گونكونگتا تەننيستەن اتر 250 ءتۋرنيرىنىڭ جالاۋى جەلبىرەدى. جارىستى ەكىنشى اينالىمنان باستاعان الەكساندر بۋبليك الەمدىك رەيتينگتە 77 تۇرعان بوتيك ۆان دە زاندسحيۋلپپەن كەزدەسىپ, ونى 6:3, 6:3 ەسەبىمەن قاپى قالدىردى. باسەكە 1 ساعات 11 مينۋتكە سوزىلدى. كەلەسى كەزەڭدە بۋبليك اتر تىزىمىندە 406 ساتىعا جايعاسقان قىتايلىق شان تسزيۋنچەنمەن كۇش سىناسادى.
ءبىرىنشى جارتىلاي ورتا سالماقتا جۇدىرىقتاسىپ جۇرگەن قازاقتىڭ تانىمال كاسىپقوي بوكس شەبەرى باتىر جۇكەمباەۆ كەلەسى كەزدەسۋىن 9 مامىردا شوحجاحون ەرگاشەۆكە (26-2, 23 كو) قارسى وتكىزەدى. 34 جاستاعى وزبەكستاننىڭ وكىلى پانچەرلەر قاتارىنا جاتادى. وسى كۇنگە دەيىن 28 رەت شارشى الاڭعا شىققان ول 26 مارتە جەڭىسكە جەتتى. 23 قارسىلاسىن ەسىنەن تاندىردى. باتىر شوحجاحونمەن تۇيدەي قۇرداس. قانداسىمىز 25 جەكپە-جەكتىڭ تەك بىرەۋىندە عانا ۇتىلدى. قارسى شىققانداردى 17 رەت سۇلاتىپ سالدى. «All Stars Entertainment» پروموۋتەرلىك كومپانياسى جۇكەمباەۆ پەن ەرگاشەۆ اراسىنداعى كەزدەسۋدى تاشكەنتەگى «حۋمو ارەنادا» ۇيىمداستىرۋدى قۇپ كورگەن ەكەن.
فيدە 29 ناۋرىز بەن 15 مامىر ارالىعىندا كيپردە شاحماتتان وتەتىن «ۇمىتكەرلەر تۋرنيرىنە» كىمدەردىڭ قاتىساتىنىن رەسمي تۇردە جاريا ەتتى. بۇل تىزىمدە بۇرىنىراقتا جازعانىمىزداي, ءبىزدىڭ ءبيبىسارا اساۋباەۆادان بولەك, رەسەيلىك الەكساندرا گورياچكينا مەن ەكاتەرينا لاگنو, قىتايلىق چجۋ تسزينەر مەن تان چجۋني جانە ۇندىستاندىق ديۆيا دەشمۋكح, حامپي كونەرۋ, رامەشبابۋ ۆايشالي سىندى شەبەرلەر بار. ال ەرلەردىڭ سايىسىندا امەريكالىق فابيانو كارۋانا مەن حيكارۋ ناكامۋرا, نيدەرلاندتىق انيش گيري, گەرمانيالىق ماتتياس بليۋباۋم, قىتايلىق ۆەي ي, ۇندىستاندىق رامەشبابۋ پراگناناندحار, رەسەيلىك اندرەي ەسيپەنكو, وزبەكستاندىق جاۆوحير سينداروۆ ونەر كورسەتەدى. ەستەرىڭىزگە سالا كەتەيىك, قازىرگى كەزدە الەم چەمپيونى اتاعى ءۇندىستاننىڭ ءدۇلد ۇلى گۋكەش دوممارادجۋ مەن قىتايدىڭ بۇرىمدىسى ۆەنتسزيۋن تسزيۋيگە تيەسىلى. «ۇمىتكەرلەر تۋرنيرىندە» دارا شىققان شاحماتشى ءدال وسى مىقتىلارمەن ايقاسىپ, چەمپيوندىق ءتاجدى ساراپقا سالادى.
قۇرلىقتىق حوككەي ليگاسىندا كۇش سىناسىپ جۇرگەن «بارىس» قازانعا ساپار شەگىپ, جەرگىلىكتى «اق بارىسپەن» كەزدەستى. وسى كوماندا اراسىنداعى كەيىنگى بەس ويىندا تاتارستاندىقتار جەڭىسكە جەتكەن ەدى. بۇل جولى دا «اق بارىس» باسىمدىق تانىتتى. ولار ءبىزدىڭ قاقپامىزعا ءۇش گول سوقسا, ەلوردالىق ويىنشىلار ءبىر عانا شايبامەن جاۋاپ قايىرۋعا جارادى, ەسەپ – 3:1.
ارالاس جەكپە-جەك شەبەرى باعلان جاقانشا وڭتۇستىك كورەيادا ىرگەتاسى قالانعان «Black سombat» پروموۋشەنىمەن كەلىسىمشارتقا وتىردى. كەزىندە گرەك-ريم كۇرەسىمەن اينالىسىپ, سپور شەبەرى دەڭگەيىنە جەتكەن جاقانشا سپورتتىق وسى تۇرىندە سەگىز كەزدەسۋ وتكىزىپ, جەتەۋىندە جەڭىسكە جەتتى. تاعى ءبىر ايتا كەتەرلىك جايت, باعلاننىڭ سىڭارى – قورلان جاقانشا 2019 جىلى كۇرەس تۇرلەرىنەن استانادا وتكەن الەم چەمپيوناتىنىڭ كۇمىس جۇلدەگەرى.