الماتىداعى شىمبۇلاق تاۋ-شاڭعى كۋرورتىندا, تەڭىز دەڭگەيىنەن 2 260 مەتر بيىكتىكتە توتەنشە جاعدايلار مينيسترلىگىنىڭ جاڭا امبەباپ بولىمشەسى جۇمىسىن باستادى. نىساندى مينيستر, گەنەرال-لەيتەنانت شىڭعىس ءارىنوۆ اشتى. مينيسترلىكتىڭ مالىمەتىنشە, بۇل بولىمشە تمد ەلدەرىندە بالاماسى جوق سيپاتتامالارعا يە, دەپ جازادى Egemen.kz.
شىمبۇلاققا كۇن سايىن 15 مىڭنان استام دەمالۋشى كەلەدى. تاۋ-شاڭعى تراسسالارىنىڭ كۇردەلىلىگى مەن تۋريستەر اعىنىن ەسكەرسەك, توتەنشە جاعدايعا جەدەل ارەكەت ەتۋ شەشۋشى مانگە يە.
جاڭا بولىمشە «3 in 1» قاعيداتىمەن جۇمىس ىستەيدى. ونىڭ قۇرامىنا كاسىبي ءورت سوندىرۋشىلەر, قۇتقارۋشى-الپينيستەر جانە اپات مەديتسيناسى ورتالىعىنىڭ دارىگەرلەرى كىرگەن.
«مۇنداعى باستى مىندەت – كاسىبي قۇتقارۋشىلاردىڭ تاۋلىك بويى كەزەكشىلىگىن قامتاماسىز ەتۋ. ازاماتتار مەن تۋريستەردىڭ قاۋىپسىزدىگى – جۇمىسىمىزدىڭ نەگىزگى باسىمدىعى», دەدى شىڭعىس ءارىنوۆ.
ەكى قاباتتى كەشەن تولىق اۆتونومدى. وندا جەكە جىلۋ تورابى, تەحنيكالارعا ارنالعان بوكستار, مەديتسينالىق بلوك جانە وقۋ سىنىپتارى بار. عيمارات قاتال تاۋلى كليماتقا بەيىمدەلىپ سالىنعان.
قۇتقارۋشىلاردىڭ قاراماعىندا بيىك تاۋلى جاعدايعا لايىقتالعان التى ارنايى تەحنيكا بار. اتاپ ايتقاندا, قاردا جۇرەتىن كولىكتەر مەن موتوۆەزدەحودتار, كۆادروتسيكلدەر, ءورت ءسوندىرۋ اۆتوتسيستەرناسى جانە جەدەل مەديتسينالىق جاردەم كولىگى.
بۇعان دەيىن قىسقى ماۋسىمعا ارنالعان ەڭ ۇزدىك تۋريستىك نىسانداردى اتاعان ەدىك.