سەناتورلار وڭىردە قوردالانعان بىرقاتار ماسەلە ءالى دە شەشىمىن كۇتىپ تۇرعانىن ايتادى. سەنات توراعاسىنىڭ ورىنباسارى ولگا پەرەپەچينا سولتۇستىك قازاقستان وبلىسىنىڭ جۇرتشىلىعىمەن كەزدەسىپ, ولاردىڭ تالاپ-تىلەكتەرىن تىڭداپ قايتتى. سونداي-اق دەپۋتاتتار ەلىمىزدىڭ باتىس وڭىرلەرىن ارالاپ كەلدى.
و.پەرەپەچينا تەپليچنوە اۋىلىنداعى 4,8 كم شاقىرىمدى قۇرايتىن جاڭا قورعانىس بوگەتىنىڭ قۇرىلىسىمەن تانىستى. 2024 جىلى مىڭداعان ءۇيدى سۋ باسقان تاسقىنىنان كەيىن الاپاتقا قارسى قاۋىپسىزدىك ماسەلەلەرى قازىر ەرەكشە باقىلاۋدا. قۇرىلىس جۇمىستارى قاڭتاردىڭ سوڭىنا دەيىن اياقتاۋ جوسپارلانعان.
«قايتا قۇرۋ جۇمىستارى كوكتەمگى سۋ تاسقىنى باستالعانعا دەيىن اياقتالۋعا ءتيىس. بۇل رەتتە تەحنولوگيالار مەن ماتەريالداردىڭ ساپاسى جوعارى بولۋى قاجەت, ويتكەنى بۇل ءوڭىر تۇرعىندارىنىڭ قاۋىپسىزدىگى مەن ءال-اۋقاتىنا تىكەلەي اسەر ەتەدى», دەپ اتاپ ءوتتى سەنات توراعاسىنىڭ ورىنباسارى.
سونداي-اق ول قىزىلجار اۋدانىنىڭ بەسكول اۋىلىندا ءبىر اۋىسىمدا 250 ادامدى قابىلدايتىن جاڭا ەمحانانىڭ قۇرىلىس الاڭىندا, حوككەي كورتىنا ارنالعان مەتالل-تەنتتى قۇرىلىس نىسانىندا, بەسكول №2 ورتا مەكتەبىندە, بەيىمدەلگەن عيماراتتا ورنالاسقان پودگورنوە اۋىلىنداعى مەكتەپپەن بەلوە اۋىلىنداعى اپاتتى جاعدايداعى مەكتەپتە بولدى.
ال سەنات دەپۋتاتتارى نۇرلان بەكەنوۆ, دارحان قىدىرالى, التىنبەك نۋح ۇلى اقمولا وبلىسىنداعى بۋراباي اۋدانىن ارالادى. ولار سپورت سارايى مەن اۋداندىق مادەنيەت ءۇيى, ء«بىلىم-يننوۆاتسيا» IT مەكتەبىنىڭ جۇمىسىمەن تانىستى. سەناتورلار اۋداندىق ءماسليحات دەپۋتاتتارىمەن بىرلەسىپ وتكىزگەن دوڭگەلەك ۇستەل وتىرىسىنا دا قاتىستى. وندا مەملەكەت باسشىسىنىڭ «Turkistan» گازەتىنە بەرگەن سۇحباتىنىڭ نەگىزگى تۇجىرىمدارى, الداعى كەزەڭدەگى بىرلەسكەن جۇمىستىڭ باسىم باعىتتارى تالقىلاندى. سونداي-اق دەپۋتات ن.بەكەنوۆ اقكول اۋدانىندا بولدى. ول دومبىرالى مەن كەڭەس اۋىلدارىنداعى «اۋىل – ەل بەسىگى» باعدارلاماسى اياسىندا جاڭارتىلعان كەنتىشىلىك جولدار مەن سۋ قۇبىرى جەلىلەرىن كورىپ شىقتى. سەناتور سونىمەن قاتار كەڭەس ورمان شارۋاشىلىعىندا بولىپ, مەكەمەنىڭ ماتەريالدىق-تەحنيكالىق جابدىقتالۋى مەن قىزمەتكەرلەردىڭ ەڭبەك جاعدايىمەن تانىستى.
سەنات دەپۋتاتتارى امانگەلدى نۇعمانوۆ اقتوبە وبلىسىنداعى حرومتاۋ, قارعالى, مۇعالجار مەن العا اۋداندارىندا بولدى. ول حرومتاۋ اۋدانىنداعى تابانتال اۋىلىندا جەل ەلەكتر ستانساسىنىڭ قۇرىلىسى مەن اقجار اۋىلدىق وكرۋگىنىڭ جازىق ستانساسىنداعى جاڭا مەكتەپتى, «اقمەز» جشس-ءنىڭ كەڭەيتىلەتىن ءوندىرىسى مەن مادەنيەت ءۇيىن, دەنە شىنىقتىرۋ-ساۋىقتىرۋ كەشەنى مەن حرومتاۋ قالاسىنداعى قالالىق قازاندىقتى قاراپ شىقتى. دەپۋتات سونداي-اق قارعالى اۋدانىندا اۋداندىق ورتالىق اۋرۋحانانىڭ قوسىمشا قۇرىلىسىمەن, بادامشا اۋىلىنداعى بالالار شىعارماشىلىعى جانە ونەر مەكتەبىنىڭ جۇمىسىمەن تانىستى. ال مۇعالجار اۋدانىندا اۋداندىق اۋرۋحانانىڭ جوندەۋ جۇمىستارىن, تەمىرجول ۆوكزالىن جاڭعىرتۋ مەن قاندىاعاش قالاسىنىڭ سامال شاعىن اۋدانىندا جاڭا مەكتەپ قۇرىلىسىن كورىپ شىقتى.
