2025 جىلدىڭ قورىتىندىسى بويىنشا قازاقستاندا تەاترعا بارۋ قۇنى ايتارلىقتاي قىمباتتاپ, سوڭعى 15 جىلداعى ەڭ جوعارى كورسەتكىشكە جەتتى. جەلتوقسان ايىنىڭ ناتيجەسىمەن تەاتر بيلەتتەرىنىڭ باعاسى جىلدىق ەسەپتە 43,3%-عا ءوستى, دەپ حابارلايدى Egemen.kz.
ستاتيستيكاعا سايكەس, جىل ىشىندە تەاتر بيلەتتەرىنىڭ باعاسى 7,5 ەسە جىلدام قىمباتتاعان. بۇل – كەمىندە 2011 جىلدان بەرى تىركەلگەن ەڭ جوعارى ءوسىم. اتالعان كەزەڭدە تەاتر بيلەتتەرى جىل قورىتىندىسى بويىنشا بىردە-ءبىر رەت ارزانداماعانىمەن, جالپى تۇتىنۋشىلىق ينفلياتسيادان وزىق قارقىنمەن ەكى رەت وسكەن.
بۇعان دەيىن مۇنداي جاعداي 2022 جىلى بايقالعان. ول كەزدە گەوساياسي جاعدايدىڭ كۇرت ۋشىعۋىنا بايلانىستى تەاتر بيلەتتەرى 22,1%-عا قىمباتتاپ, جالپى ينفلياتسيا دەڭگەيى 20,3% بولعان. ال 2025 جىلى تەاتر بيلەتتەرىنىڭ باعاسى ينفلياتسيادان 3,5 ەسە جوعارى قارقىنمەن ءوستى.
دەپۋتاتتار اۋەزوۆ اتىنداعى قازاق ۇلتتىق دراما تەاترىنىڭ جاي-كۇيىمەن تانىستى
ساراپشىلاردىڭ مالىمەتىنشە, باعانىڭ ەڭ بەلسەندى ءوسۋى 2025 جىلدىڭ سوڭعى ءۇش ايىندا تىركەلگەن. ءار ايدىڭ قورىتىندىسى بويىنشا ورتاشا ءوسىم 8,4% ايلىق كورسەتكىشتى قۇراعان. ال جىل ىشىندەگى العاشقى ەلەۋلى ءوسىم ماۋسىم ايىندا تىركەلىپ, باعا ءبىر ايدا 10,1%-عا ارتقان.
ايماقتىق بولىنىستە تەاتر بيلەتتەرى 20 ءوڭىردىڭ 15-ىندە قىمباتتاعان, بەس وڭىردە باعا وزگەرمەگەن. الماتى وبلىسى بويىنشا دەرەكتەر قۇپيا رەتىندە جاريالانبايدى. ورتاشا رەسپۋبليكالىق دەڭگەيدەن جوعارى ءوسىم استانا مەن الماتى قالالارىندا, سونداي-اق تۇركىستان, شىعىس قازاقستان جانە باتىس قازاقستان وبلىستارىندا تىركەلگەن.
بيلىك وكىلدەرى باعانىڭ ءوسۋىن, ونىڭ ىشىندە, تەاترلاردىڭ ەكسپلۋاتاتسيالىق شىعىندارىنىڭ ارتۋىمەن, ياعني قىزمەت كورسەتۋگە قاجەت تاۋارلار مەن قىزمەتتەردىڭ قىمباتتاۋىمەن بايلانىستىرىپ وتىر. سونىمەن قاتار مەملەكەتتىك تەاترلار قىزمەتى ەكونوميكالىق تۇرعىدان شىعىندى بولىپ قالا بەرەدى.
اۋەزوۆ تەاترىنداعى قايتا جاڭعىرتۋ جۇمىستارى توقتاپ قالدى ما؟
وسىعان بايلانىستى رەسپۋبليكالىق جانە جەرگىلىكتى بيۋدجەتتەردەن جىل سايىن سۋبسيديا بولىنەدى. قارجى مينيسترلىگى دەرەكتەرىنە سايكەس, 2025 جىلدىڭ قاڭتار-قاراشا ايلارىندا تەاترلار مەن كونتسەرت زالدارىن قولداۋعا بولىنگەن سۋبسيديا كولەمى 81,6 ملرد تەڭگەنى قۇراعان. بۇل كورسەتكىش نومينالدى تۇردە وتكەن جىلمەن سالىستىرعاندا 20,9%-عا جوعارى.
2025 جىلدىڭ باسىنداعى مالىمەت بويىنشا, قازاقستاندا 74 تەاتر جۇمىس ىستەگەن. ونىڭ 32-ءسى استانا مەن الماتى قالالارىندا ورنالاسقان. ءاربىر بەسىنشى تەاتر جەكەمەنشىك نىساندا قىزمەت كورسەتەدى. 2024 جىلى ەل بويىنشا 16,7 مىڭ مادەني ءىس-شارا وتكىزىلگەن, ولاردى 3,1 ملن كورەرمەن تاماشالاعان. بۇل كورسەتكىشتەر 2023 جىلمەن سالىستىرعاندا ايتارلىقتاي وزگەرمەگەن.
ايتا كەتەيىك, «استانا بالەت» تەاترى جىلدى جەتىستىكپەن اياقتادى.