استانادا مەملەكەتتىك كەڭەسشى ەرلان قاريننىڭ توراعالىعىمەن پارلامەنتتىك رەفورما جونىندەگى جۇمىس توبىنىڭ ءتورتىنشى وتىرىسى ءوتتى.
جۇمىس توبى بىلتىر 8 قازاندا پرەزيدەنت وكىمىمەن قۇرىلعان ەدى. العاشقى وتىرىسى مەملەكەت باسشىسىنىڭ قاتىسۋىمەن 14 قازاندا ءوتتى. سول كۇنى پرەزيدەنت تاپسىرماسى بويىنشا ازاماتتاردىڭ پارلامەنتتىك جۇيەنى جەتىلدىرۋگە قاتىستى ۇسىنىستارىن جيناقتاۋ ماقساتىندا e-Otinish پلاتفورماسى مەن eGov سەرۆيسىندە «پارلامەنتتىك رەفورما» ارنايى ءبولىمى اشىلدى.
جۇمىس توبىنىڭ 2 جەلتوقساندا وتكەن ەكىنشى وتىرىسىندا جاڭا پارلامەنتتى قالىپتاستىرۋ ماسەلەلەرى قاراستىرىلدى.
ءۇشىنشى وتىرىس 29 جەلتوقساندا ۇيىمداستىرىلىپ, بولاشاق پارلامەنتتىڭ زاڭ شىعارۋ ۇدەرىسىنىڭ نەگىزگى تەتىكتەرى تالقىلاندى.
مەملەكەتتىك كەڭەسشى الداعى رەفورماعا قاتىستى قوعامدا جارتى جىلعا جۋىق ۋاقىت بويى كەڭ كولەمدە تالقىلاۋ جۇرگىزىلىپ كەلە جاتقانىن ەسكە سالدى. سونىمەن قاتار ەرلان قارين پارلامەنتتىك رەفورما مەملەكەت باسشىسى باستاماشى بولعان اۋقىمدى ساياسي جاڭعىرۋدىڭ ءبىر بولىگى ەكەنىن اتاپ ءوتتى. وعان 2019–2021 جىلدارى جۇزەگە اسىرىلعان ساياسي رەفورمالاردىڭ ءتورت پاكەتى مەن 2022 جىلعى كونستيتۋتسيالىق رەفورما جاتادى. جالپى العاندا, پرەزيدەنتتىڭ بارلىق رەفورماسى مەملەكەتتىڭ ينستيتۋتسيونالدىق ورنىقتىلىعىن نىعايتۋعا, ساياسي جۇيەنى زاماناۋي تالاپتارعا بەيىمدەۋگە باعىتتالعان.
جيىندا پارلامەنتاريزم ينستيتۋتىنىڭ ديرەكتورى ناتاليا پان ازاماتتاردان, ساراپشىلاردان جانە قوعام بەلسەندىلەرىنەن كەلىپ تۇسكەن ۇسىنىستار جونىندە جيناقتالعان اقپاراتپەن ءبولىستى. بۇگىنگە دەيىن e-Otinish جانە eGov پلاتفورمالارىنداعى «پارلامەنتتىك رەفورما» ارنايى ءبولىمى ارقىلى جۇمىس توبىنا حالىق اراسىنان, ساراپشىلار قاۋىمداستىعىنان جانە قوعامدىق بىرلەستىكتەردەن 500-دەن استام ۇسىنىس كەلىپ ءتۇستى.
بۇل جولعى وتىرىستىڭ نەگىزگى تاقىرىبى بولاشاق پارلامەنتتىڭ باسقا دا بيلىك ينستيتۋتتارىمەن ءوزارا ءىس-قيمىل ماسەلەلەرىنە جانە ءبىرپالاتالى جاڭا پارلامەنتتىڭ اتاۋىن قاراستىرۋعا ارنالدى.
جۇمىس توبى جەتەكشىسىنىڭ ورىنباسارى – پرەزيدەنتتىڭ قۇقىقتىق ماسەلەلەر جونىندەگى كومەكشىسى ەرجان جيەنباەۆ بولاشاق پارلامەنتتىڭ مەملەكەتتىك بيلىكتىڭ باسقا دا ينستيتۋتتارىمەن ءوزارا ءىس-قيمىلى كەزىندەگى وكىلەتتىكتەرىنە قاتىستى جالپى تاسىلدەر تۋرالى ايتتى. بۇل تاسىلدەر جۇمىس توبى مۇشەلەرى مەن ساياسي پارتيالاردىڭ ۇسىنىستارى نەگىزىندە ازىرلەنگەن.
جۇمىس توبىنىڭ ازات پەرۋاشەۆ, مارات شيبۇتوۆ, ەلنۇر بەيسەنباەۆ, مارات باشيموۆ, ينديرا اۋباكىروۆا, اسحات راحىمجانوۆ, الۋا يبراەۆا, ءۇنزيلا شاپاق, قارلىعاش جامانقۇلوۆا, ەرلان سارسەمباەۆ سەكىلدى مۇشەلەرى كۇن تارتىبىندەگى ماسەلەلەرگە قاتىستى ءوز يدەيالارى مەن ۇسىنىستارىن ورتاعا سالدى.
وتىرىس بارىسىندا جۇمىس توبىنىڭ مۇشەلەرى ەل كونستيتۋتسياسىنا ەنگىزىلەتىن الداعى وزگەرىستەردىڭ اۋقىمدى ەكەنىن جەتكىزدى. بۇل وزگەرىستەر زاڭ شىعارۋشى بيلىك جۇمىسىنىڭ تيىمدىلىگىن ارتتىرىپ قانا قويماي, نەگىزگى مەملەكەتتىك ينستيتۋتتار اراسىنداعى ءوزارا ءىس-قيمىلدىڭ تۇتاس جۇيەسىن ەداۋىر جاڭعىرتۋعا مۇمكىندىك بەرەدى.
جيىن قورىتىندىسى بويىنشا جۇمىس توبىنىڭ جەتەكشىسى – مەملەكەتتىك كەڭەسشى كەلىپ تۇسكەن ۇسىنىستاردىڭ بارلىعىن جيناقتاپ, جان-جاقتى تالداۋدى تاپسىردى.
پارلامەنتتىك جۇيەنى جەتىلدىرۋگە قاتىستى تاسىلدەردى ازىرلەۋ ءىسى جۇمىس توبىنىڭ الداعى وتىرىستارىندا كەزەڭ-كەزەڭىمەن جالعاسادى.