2025 جىلى قازاقستاننىڭ ارنايى قىزمەتتەرى ەل اۋماعىندا ارەكەت ەتكەن 20 قارۋلى قىلمىستىق توپتىڭ قىزمەتىن توقتاتتى. بۇل توپتار كىسى ولتىرۋمەن, بوپسالاۋمەن جانە ەسىرتكى بيزنەسىمەن اينالىسقان. تەرگەۋ بارىسىندا اۋىر قىلمىستارعا قاتىسى بار 70 ادام ۇستالدى. ولاردىڭ اراسىندا شەتەل ازاماتتارى دا بار, دەپ جازادى Egemen.kz.
قۇقىق قورعاۋ ورگاندارىنىڭ مالىمەتىنشە, كۇدىكتىلەر ادام ءولتىرۋ, قورقىتىپ اقشا تالاپ ەتۋ, ەسىرتكى مەن قارۋدى زاڭسىز ساقتاۋ دەرەكتەرى بويىنشا ۇستالعان. ۇستالعاندار قاتارىندا قازاقستاندا دا, باسقا ەلدەردە دە ىزدەۋدە جۇرگەن تۇلعالار بولعان. ارنايى وپەراتسيالار ەلدىڭ ءار وڭىرىندە جۇرگىزىلگەن.
تەرگەۋ كەزىندە 30 بىرلىك اتىس قارۋى مەن 11 تراۆماتيكالىق قارۋ تاركىلەندى. سونىمەن قاتار قىلمىستىق جولمەن الىنعان اقشا قاراجاتى دا الىندى. قازىر بارلىق دەرەك بويىنشا سوتقا دەيىنگى تەرگەۋ امالدارى ءجۇرىپ جاتىر.
وسىعان بايلانىستى ۇلتتىق قاۋىپسىزدىك كوميتەتى ءباسپاسوز قىزمەتى كەڭ كولەمدى تۇسىنىكتەمە بەردى. وندا بىلاي دەلىنگەن:
«ۇلتتىق قاۋىپسىزدىك ورگاندارى 2025 جىلى ەلدەگى اۋىر قىلمىستاردىڭ الدىن الۋ ماقساتىندا جۇيەلى جۇمىس جۇرگىزدى. قىلمىستىق توپتاردىڭ ارەكەتى ەرتە كەزەڭدە اشكەرەلەندى. كۇدىكتىلەردىڭ بارلىعى دەرلىك ۇيىمداسقان تۇردە ارەكەت ەتكەن. ولار قوعامعا ناقتى قاۋىپ ءتوندىردى. تەرگەۋ بارىسىندا قارۋ ساقتالعان ورىندار انىقتالدى. زاڭسىز اينالىمداعى ەسىرتكى مەن قارۋ تاركىلەندى. قازىر سوتقا دەيىنگى تەرگەۋ تولىق كولەمدە جۇرگىزىلىپ جاتىر. ءاربىر فاكت زاڭ اياسىندا جان جاقتى قارالادى».
قۇزىرلى ورگاندار بۇل جۇمىستىڭ باستى ماقساتى قوعام قاۋىپسىزدىگىن ساقتاۋ ەكەنىن اتاپ ءوتتى. زاڭعا قايشى ارەكەت ەتكەن كەز كەلگەن توپ پەن تۇلعا جاۋاپسىز قالمايتىنى ەسكەرتىلدى.