1860 جىلى پرەزيدەنتتىك سايلاۋعا ءۇش اپتا قالعاندا, نيۋ-يورك شتاتىنىڭ ۋەستفيلد قالاسىندا تۇراتىن گرەيس بەدەلل ەسىمدى ون ءبىر جاسار قىز پرەزيدەنتتىككە كانديدات لينكولنگە ءۇشبۋ حات جازادى. ول لينكولنگە اكەسى ۇيگە اكەلگەن پلاكاتتاعى سۋرەتتى كورگەننەن كەيىن حات جولداعىسى كەلگەنىن ايتادى.
«مەنىڭ ءتورت اعام بار, ولاردىڭ ەكەۋى سىزگە داۋىس بەرمەكشى, ال ەگەر ساقالىڭىزدى وسىرسەڭىز, قالعان ەكى اعامدى دا سىزگە داۋىس بەرۋگە كوندىرەمىن. بەتىڭىز تىم سوپاقشا. سول ءۇشىن ساقال وسىرسەڭىز, الپەتىڭىز الدەقايدا جاقسى كورىنەر ەدى», دەيدى ول ءوز ۇسىنىسىن جاسىرماي.
گرەيس بەدەلل حاتىنىڭ باسىندا لينكولننەن «قىزىڭىز بار ما؟» دەپ سۇرايدى. اراعا ءتورت كۇن سالىپ لينكولن وعان جاۋاپ قايتارادى. ول الدىمەن «قىزىڭىز بار ما؟» دەگەن سۇراققا جاۋاپ بەرەدى.
«قۇرمەتتى كىشكەنتاي حانشا! مەنىڭ قىزىم جوق. بىراق ءۇش ۇلىم بار. ولار ون جەتى, توعىز جانە جەتى جاستا. ۇلدارىم وتباسىمنىڭ باستى مۇشەلەرى ەكەنىن ايتقىم كەلەدى. ال ساقالعا كەلەتىن بولساق, بۇدان بۇرىن ەشقاشان ساقال قويماعانمىن. ەگەر ءدال قازىر ساقالىمدى وسىرسەم, جۇرت بۇل قىلىعىمدى اقىماقتىق دەپ ويلاماس پا؟ بۇل تۋرالى ءسىز قالاي ويلايسىز؟
سىزگە تىلەكشى ا.لينكولن».
كوپ وتپەي گرەيس بەدەلل ساقالدىڭ ابرام لينكولنگە قالاي قۇپ جاراسقانىن ءوز كوزىمەن كورۋ مۇمكىندىگىنە دە يە بولدى. يللينويس شتاتىنىڭ سپرينگفيلد قالاسىنان ۆاشينگتونداعى يناۋگۋراتسياسىنا بارا جاتقان جولىندا پرەزيدەنتتىككە سايلانعان ابرaحام لينكولن گرەيس بەدەلل تۇراتىن ۋەستفيلد قالاسىنا ارنايى ات باسىن بۇرادى. سول كەزدەسۋدە لينكولن وعان «كوردىڭ بە, ساقالىمدى سەن ءۇشىن ءوسىردىم, گرەيس» دەپ اعىنان اقتارىلادى.