اتىراۋ وبلىسىنا بارعان سەناتورلار اۋىلدىق اۋماقتاردى دامىتۋ بارىسى مەن ماماندار جاعدايىن تالقىلادى. الىبەك ناۋتيەۆ پەن ساعىندىق لۇقپانوۆ س.مۇقاشەۆ اتىنداعى اتىراۋ پوليتەحنيكالىق كوللەدجىندە بولدى. وندا وقۋ ورنىنىڭ ماتەريالدىق-تەحنيكالىق بازاسىن, وقۋ كابينەتتەرىن زاماناۋي جابدىقتارمەن جاراقتاندىرۋىن, جالپى بىلىكتى مامان دايارلاۋ ءىسىنىڭ جاي-كۇيىن باقىلاپ قايتتى. ويتكەنى بۇل سالادا ولقىلىق بولماۋ كەرەك. مەملەكەت باسشىسى جۇمىسشى, ينجەنەر مامانداردى ساپالى دايارلاۋدى تاپسىرعان ەدى.
دەپۋتاتتار ماحامبەت اۋدانىندا دا بولىپ, تالدىكول اۋىلىنىڭ تۇرعىندارىمەن كەزدەستى. حالىق اۋىل ينفراقۇرىلىمىنىڭ جاي-كۇيىن, ەنەرگەتيكا نىساندارى مەن كوممۋنالدىق جەلىلەردىڭ جۇمىسىن ءسوز ەتىپ, باسقا دا وزەكتى ماسەلەلەردى كوتەردى.
دەپۋتات سەرگەي كارپليۋك قوستاناي وبلىسىندا بولىپ, ونەركاسىپ سەكتورىنىڭ وكىلدەرىمەن, ءماسليحات دەپۋتاتتارىمەن, سونداي-اق ءوڭىر اكتيۆىمەن كەزدەستى. سەناتور «Allur» كومپانياسىنىڭ ءوندىرىس الاڭىندا بولىپ, كاسىپورىننىڭ لوگيستيكا, كولىككە قولجەتىمدىلىك, ينفراقۇرىلىمدىق شەكتەۋلەر سەكىلدى ماسەلەلەرىنە زەر سالدى. زاۋىت وكىلدەرى لوگيستيكا تىزبەكتەرىن جەتىلدىرۋ, شىعىنداردى ازايتۋ, ونەركاسىپتىك كووپەراتسيانى كەڭەيتۋ مەن وتاندىق وندىرۋشىلەردى قولداۋ جونىندە ۇسىنىستار ايتتى.
سەناتور سەرىك وتەشوۆ قاراعاندى وبلىسىنداعى شاحتينسك قالاسىندا بولدى. سونداي-اق ول بۇقار جىراۋ اۋدانىندا ورنالاسقان «سارىارقا» ارنايى ەكونوميكالىق ايماعىنا باردى. ول بۇعان قوسا قاراعاندى قالاسىنداعى №1 مامانداندىرىلعان ءورت ءسوندىرۋ ءبولىمىنىڭ قىزمەتىمەن تانىستى. بۇقار جىراۋ اۋدانىنىڭ بايمىرزا اۋىلىنداعى اۋىلدىق وكرۋگتىڭ ءورت قاۋىپسىزدىگىن قامتاماسىز ەتۋ ءۇشىن قۇرىلعان ورتكە قارسى ەرىكتى جاڭا بەكەتتە دە بولدى.
تۇركىستان وبلىسىنىڭ كەلەس, سارىاعاش اۋداندارىندا بولعان ءالي بەكتاەۆ, مۇرات قادىربەك, اليشەر ساتۆالديەۆ ءوڭىردىڭ اگرارلىق سەكتورىنا زەر سالدى. كەلەس اۋدانىندا سەناتورلار كەزەڭ-كەزەڭىمەن ىسكە اسىرىلىپ جاتقان Ecoculture-Eurasia يندۋستريالىق جىلىجاي كەشەنىنىڭ جۇمىسىمەن تانىستى. قازىر قازاندىق شارۋاشىلىعىنىڭ نەگىزگى قۇرىلىس جۇمىستارى اياقتالىپ, زاماناۋي جىلىجاي تەحنولوگيالارى ەنگىزىلىپ جاتىر, وندىرىستىك بلوكتاردىڭ ءبىر بولىگى اۋىل شارۋاشىلىعى داقىلدارىن وتىرعىزۋعا ارنالعان. بۇگىندە نىساندا 100-گە جۋىق ادام جۇمىس ىستەيدى, ال كەشەن تولىق ىسكە قوسىلعاندا 1 300-دەن اسا تۇراقتى جۇمىس ورنىن قۇرۋ جوسپارلانىپ وتىر. جوبانىڭ ءبىرىنشى كەزەڭىندە 51 گەكتاردان اسا جەر يگەرىلمەك, جالپى كولەمى 42 ملرد تەڭگەنى قۇرايدى.
سەنات دەپۋتاتتارى سۇلتان دۇيسەمبينوۆ, عالياسقار سارىباەۆ, امانگەلدى ەسباي جەتىسۋ وبلىسىندا بولىپ, الەۋمەتتىك, مادەني, ينجەنەرلىك نىسانداردى ارالادى. ولار مۇمكىندىگى شەكتەۋلى جاندارعا ارنالعان «اسار» سپورتتىق-وڭالتۋ ورتالىعىنا بارىپ, ونداعى وڭالتۋ, سپورتتىق ساباقتاردى وتكىزۋ جاعدايىمەن تانىستى, سونداي-اق ورتالىق قىزمەتكەرلەرىمەن جانە كەلۋشىلەرىمەن سويلەستى.