتىك باستاما ەمەس, جۇيەلى ينستيتۋتقا اينالعانىن اتاپ ءوتتى. ونىڭ ايتۋىنشا, بۇل باعىت مەملەكەت باسشىسىنىڭ تىكەلەي قولداۋىمەن دامىپ كەلەدى.
«قازاقستانداعى ۆولونتەرلىك – مەملەكەتتىڭ قولداۋىمەن جۇرگىزىلەتىن جۇيەلى جۇمىس. پرەزيدەنتىمىز ۆولونتەرلىك قوزعالىس قوعامدىق ءومىردىڭ اجىراماس بولىگىنە اينالعانىن بىرنەشە رەت اتاپ ءوتتى. سوندىقتان قاسىم-جومارت توقاەۆتىڭ باستاماسىمەن بۇۇ باس اسسامبلەياسى تۇراقتى دامۋ ماقساتىندا 2026 جىلدى حالىقارالىق ەرىكتىلەر جىلى دەپ جاريالاۋ تۋرالى قارار قابىلدادى. بۇل – قازاقستان مەن ءبىزدىڭ ەرىكتىلەردىڭ جاھاندىق ورنىقتى دامۋعا قوسقان ۇلەسىنىڭ مويىندالۋى», دەدى ول.
ۆەرا كيم 2020 جىلى ەرىكتىلەر جىلى جاريالانۋى بۇل سالاعا جاڭا سەرپىن بەرگەنىن, سول كەزەڭدە ۆولونتەرلەر قىزمەتىن رەتتەيتىن زاڭناما ايتارلىقتاي جاڭارعانىن ەسكە سالدى.
قازاقستان باستاماسى: جاھاندىق ەرىكتىلەر جىلى
جارقىنبەك امانتاي ۇلى «AMANAT» پارتياسىنىڭ ەرىكتىلەرى ەل باسىنا كۇن تۋعان ساتتەردە ءاردايىم حالىقپەن بىرگە بولعانىن ايتتى. ول ەكىباستۇزداعى جىلۋ جۇيەسىندەگى اپات, بىلتىرعى سۋ تاسقىنى, قوستاناي وبلىسىنداعى جانە اباي وبلىسىنداعى ورمان ورتتەرى كەزىندە جاستاردىڭ الدىڭعى شەپتە جۇرگەنىن مىسالعا كەلتىردى. وسى جاعدايلاردىڭ بارىندە پارتيا مۇشەلەرى زارداپ شەككەندەرگە كومەك كورسەتكەن.
پاۆلودار وبلىسىنداعى «جاس ۇلان» ۇيىمىنىڭ ۇيلەستىرۋشىسى ايگەرىم تۇسىپبەكوۆانىڭ ايتۋىنشا, بۇگىندە ءوڭىردىڭ بارلىق مەكتەبىندە ۆولونتەرلىك وتريادتار جۇمىس ىستەيدى. ولار ەكولوگيالىق اكتسيالارعا قاتىسىپ, جالعىزباستى زەينەتكەرلەرگە كومەكتەسەدى ءارى ءوز باستامالارىن جۇزەگە اسىرادى.
وزگەگە ءومىر سىيلاعان ەرىكتىلەر
كەزدەسۋدە قوعامدىق ۇيىمدار ۆولونتەرلەر ءۇشىن كولىك ماسەلەسى وزەكتى ەكەنىن كوتەردى. بەلسەندىلەر جۇمىسپەن نەمەسە وقۋمەن قاتار قوعامدىق ىسكە ارالاساتىندىقتان, وڭىرلىك فرونت-وفيستەردىڭ جۇمىس كەستەسىن يكەمدى ەتۋ قاجەت دەگەن ۇسىنىس ايتىلدى.
دەپۋتاتتار بۇل باستامالاردى الداعى ۋاقىتتا زاڭنامانى جەتىلدىرۋ بارىسىندا قاراستىراتىنىن مالىمدەدى.
ەسكە سالايىق, كەشە ماجىلىس دەپۋتاتتارى, «AMANAT» پارتياسى فراكتسياسىنىڭ مۇشەلەرى مۇرات ابەنوۆ, مارحابات جايىمبەتوۆ جانە مۇرات ەرگەشباەۆ قىزىلوردا وبلىسىنا جۇمىس ساپارى كەزىندە جەرگىلىكتى «ەكو تاكسي» وتاندىق سەرۆيسىنىڭ جۇمىسىمەن تانىسىپ, پرەزيدەنتتىك ساياباقتى قايتا قۇرۋ بارىسىن تەكسەردى.