اقش پرەزيدەنتى دونالد ترامپ Truth Social الەۋمەتتىك جەلىسىندەگى پاراقشاسىندا ءوزىن ۆەنەسۋەلا پرەزيدەنتىنىڭ مىندەتىن اتقارۋشى رەتىندە كورسەتەتىن سۋرەتتى جاريالادى, دەپ حابارلايدى Egemen.kz.
Truth Social جەلىسىندە جاريالانعان سۋرەتتە ترامپتىڭ 2026 جىلعى قاڭتاردان باستاپ ۆەنەسۋەلانىڭ پرەزيدەنتى مىندەتىن اتقارىپ وتىرعانى كورسەتىلگەن. قۇجاتتا ونىڭ بۇل قىزمەتكە 2026 جىلدىڭ قاڭتارىندا تاعايىندالعانى جازىلعان. سونىمەن قاتار ونىڭ اقش-تىڭ پرەزيدەنتى لاۋازىمى دا ساقتالاتىنى كورسەتىلگەن.
ەسكە سالايىق, 2025 جىلعى جەلتوقساندا اقش ۆەنەسۋەلاعا قارسى وپەراتسيا جۇرگىزىپ, رەسپۋبليكا استاناسى كاراكاستا پرەزيدەنت نيكولاس مادۋرو مەن ونىڭ جۇبايىن قولعا تۇسىرگەن بولاتىن. كەيىن مادۋرونىڭ نيۋ-يوركتەگى برۋكلين تەرگەۋ يزولياتورىنا جەتكىزىلگەنى بەلگىلى بولدى.
دونالد ترامپ «اقش-تىڭ بارلىق جاۋلارىنا» ۆەنەسۋەلاداعىداي وپەراتسيا جۇرگىزىلۋى مۇمكىن ەكەنىن ەسكەرتتى.
وسى كۇنى نيۋ-يوركتە ۆەنەسۋەلا پرەزيدەنتىنە قاتىستى سوت ءىسى بويىنشا العاشقى تىڭداۋ اياقتالدى. مادۋروعا «ەسىرتكى تەرروريزمىنە بايلانىستى ءسوز بايلاسۋ, كوكاين كونترابانداسى, پۋلەمەتتەر مەن جارىلعىش قۇرىلعىلاردى ساقتاۋ جانە ولاردى اقش-قا قارسى قولدانۋدى جوسپارلاۋ» ايىپتارى تاعىلىپ, ءتورت رەت ءومىر بويىنا باس بوستاندىعىنان ايىرۋ جازاسى قاۋپى ءتوندى.
اقش كونگرەسى ۆەنەسۋەلاعا قاتىستى ارەكەتى ءۇشىن ترامپتى ايىپتادى
سوتتا مادۋرو ءوزىن ء«الى دە ۆەنەسۋەلانىڭ پرەزيدەنتىمىن» جانە «تاعىلعان ايىپتار بويىنشا كىنالى ەمەسپىن» دەپ مالىمدەدى. ونىڭ جۇبايى دا ءوز كىناسىزدىگىن العا تارتتى.
سوت ساياساتكەردى كەلەسى سوت وتىرىسىنا 17 ناۋرىزدا كەلۋگە مىندەتتەپ, كونسۋلدىق قىزمەتكەرلەردىڭ قابىلداۋىنا رۇقسات بەردى. قورعاۋ تاراپى ۆەنەسۋەلا پرەزيدەنتىن كەپىلمەن بوساتۋعا قول جەتكىزۋگە نيەتتى ەكەنىن ايتتى.
كەيىنىرەك دەلسي رودريگەس ۆەنەسۋەلانىڭ ۋاقىتشا پرەزيدەنتى بولىپ تاعايىندالدى. العاشىندا ول اقش-تىڭ ارەكەتتەرىن قاتاڭ ايىپتاپ, مادۋرونى بوساتۋدى تالاپ ەتكەن. الايدا كەيىن ترامپقا جولداعان ۇندەۋىن جاريالاپ, ۆەنەسۋەلالىقتاردىڭ «سوعىسقا ەمەس, بەيبىت ومىرگە لايىق ەكەنىن» ايتتى. سونداي-اق اقش ۇكىمەتىن «ىنتىماقتاستىق باعدارلاماسى اياسىندا بىرلەسىپ جۇمىس ىستەۋگە» شاقىردى.
بۇل مالىمدەمە ترامپ ۆەنەسۋەلا اقش-پەن ىنتىماقتاسپاسا, جاڭا سوققى بەرۋگە بۇيرىق بەرۋى مۇمكىن ەكەنىن ەسكەرتكەننەن كەيىن جاسالدى. سونىمەن قاتار اقش پرەزيدەنتى رودريگەسكە دە قوقان-لوقى جاساپ, «ەگەر ول دۇرىس شەشىم قابىلداماسا, جازاسى مادۋرودان دا اۋىر بولۋى مۇمكىن» ەكەنىن ايتتى.