تۇركيانىڭ ىستانبۇل قالاسىندا پوليتسيا جۇرگىزگەن رەيد بارىسىندا تانىمال اكتەر دجان يامان ۇستالدى, دەپ حابارلايدى Egemen.kz.
مالىمەتتەرگە سايكەس, ىستانبۇل پروكۋراتۋراسىنىڭ تاپسىرماسىمەن قالاداعى توعىز تۇنگى كلۋبتا رەيد ۇيىمداستىرىلعان. تەكسەرۋ كەزىندە ويىن-ساۋىق ورىندارىنىڭ بىرىنەن اكتەر دجان ياماننىڭ جانىنان ەسىرتكى زاتتارى تابىلعان.
ارنايى وپەراتسيا بارىسىندا بارلىعى جەتى ادام ۇستالعان. ولاردىڭ قاتارىندا اكتريسالار سەلەن گيورگيۋزەل مەن ايشە ساگلام, سونداي-اق تۇنگى كلۋبتاردىڭ يەلەرى, مەنەدجەرلەرى جانە مەديا سالاسىنىڭ وكىلدەرى بار.
بۇعان دەيىن باسىلىمداردا دجان يامانعا قاتىستى ەسىرتكى قولداندى دەگەن مازمۇنداعى شاعىمدار مەن كۋالىكتەر تۇسكەنى حابارلانعان. الايدا تەرگەۋ اياسىندا پروكۋراتۋرا اكتەردى ۇستاۋ تۋرالى ارنايى وردەر بەرمەگەنى اتاپ وتىلگەن.
سوعان قاراماستان, جاندارمەريا جۇرگىزگەن ءتىنتۋ ناتيجەسىندە دجان يامان ۇستالعان. اقپاراتقا سايكەس, ول جانە سەلەن گيورگيۋزەل سوت-مەديتسينالىق مەكەمەگە قان تالداۋىن تاپسىرۋ ءۇشىن جەتكىزىلەتىن بولادى.
36 جاستاعى اكتەر «ەرتە كەلگەن قۇس», «ەل تۋركو», «ميستەر قاتە» جانە وزگە دە تەلەحيكايالارداعى رولدەرى ارقىلى كەڭىنەن تانىمال.
ايتا كەتەيىك, بۇعان دەيىن تۇرىك بۇقارالىق اقپارات قۇرالدارى ىستانبۇل پروكۋراتۋراسى زاڭسىز ەسىرتكى اينالىمىنا قاتىستى ءىس بويىنشا تەرگەۋ جۇرگىزىپ جاتقانىن, ونىڭ اياسىندا تانىمال تۇلعالارعا قاتىستى ۇستاۋ تۋرالى قاۋلىلار شىعارىلعانىن حابارلاعان. تەرگەۋ 2025 جىلعى 8 قازاندا باستالىپ, ونداعان تانىمال ادامنان جاۋاپ الىنعان.
بۇعان دەيىن مەملەكەتكە ميلليارد تەڭگەدەن استام شىعىن كەلتىرگەن كۇدىكتى گرۋزيادا ۇستالدى.