اۋىل شارۋاشىلىعى مينيسترلىگى ءىرى قارا مال ەتىن ەكسپورتتاۋعا قاتىستى جاڭا شەكتەۋ ءتارتىبىن ءتۇسىندىردى. 2025 جىلعى 31 جەلتوقساننان باستاپ قازاقستان اۋماعىنان سيىر ەتىن ءۇشىنشى ەلدەرگە جانە ەۋرازيالىق ەكونوميكالىق وداق مەملەكەتتەرىنە شىعارۋعا كۆوتا جۇيەسى ەنگىزىلدى. بۇل تالاپ 2026 جىلعى 30 ماۋسىمعا دەيىن كۇشىندە بولادى, دەپ جازادى Egemen.kz.
جالپى ەكسپورتتىق ليميت 20 مىڭ توننا دەڭگەيىندە بەكىتىلدى. كۆوتا تەك مەنشىكتى بورداقىلاۋ الاڭى بار ەت وڭدەۋشى كاسىپورىندارعا بەرىلەدى. ياعني مالدى ءوزى ءوسىرىپ, ءوزى بورداقىلامايتىن ەكسپورتتاۋشىلار نارىقتان ىعىستىرىلادى.
ءبىر كاسىپورىنعا بەرىلەتىن كۆوتا بورداقىلاۋ الاڭىنىڭ قۋاتىنا تىكەلەي بايلانىستى. ماسەلەن, 5 مىڭ باستان اساتىن الاڭى بار ءوندىرۋشى 1 مىڭ تونناعا دەيىن, ال 50 مىڭ باستان جوعارى قۋاتى بار كاسىپورىن 10 مىڭ تونناعا دەيىن ەت ەكسپورتتاي الادى.
مينيسترلىك بۇل شەشىمدى ىشكى نارىقتى قورعاۋ جانە الىپساتارلىقتى تەجەۋ قاجەتتىلىگىمەن تۇسىندىرەدى. سوڭعى جىلدارى جەكەلەگەن كومپانيالار مەن شاعىن سويۋ تسەحتارىنىڭ مالدى بورداقىلاۋسىز قايتا ساتىپ, ەكسپورتقا جونەلتۋى ەت باعاسىنىڭ وسۋىنە ىقپال ەتكەن. مۇنداي دەلدالدىق سحەما سۇرانىس پەن ۇسىنىستىڭ ناقتى تەڭگەرىمىن بۇرمالاپ, ىشكى نارىققا قىسىم تۇسىرگەن.
جاڭا كۆوتا تەتىگى وندىرىستىك ينفراقۇرىلىمعا ينۆەستيتسيا سالاتىن, تەحنولوگيا ەنگىزەتىن جانە تۇراقتى جۇمىس ورىندارىن اشاتىن ناقتى وندىرۋشىلەردى قولداۋعا باعىتتالعان. سونىمەن قاتار ەتتىڭ شىعۋ تەگىن باقىلاۋدى كۇشەيتىپ, ستاتيستيكانىڭ اشىقتىعىن قامتاماسىز ەتۋ كوزدەلىپ وتىر.
مينيسترلىك وكىلدەرىنىڭ ايتۋىنشا, ۋاقىتشا شەكتەۋلەردىڭ باستى ماقساتى − ازىق-ت ۇلىك قاۋىپسىزدىگىن ساقتاۋ, ىشكى تۇتىنۋدى باسىمدىققا قويۋ جانە مال شارۋاشىلىعىن ۇزاق مەرزىمدە تۇراقتى دامىتۋ.
ناتيجەسىندە, بۇل قادام وتاندىق فەرمەرلەر مەن ەت وڭدەۋشىلەردىڭ پوزيتسياسىن نىعايتىپ, ىشكى نارىقتا ساپالى سيىر ەتىنىڭ قولجەتىمدىلىگىن ارتتىرۋى ءتيىس.